SOERA NEHEMIA FAZA 10.
FAZA 10.
I. Fangaro fawoeʼoesa li. II. Lafaboeʼoe woloʼõ.
1I. Ba mafaboeʼoe lima — bõrõ daʼõ no mege fefoe — ba mabeʼe dandro tanga. Ba ba nifotandro andrõ, ba so dõi zalaw̃ama ba tõi Nono Lewi ba tõi gere chõma. 2Daʼe dõi ba zoera nifotandro andrõ: Nehemia koemandroe, ono Hakalia ba Sedekia, 3ba Seraja ba Asaria ba Jeremia 4ba Fasoeri ba Amaria ba Malachia 5ba Hatoesi ba Sebania ba Maloechi 6ba Harimi ba Meremoto ba Obadia 7ba Daniëli ba Ginitono ba Baroechi 8ba Mesoela ba Abia ba Mijanini 9ba Maʼasia ba Biligai ba Semaja; daʼõ gere andrõ. 10Ba Ono Lewi: Jesoea, ono Asania, ba Binoei, maʼoewoe Henadada, 11ba Kadimiëli ba talifoesõra: Sebania ba Hodia ba Kelita ba Felaja ba Hanano 12ba Micha ba Rehobo ba Hasabia 13ba Sakoeroe ba Serebia ba Sebania 14ba Hodia ba Bani ba Beninoe. 15Ba hõgõ mbanoea: Fareo ba Fahata-Moabi ba Elama ba Satoe ba Bani 16ba Boeni ba Asigada ba Bebai 17ba Adonia ba Bigiwai ba Adini 18ba Ateri ba Hisikia ba Asoeri 19ba Hodia ba Hasoemi ba Besai 20ba Harifi ba Anatoti ba Nobai 21ba Magifia ba Mesoela ba Hesiri 22ba Mesesabeʼeli ba Sadoki ba Jadoea, 23ba Felatia ba Hanano ba Anaja, 24ba Hosea ba Hanania ba Hasoebi 25ba Halohe ba Filiha ba Sobeki 26ba Rehoemi ba Hasabena ba Maʼaseja 27ba Ahia ba Hanano ba Anani 28ba Maloechi ba Harimi ba Baʼana. 29Ba ha niha baero õ na — ere ba Ono Lewi ba sanaro ba mbawandroehõ ba sanoenõ ba sangai halõw̃õ ba gosali, ba ha niha na fefoe, si no mamabali jaʼira ba niha [baero] ba danõ, woloʼõ oroisa Lowalangi —, ba foʼomora ba iraonora, matoea ba alawe, ba dozi si no biha faʼeboea, fa aboto ba dõdõra. (Eser. 2, 70).
30II. Ba fao ba dalifoesõra salaw̃a, ba mõi ba hõloe, wamaboeʼoe lira, wa edõna latõrõ lala goroisa Lowalangi andrõ, nifaʼema Moze, enoni Lowalangi, wa edõna latõngõni goroisa Jehowa, Soʼaja jaʼita, fefoe, awõ hoekoe, awõ gamachoita fefoe, wa edõna laʼoʼõ; (Jos. 24, 25. Sin. 119, 106); 31jaʼia wa lõ mabeʼe ba niha [baero] ba danõ nonoma alawe, awõ wa lõ mahalõ oemõnõma nonora; 32awõ wa lõ mahalõ ba loeo sabato, ba ma ba loeo bõʼõ niʼamoniʼõ, na laʼohe niha ba danõ waniaga ba ma boea danõ hadia ia ngawalõ, niʼamawa. Ba ero mewitoe fache, ba lõ mahalõ nowi, ba lõ masoegi zoegilõma. (Moz. II. 20, 10; 23, 11. F. 13, 15. 16. Amos. 8, 5). 33Ba mahonogõi na õmõma, õfa hoea dõfi mabeʼe sogoena ba gosali Lowalangima, (Raz. II. 12, 14), 34bõli roti nifaigifaigi andrõ, ba bõli zoemange niʼā andrõ, nibeʼebeʼe, fabaja soemange nitoenoe, si lõ aefaʼaefa ba he soemange ba loeo sabato ba ba wasoelõna ba soemange ba gowasa, ba soemange fangandrõ saoha gõlõ ba soemange fameta hõrõ, ba wameta horõ Ndraono Gizeraëli, ba balazo hadia ia fefoe niʼaʼazõchi ba gosali Lowalangima. 35Ba malaoe dahõdahõ, jaʼaga ba ere, ba Ono Lewi ba sato, ba gameʼela eoe andrõ, enaʼõ sawoesawōē zameʼe, ero rõfi, na inõtõ, ba gosali Lowalangima, eoe ba naha wameʼe soemange chõ Lowalangima Jehowa, dali nifachoi ba zoera goroisa. (Moz. III. 6, 12). 36Ba si aʼa mboea nowi chõma ba si aʼa mboea geoe fefoe, hadia ia ngawalõ geoe sowoea nibeʼe ba gosali Jehowa, ero rõfi; (Moz. II. 23, 19); 37ba si aʼa nonoma matoea ba si aʼa nono goerifõma, dali nifachoi ba goroisa, si aʼa nono zaw̃ima ba si aʼa nono mbiribirima, nibeʼe ba gosali Lowalangima, ba danga gere, sangai halõw̃õ andrõ ba nomo Lowalangima. (Moz. II. 13, 12). 38Ba he si aʼa hamo andrõ chõma ba si aʼa zoemange nihalõ fegero saoha gõlõ andrõ chõma ba si aʼa mboea geoe fefoe ba si aʼa nagoe ba si aʼa wanicha, nibeʼe ba gere andrõ ba mbateʼe andrõ ba gosali Lowalangima, ba samboea niʼofoeloe danõ nowima nitehe ba Nono Lewi; jaʼira, Ono Lewi sa, ba sangozaragõ si samboesamboea niʼofoeloe ba mbanoea zangahalõ chõma, fefoe. (Moz. III. 23, 17. Moz. IV. 15, 19; 18, 24). 39Ba si so gõi gere andrõ, ngaʼõtõ Gaʼaroni, na laʼozaragõ zi samboesamboea niʼofoeloe andrõ Ono Lewi, ba Ono Lewi, ba samboesamboea niʼofoeloe zi samboesamboea niʼofoeloe laʼohe ba gosali Lowalangima, ba mbateʼe andrõ ba nomo girõgirõ labeʼe. (Moz. IV. 18, 26). 40Ba mbateʼe andrõ sa labeʼe Iraono Gizeraëli ba Ono Lewi saoha gõlõra boea nowi ba agoe ba fanicha, me no ba daʼõ so nahia hadia ia ba niʼamoniʼõ, ba ere sangai halõw̃õ ba sanaro ba mbawandroehõ ba sanoenõ; ba lõ maʼositengagõ gosali Lowalangima andrõ.
Currently Selected:
SOERA NEHEMIA FAZA 10.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.