SOERA NEHEMIA FAZA 3.
FAZA 3.
Laʼazõchi gõli Jeroezalema ba alio tedooe.
1 Ba maoso Geliasibi ere seboea ba talifoesõnia ere andrõ, ba lalaoe mbawa gõli mbiribiri andrõ. Ba laʼamoniʼõ ba labeʼe lagõnia. Ba latohoegõ, iroegi malige Hamea andrõ, ba laʼamoniʼõ daʼõ gõi, ba latohoegõ, iroegi malige Hananeʼeli. (Jer. 31, 38). 2Ba sohalõw̃õ ba ngaira, ba banoea Jericho. Ba ba ngai daʼõ, ba Soekoeri, ono Imeri. 3Ba bawa gõli giʼa, ba banoea Zanaʼa zolaoe; labeʼe mboha ba lafaʼanõ lagõ, awõ lazi, ba si no amaedola mboeatõ. 4Ba sangazõchi ba ngai daʼõ, ba no Meremoto, ono Goeria ono Hakosi, ba ba ngai daʼõ, ba Mesoela, ono Mberechia ono Mesesabeʼeli. Ba ba ngai daʼõ, ba Sadoki, ono Mbaʼana. 5Ba ba ngai daʼõ, ba banoea Dekoa; ba salaw̃ara, ba lõ laʼoʼõ niw̃aʼõ zamatõrõ jaʼira. 6Ba sangazõchi bawa gõli ba mbanoea satoea, ba Jojada, ono Wasea, ba Mesoela, ono Mbesodia, labeʼe mboha ba lafaʼanõ lagõ, awõ lazi ba si no amaedola mboeatõ. 7Ba ba ngai daʼõ, ba Melatia, banoea Gibeona, ba Jadono, banoea Meronoti, awõ mbanoea Gibeona andrõ, awõ mbanoea Misefa, amatõrõw̃a goemandroe ba danõ ba zi tambai Oifarati tánõ andre. 8Ba ba zi tambai daʼõ, ba Oesiëli zangazõchi, ono Haraja, awõ doeka ganaʼa andrõ. Ba ba ngai daʼõ, ba Hanania toeka daloedaloe nifalemba; laʼazõchi [gõli] Jeroezalema, iroegi gõli saweʼeweʼe andrõ. 9Ba ba ngai daʼõ, ba Refaja zangazõchi, ono Hoeri, satoea zi matonga mbanoea Jeroezalema. 10Ba ba ngai daʼõ, ba Jedaja, ono Haroemafa, ba gamaoedoe nomonia. Ba ba ngai daʼõ, ba Hatoesi, ono Hasabeneja. 11Ba sandroro lahaogõ Malachia, ono Harimi ba Hasoebi, ono Wahata-Moabi, fabaja malige danoeri andrõ. 12Ba ba ngai daʼõ, ba Saloemi, ono Halohe, satoea zi matonga mbanoea Jeroezalema — jaʼia ba ononia alawe. 13Ba bawa gõli ba ndraso, ba Hanoeni zolaoe, awõ mbanoea Zanoa, lafasindro ba faʼanõ lagõ, awõ lazi ba si no amaedola mboeatõ, ba latohoegõ wangazõchi õli, 1000 hela, iroegi mbawa gõli golawoea. 14Ba bawa gõli golawoea andrõ, ba Malachia zangazõchi, ano Rechabi, satoea mbanoea Mbeti Cheremi; ifasindro ba ifaʼanõ lagõ, awõ lazi ba si no amaedola mboeatõ. 15Ba bawa gõli ba mbaʼa, ba Saloeni zangazõchi, ono Choli-Hose, satoea mbanoea Misefa — ifasindro ba ifosagõ ba ifaʼanõ lagõ, awõ lazi ba si no amaedola mboeatõ —, ba itohoegõ wangazõchi õli ba zinga mbaw̃a ba noeloe hele, ba kaboe razo, ba iroegi nibosi andrõ, moroi jaw̃a ba mbanoea Dawido. (Raz. II. 20, 20). 16Ba tohoetohoe daʼõ, ba Nehemia zangazõchi, ono Gasiboeki, satoea zi matonga mbanoea Mbetisoeri, iroegi ba gamaoedoe lewatõ Dawido ba iroegi mbaw̃a andrõ, nifazõchi, ba iroegi nomo zaradadoe andrõ. 17Ba ba zi tambai daʼõ, ba Ono Lewi Rehoemi, ono Mbani [zolohe jaʼira]. Ba ba ngai daʼõ, ba Hasabia, satoea zi matonga mbanoea Gegila, nifachoi ba mbanoeara lalaoe. 18Ba ba zi tambai daʼõ, ba iwara. Bawai, ono Henedada, satoea zi matonga mbanoea Gegila [zolohe]. 19Ba ba ngairā, ba Ezeri, ono Jesoea, satoea mbanoea Misefa, sandroro gõi lalaoe, ba gamaoedoe lala mijaw̃a ba nomo wangõna ba watalinga. (Ngaʼõt. II. 26, 9). 20Ba ba zi tambai daʼõ, mijaw̃a ba hili, ba Baroechi, ono Zabai, sandroro gõi, iʼotarai watalinga, iroegi gamaoedoe mbawandreehõ nomo Geliasibi ere seboea. 21Ba ba ngai daʼõ, ba Meremoto, ono Goeria ono Hakosi, sandroro gõi, iʼotarai ba gamaoedoe mbawandroehõ nomo Geliasibi, iroegi ba hambo nomonia. 22Ba ba ngai daʼõ, ba ere, banoea ba zaloʼo. 23Ba ba ngai daʼõ, ba Benijami ba Hasoebi, ba gamaoedoe nomora. Ba ba ngai daʼõ, ba Asaria, ono Maʼaseja ono Ganania, ba ngai nomonia. 24Ba ba zi tambai daʼõ, ba Binoei, ono Henadada, sandroro gõi, iʼotarai nomo Gasaria, iroegi watalinga andrõ ba sanalinga siʼoe. 25Ba Falala, ono Oesai, ba ba gamaoedoe watalinga andrõ ba ba gamaoedoe malige tánõ jaw̃a, si no tedooe moroi ba gõdo razo, si fadoro ba goeroenga. Ba ba ngai daʼõ, ba Fedaja, ono Wareo. (Jer. 32, 2). 26Ba sangai halõw̃õ ba gosali, enoni andrõ, ba ba Gofeli andrõ so nomora, iroegi ba gamaoedoe mbawa gõli ba nidanõ, tánõ ba gatoemboecha loeo ba iroegi malige si no tedooe andrõ. (Ngaʼõt. II. 27, 3). 27Ba ba zi tambai daʼõ, ba banoea Dekoa zoei, sandroro tõ, ba gamaoedoe malige si no tedooe, ba iroegi gõli Gofeli andrõ. 28Ba jaw̃a mbawa gõli koedo, ba ere zangazõchi; ba gamaoedoe nomonia ilaoe zamõsana. 29Ba ba ngai daʼõ ba Sadoki, ono Imeri, ba gamaoedoe nomonia. Ba ba zi tambai daʼõ, ba Semaja, ono Zechania, sanaro ba mbawa gõli tánõ ba gatoemboecha loeo. 30Ba ba ngai daʼõ, ba Hanania, ono Zelemia ba Hanoeni, ono Zalafi, lima moroi ba zi aʼa, sandroro zoei. Ba ba ngai daʼõ, ba Mesoela, ono Mberechia, ba gamaoedoe mbateʼenia. 31Ba ba zi tambai daʼõ, ba Malachia andrõ, toeka ganaʼa, iroegi nomo zangai halõw̃õ ba gosali, ba ba ngai daʼõ, ba solafo, ba gamaoedoe mbawa gõli Mifikada, ba iroegi ba gamaoedoe mbateʼe andrõ ba zi sagõtõ, ba watalinga. 32Ba ba gotaloea daʼõ mbawa gõli mbiribiri, ba toeka ganaʼa gõi ba solafo zangazõchi.
Currently Selected:
SOERA NEHEMIA FAZA 3.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.