SOERA NEHEMIA FAZA 6.
FAZA 6.
I. Tebai labeʼe teʼala Nehemia oedoenia andrõ. II. Awai gõli.
1I. Ba me terongo chõ ndra Sanabala, Tobia, Gesemi Dawa Ara, ba ba noedoema bõʼõ andrõ, wa no oeʼazõchi gõli ba lõ sadoedoe saʼae — he w̃aʼae lõʼõ na moefaʼanõ lagõ mbawa gõli, iroegi loeo daʼõ —, 2ba lafatenge chõgoe ira Sanabala Gesemi, lamane chõgoe: Taboe, enaʼõ faloecha ita ba mbanoea heza, ba ndraso Gono! Ba tõdõra, ba si lõ sõchi lalaoe chõgoe. (Ngaʼõt. I. 8, 12). 3Ba oefatenge zinenge chõra, oemane: Eboea sibai halõw̃õgoe, ba tebai mõido mitooe chõmi. Tebai terõi halõw̃õ, fa oebõhõi enaʼõ, ba weʼamõi mitooe chõmi. 4Ba mendrõfa lafatenge chõgoe, si manõmanõ, ba oemanõmanõ gõi chõra. 5Ba samoeza tõ ifatenge chõgoe Sanabala, melima mõi daʼõ, enoninia ifatenge, sagõrõ zoera ba dangania, soera si lõ lõwõlõwõ. 6Imane ba zoera andrõ: No tetoeria ba niha baero, ba iw̃aʼõ gõi Gasimoe: Tõdõoe ba tõdõ niha Jehoeda, ba edõna molaw̃a ami, andrõ halõhalõw̃õoe wangazõchi õli, ba enaʼõ tobali razora ndraʼoegõ; soroma ba daʼõ fefoe. 7Ba noa gõi õfataro zamaʼeleʼõ law̃aʼõ, enaʼõ latoloʼõ weʼao ba Jeroezalema: Razo mado Joeda ia! Ba irongo dania doeria daʼõ razo. Andrõ taboe, enaʼõ faloecha ita! 8Ba oefoeli oefatenge chõnia, oemane: Faja manõ niw̃aʼõoe andrõ, nifachaimõ daʼõ tõdõoe. 9Dozi ira sa, ba no sametaʼoe jaʼaga enaʼõ, lamane dõdõra: Atata dania dangara ba labõhõli wangazõchi õli, ba tobali lõ awai. Andrõ abeʼeʼõ dangagoe! [oemanõ wangandrõ]. 10Ba mõido jomo chõ Zemaja, ono Delaja ono Mehetabeʼeli, me no jomo manõ sosó ia. Ba imane: Tafao ba gosali Lowalangi, ba niʼamoniʼõ, ba takoesi mbawandroehõnia, so sa dania zi mõi mamoenoe jaʼoegõ, ba zi bongi so ira, ba wamoenoe jaʼoegõ! 11Ba oemane: Hadia, soloi niha si mane jaʼodo? Ba hadia, tola mõi ita bacha ba gosali, jaʼitā andre, si lõ mate ita? lõ mõido bacha ba daʼõ. 12Aboto saʼae ba dõdõgoe, tenga Lowalangi zamatenge jaʼia; me no Tobia ba Sanabala zangoni jaʼia, andrõ wa mamaʼeleʼõ ia ba chõgoe. 13Ba daʼõ danira wangoni jaʼia: enaʼõ ataʼoe ndraʼo, ba enaʼõ oehalõ horõgoe wolaoe daʼõ, ba wamatooe jaʼo dania, enaʼõ laʼila latandraw̃aisi ndraʼodo. 14Bõi olifoegõʼõ, jaʼoegõ Lowalangigoe, ndra Tobia Sanabala, ba nilaoera andrõ; ba samaʼeleʼõ ira alawe andrõ, Noadia, awõ zamaʼeleʼõ bõʼõ andrõ, sametaʼoe jaʼo menaʼõ!
15II. Ba awai gõli ba zi doea woeloe a lima ba mbaw̃a Eloeli, 52 wongi waʼara. 16Ba me larongo daʼõ oedoema andrõ fefoe, ba ihawoei faʼataʼoe niha baero fefoe, si tefasoei jaʼaga, ariri sibai ira wamaigira, ba aboto saʼae ba dõdõra, wa no moroi ba wanolo Lowalangima, wa no awai gõli andrõ. 17Ba oja gõi lafaʼoheʼõ soera chõ Dobia salaw̃a mado Joeda me loeo daʼõ, ba oja gõi ifaʼoheʼõ chõra Tobia. 18Me no ato mado Joeda, si no mõi ba hõloe chõnia, me no oemõnõ Zechania, ono Āra, ia, ba me oemõnõ Mesoela, ono Mberechia, nononia Johanano. 19Ba ladoenõdoenõ gõi chõgoe dõdõnia si sõchi, ba lafoelifoeli chõnia niw̃aʼõgoe; ba soera ifaʼoheʼõ Tobia, ba wametaʼoe jaʼo.
Currently Selected:
SOERA NEHEMIA FAZA 6.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.