SOERA NEHEMIA FAZA 2.
FAZA 2.
I. Itehe chõ Nehemia weʼamõi ba Jeroezalema razo. II. Iroegi, ba me no aefa ifaigi, ba ifarooe dõdõ zatoea, ba wangazõchi õli. III. Faʼoedoesa Zanabala andrõ.
1I. Ba me baw̃a Nisana, me no aloea sara ambõ doea woeloe fache razo Aretazasa, me so fõnania nagoe, ba oehalõ nagoe andrõ ba oeʼoroʼõ chõ razo ba lõ oefaʼilaʼõ chõnia enaʼõ, wa lõ sõchisõchi dõdõgoe. 2Ba imane chõgoe razo: Hana wa no afoesi mbawaoe, ba tenga sa atṍ sofõchõ ndraʼoegõ. 3Ba ataʼoe sibai ndraʼo. Ba oemane chõ razo: Ja anaoe manõ noso razo! Hana wa lõ afoesi mbawagoe, na no adoedoe mbanoea andrõ, si so lewatõ ndra toeagoe, ba na no achozi mbawa gõlinia? 4Ba imane chõgoe razo: Ba hadia atṍ niʼandrõoe? Ba mangandrõ ndraʼo chõ Lowalangi ba zoroego; 5ba awena oemane chõ razo: Na atoelõ chõ razo, ba na si tola genonioe andre õw̃aʼõ —: fa õfatenge ndraʼo ba danõ mado Joeda, ba mbanoea andrõ, si so lewatõ ndra toeagoe, enaʼõ oefoeli oetaroeʼõ. 6Ba imane chõgoe razo — no doemadao ba ngainia ngambatõnia — imane: Ha waʼara ndraʼoegõ, na mõiʼõ, ha waʼara õfoeliʼõ? Tobali atoelõ chõ razo ifatenge ndraʼodo; ba oeʼõtõ chõnia mbongi. (F. 5, 14). 7Ba oemane na chõ razo: Na atoelõ chõ razo, ba ndramoebeʼe chõgoe zoera ba goemandroe ba danõ andrõ, jefo Oifarati, enaʼõ bõi lataha ndraʼo, balazi oeroegi danõ mado Joeda, 8ba soera chõ Gasafo andrõ, samaigimaigi eoe ba gatoea chõ razo, enaʼõ ibeʼe chõgoe geoe balo, boha mbawa gõli chõgoe ba mbawa gõli hati andrõ, ba ngai gosali, ba sogoena ba gõli mbanoea ba ba nomo andrõ nahiagoe. Ba itehe chõgoe razo, me no itolodo tanga Lowalangigoe, seboea tõdõ chõgoe.
9II. Ba me oeroegi ndra koemandroe ba danõ jefo Oifarati, ba oebeʼe ba dangara zoera razo; ba no ifatenge gõi goemandra ba si fakoedo razo, awõgoe. 10Ba me larongo ira Sanabala, banoea Horono, Tobia enoni andrõ, Iraono Gamoni, ba afõchõ chõra, me no so zanolo Iraono Gizeraëli, enaʼõ ohahaoe dõdõra. 11Ba oeroegi Jeroezalema, ba me no tõloe bongi ndraʼo ba daʼõ, ba maoso ndraʼo, oetõrõ bongi, 12lõ atotó nawõgoe, lõ niʼombachaʼõgoe ba niha bõʼõ hadia nibeʼe Lowalangigoe ba dõdõgoe fanologoe Jeroezalema, ba lõ oeʼohe koedo, ha si sageoe andrõ, ba zi fakoedo ndraʼo. 13Ba oetõrõ mbawa gõli ba ndraso, ba zi bongi, mitooe ba goemboe naga ba ba mbawa gõli golawoea; ba oeʼamaigiʼõ õli Jeroezalema si no abõcha, ba bawa gõli, si no achozi. 14Ba oesaw̃a mbaw̃a gõli ba mbaʼa ba baw̃a razo; ba lõʼõ saʼae naha gahe koedogoe, tebai itõrõ, barõgoe. 15Ba oeʼosisi mijaw̃a ndraso, ba zi bongi, ba oeʼamaigiʼõ õli. Ba ba mbawa gõli ba ndraso zoei oetõrõ, wangawoeli mijomo. 16Ba satoea, ba lõ laʼila, heza mõido, ba hadia danigoe, irege daʼõ, ba lõ niʼombachaʼõgoe, he ba niha Jehoeda [sato], ba he ba gere ba he ba zalaw̃a ba he ba zatoea ba he ba dánõ bõʼõ fefoe, sohalõhalõw̃õ. 17Ba oemane chõra: Miʼila wangaboe dõdõ andrõ chõda, me no adoedoe Jeroezalema ba me no achozi mbawa gõli. Talaboe, taʼazõchi gõli Jeroezalema, fa bõi saʼae laʼigiʼigiʼõ ita! 18Ba awena oeʼombachaʼõ chõra, wa no itolodo tanga Lowalangigoe, si no eboea tõdõ chõgoe, awõ niw̃aʼõ razo chõgoe. Ba lamane: Talaboe, talaoe! Ba laʼabeʼeʼõ ira ba halõw̃õ si sõchi andrõ.
19III. Ba me larongo daʼõ ira Sanabala, banoea Horono, Tobia, enoni andrõ, Iraono Gamoni ba Gesemi, Dawa Ara, ba laʼoʼaja ndraʼaga, maʼiki ira chõma, ba lamane: Hadia daʼõ chõmi, nilaoemi andrõ? 20Hadia, milaw̃a razo? Ba oetema lira, oemane chõra: Lowalangi andrõ ba zoroego zameʼe mofozoe chõma dania; ba jaʼaga, enoninia andre, ba malaoe, maʼazõchi. Ba jaʼami, ba tenga awõ ami, lõ tána chõmi, ba tenga si lõ olifoe mbanoea Jeroezalema dania ami.
Currently Selected:
SOERA NEHEMIA FAZA 2.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.