SOERA NEHEMIA FAZA 8.
FAZA 8.
I. Faloechata. Ibaso zoera goroisa Esera. II. Iʼoʼooe niha sato Nehemia, ba wangomoesoiʼõ tõdõra. III. Lalaoe gowasa nose dahõ geoe.
1I. Ba me iroegi baw̃a si fitoe, me no so ba mbanoeara Ndraono Gizeraëli, ba owoelo niha sato ha sara dõdõ, ba golajama sebolo, fõnafõna mbawa gõli ba nidanõ. Ba laʼandrõ chõ Gesera sangila amachoita, enaʼõ ihalõ zoera goroisa andrõ chõ Moze, soera niw̃aʼõ Lowalangi ba Ndraono Gizeraëli. 2Ba iʼohe zoera goroisa Esera ere, ba zi faloecha andrõ, ira matoea ba ira alawe, awõ dozi si biha tõdõ, ba wamondrondrongo, ba zi samboea desaʼa, ba mbaw̃a si fitoe. (Ngaʼõt. II. 34, 30). 3Ba ibaso, ba golajama andrõ, fõnafõna mbawa gõli ba nidanõ, iʼotarai zi hoelõ wongi, iroegi laloeo, ba zi so ira matoea ba ira alawe, awõ zaboto ba dõdõ saʼae, ba lafondrongondrongo Iraono Gizeraëli fefoe niw̃aʼõ ba zoera goroisa andrõ. 4Ba ba harehare eoe jaw̃a so Gesera sangila amachoita, harehare nifaʼanõra nahania, ba ba ngainia so ndra Matitia. Sema, Anaja, Oeria, Hilikia, Maʼaseja, ba gambõlõ; ba ba gaberania ba ira Fedaja, Mizaëli, Malachia, Hasoemi, Hasibadana, Sacharia, Mesoela. 5Ba ibokai zoera Esera, ba zanehe niha sato fefoe — no alaw̃a nahania, moroi ba zi so niha sato fefoe —, ba me ibokai zoera, ba moezizio niha sato fefoe. 6Ba isoeno Jehowa, Lowalangi seboea, Esera, ba ladedema niha sato, lamane: Ja doehoe, ja doehoe! ba lafazaw̃a dangara ba daʼõ ba lafaõndrõ ira, ba lafalõgoe tooe ira ba danõ, fõna Jehowa. 7Ba labotochi ba dõdõ zato goroisa ira Jesoea, Bani, Serebia, Jamini, Akoeboe, Sabataʼi, Hodia, Maʼaseja, Kelita, Asaria, Josabada, Hanano, Felaja, Ono Lewi andrõ, ba si lõ teboelõ ba nahara niha sato. 8Ba lahaogõ wombaso soera goroisa Lowalangi, ba labotochi geloeaha, ba tobali aboto ba dõdõra.
9II. Ba Nehemia koemandroe ba Esera ere, sangila amachoita, ba Ono Lewi andrõ, samahaõ niha, ba lamane ba niha sato fefoe: Baw̃a niʼamoniʼõ chõ Lowalangimi Jehowa maʼõchṍ; bõi miʼangarõngarõ ba bõi miʼegeʼege! Noa sa megeʼege niha sato fefoe, me larongo daroma li, oroisa andrõ. 10Ba imane chõra: Miʼaeʼe, miʼā zatabõ ba mibadoe zami, ba mifoʼoeracha zi lõʼõ, me no baw̃a niʼamoniʼõ chõ zochõ jaʼita maʼõchṍ. Andrõ bõi aboe dõdomi, me no fangabeʼeda waʼomoeso dõdõda andrõ ba chõ Jehowa! (Moz. I. 16, 11). 11Ba larara gõi dõdõ niha sato fefoe Ono Lewi, lamane: Mihonogõ ami, me no baw̃a niʼamoniʼõ maʼõchṍ, andrõ bõi aboe dõdõmi! 12Ba mõi manga ira fefoe, ba ba wamaʼoheʼõ oeracha ba nawõra; amaedola gowasa seboea lalaoe, somoeso dõdõra, noa sa latõngõni nibotochi ba dõdõra.
13III. Ba mahemoloe õ, ba faloecha hõgõ ngafōē zato fefoe ba ere ba Ono Lewi, chõ Gesera sangila amachoita, ba wamondrongo na taroma li, oroisa. 14Ba lasõndra ba zoera goroisa andrõ, nifaw̃aʼõgõ Jehowa chõ Moze, wa ose daha geoe laʼiagõ Iraono Gizeraëli ba mbongi gowasa andrõ, ba mbaw̃a si fitoe, (Moz. III. 23, 34), 15awõ wa labeʼe li ba mbanoea misa chõra fefoe ba ba Jeroezalema, wa lamane: Miʼae ba hili ba mihalõ ndraha falo ba daha falo ndroeʼoe ba daha malimbi ba boeloe nandroelo ba daha geoe si fadege boeloe na, ba wolaoe ose daha geoe, dali nifachoi andrõ. 16Ba mõi baero ira, lahalõ ndraha geoe, ba labaliʼõ ose chõra; ba dete nomonia ilaoe zamõsana, ba ba golajama chõra, ba ba golajama gosali Lowalangi, ba ba golajama sebolo andrõ, fõnafõna mbawa gõli ba nidanõ ba fõnafõna mbawa gõli ba mado Geferaji. 17Ba dozi niha, ha waʼato ira, si no mangawoeli moroi ba niʼoloiʼõ jaʼira mege, ba solaoe ose daha geoe ba ba daʼõ la iagõ. Lõʼõ sa nilaoe Ndraono Gizeraëli si manõ, iʼotarai loeo Josoea, ono Noeni, iroegi loeo daʼõ; ba tobali omoeso sibai dõdõra. (Ngaʼõt. II. 34, 18). 18Ba laʼerogõ maʼṍchõ wombasombaso soera goroisa Lowalangi, ha oega mbongi gowasa andrõ. Ba fitoe bongi waʼara lalaoe gowasa andrõ, ba me loeo si w̃aloe, ba owoeloa seboea, dali nifachoi.
Currently Selected:
SOERA NEHEMIA FAZA 8.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.