SOERA NEHEMIA FAZA 5.
FAZA 5.
I. Mangarõngarõ niha sato ba wamakao zalaw̃a jaʼira. Itolo ira Nehemia. II. Lõ iʼandrõ mbalazonia Nehemia.
1I. Ba mangarõngarõ sibai niha sato, awõ woʼomora, ba iwara andrõ, niha Jehoeda. 2So zangoemaʼõ: Iraonoma matoea ba iraonoma alawe, ba mabeʼe gade; ndramoefaigi chõma wache, enaʼõ manga ndraʼaga ba enaʼõ aoeriga! 3Ba so gõi zangoemaʼõ: Nowima ba kaboe nagoe chõma, ba omoma, ba mabeʼe gade; ba ndramoefaigi chõma wache, ba lofo andre! (Moz. I. 47, 20). 4Ba so gõi zangoemaʼõ: No mabeʼe gade mbenoeama, awõ kaboe nagoe chõma, ba wamalali kefe, õmõma beo ba zalaw̃a. 5Ba ijaʼe, ba he w̃aʼae no faoma ira mbotoma mboto dalifoesõma andrõ, awõ wa no faoma ira ndraonoma ndraonora, ba maloeloe zoei sawoejoe ndraonoma matoea, fabaja iraonoma alawe; noa sa tobali sawoejoe nonoma alawe õsa. Ba no tebai matimba daʼõ, me noa sa atṍ niha bõʼõ zochõ benoeama, awõ kaboe nagoe chõma. 6Ba mofõnoe sibai ndraʼo, me oerongo wangarõngarõra, awõ niw̃aʼõra andrõ. 7Ba oeʼeraʼera tõdõgoe; ba oetegoe zalaw̃a ba satoea, oemane chõra: Hadia, sangeboea hare ami, na mibeʼe nifalali ba nawõmi? Ba oelaoe waloechata seboea ba chõra andrõ, (Moz. II. 22, 23), 8ba oemane chõra: Jaʼaga, ba no mahõli dalifoesõda niha Jehoeda andrõ, si no moeʼamawa ba niha baero, ndrege nisõndrama lala. Ba jaʼami, ba samawa talifoesõmi naʼi ami, enaʼõ teʼamawa ira chõda? Ba lõ hedehedera, tebai latema ligoe. (Moz. III. 25, 48). 9Ba oemane: Si lõ sõchi wolaoemi andrõ! Hadia, tenga sangataʼoefi Lowalangida ami enaʼõ, ba nilaoemi andrõ, bõrõ wangoʼaja niha baero andrõ, oedoeda? 10Ba jaʼo ba ira talifoesõgoe ba ono matoea andrõ chõgoe, ba no mabeʼe nifalali chõra ganaʼa ba fache; ba alacha lõ tasoegi zoegilõda andrõ. 11Maʼõchṍ andre mifoeli chõra mbenoeara ba kaboe nagoe chõra ba kaboe zai ba omora, ba bõi saʼae misoegi mibeʼemi nifalali chõra, anaʼa ba fache ba agoe ba fanicha. 12Ba lamane: Mafoeli, ba lõʼõ saʼae masoegi ira; maʼoʼõ zomasi ndraʼoegõ. Ba oefakaoniʼõ gere, ba oebeʼe ba hõloe ira, wa laʼoʼõ niw̃aʼõgoe. 13Ba oeʼanotogõ mbaroegoe ba dotogoe ba oemane: Jaʼimane Lowalangi wanimba dozi si falimo ba nifaboeʼoera andrõ, jamoetimba ira baomora ba ba zi so chõra, ba niʼanotogõ ira si manõ gõi, balazi lõ õsi saʼae! Ba lamane niha sato fefoe: Ja doehoe! ba lasoeno Jehowa. Ba laʼoʼõ daʼõ no mege sato.
14II. Ba iʼotarai loeo daʼõ, me tefataro ndraʼo amaedola goemandroe ba danõ mado Joeda — iʼotarai ndrõfi si 20, iroegi ndrõfi si 32 chõ razo Aretazasa, mewelendroea fache waʼara — ba lõ niʼagoe õ goemandroe, awõ ndra talifoesõgoe, 15he w̃aʼae no lafoʼõmõ niha sato koemandroe fõna, fõnagoe, 40 roefia maʼṍchõ, bõli gõra roti ba bõli gõra agoe; ba no lafakao niha sato ono matoea andrõ chõra. Ba tenga si manõ wolaoegoe, faʼataʼoegoe Lowalangi. 16Ba he ba wangazõchi õli andre, ba no mohalõhalõw̃õ gõi ndraʼodo, ba lõʼõ sa niʼõlima benoea; ba ono matoea andrõ chõgoe, ba no ahori so, ba halõw̃õ andrõ. 17Ba chõgoe mangamanga niha Jehoeda andrõ, he satoea andrõ, otoe a lima woeloe, ba he si mõi chõma, banoea niha baero, si tefasoei jaʼaga. 18Ba hadia nihalõhalõ, õra siroegi maʼṍchõ — sagesageoe zaw̃i si matoea ba õnõʼõnõ ngaʼeoe mbiribiri nitoetoejoe ba hadia ia wofo —, ba jaʼo zanaha, ba foeloefoeloe bongi, ba hadia ia ngawalõ nagoe, niʼojaʼõ. Ba ba daʼõ fefoe, ba lõ oew̃aʼõ õgoe gõ goemandroe, me no abeʼe rodi ba niha sato. 19Bõi olifoegõʼõ ndraʼo, jaʼoegõ Lowalangigoe, ba nitologoe niha andre, fefoe, ba wolohe ba zi sõchi hadia ia chõgoe!
Currently Selected:
SOERA NEHEMIA FAZA 5.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.