MATAIO FAZA 9.
FAZA 9.
I. Ifadõhõ wõchõ zi mate dambai Jesoe. II. Ikaoni Mataio andrõ. III. Lõ mamoni nifahaõnia. IV. Ifadõhõ wõchõ ndra alawe sendro taloe. V. Isoesoegi nono Jaʼiro andrõ. VI. Ifadõhõ wõchõ hõrõ zaoeʼa daroea ba fõchõ zobechoe, samõsa. VII. Ebolo mbasitõ, ba lõ ato zamasi.
(A. 9, 1—8: Mar. 2, 1—12: Loek. 5, 17—26)
1I. Ba mõi ia baowo, isaw̃a si jefo, mbanoeara. 2Ba hiza, laʼohe chõnia zi mate dambai, si mõrõmõrõ ba gaso. Ba me iʼila wamatira Jesoe, ba imane ba zi mate dambai andrõ: Bõi ataʼoefi, onogoe, no teʼefaʼõ chõoe horõoe. 3Ba hiza, lamane dõdõra õsa, sangila amachoita: Sangaohangaoha daʼõ. 4Ba me iʼila geraʼerara Jesoe, ba imane: Hana wa lõ sõchi geraʼerami, ba dõdõmi bacha? (Joh. 2, 24. 25). 5He zaoha ira sa, fangoemaʼõ: No teʼefaʼõ chõoe horõoe, ba ma fangoemaʼõ: Faoso, ba owaõwaõ? 6Ba enaʼõ miʼila, tola iʼefaʼõ Ono Niha horõ ba goeli danõ, (ba awena imane ba zi mate dambai andrõ): Faoso, fazaw̃a gasomõ ba foeliʼõ chõmi. (Joh. 5, 8). 7Ba maoso ia, ifoeli ia chõra. 8Ba me laʼila daʼõ niha sato, ba ataʼoe ira ba lasoeno Lowalangi, sameʼe faʼabõlõ si manõ ba niha.
(A. 9, 9—13: Mar. 2, 13—17: Loek. 5, 27—32)
9II. Ba, me itõrõ Jesoe, me iʼotarai daʼõ, ba iʼila niha, sidadao ba naha wanema beo, Mataio dõinia, ba imane chõnia: Oʼõ ndraʼo. Ba maoso ia, iʼoʼõ. 10Ba me manga ia jomo, ba hiza, ato zi mõi sanema beo, awõ zeboea horõ, oroedoe manga ira chõ Jesoe ba chõ nifahaõnia. 11Ba me laʼila daʼõ farizaio, ba lamane ba nifahaõnia: Hana wa oroedoe manga zamahaõ jaʼami ba zanema beo ba ba zeboea horõ? (Loed. 15, 2). 12Ba imane, me irongo daʼõ: Ba zabõlõ, ba lõ mogoena zameʼe daloedaloe, ha ba zofõchõ mogoena. 13Ba miʼae mibeʼe ba dõdõmi, hadia niw̃aʼõ andrõ: ”Faʼahachõ dõdõ zomasido, ba tenga soemange.” Tenga sa ba wogaoni satoelõ mõi ndraʼo, ha ba wogaoni si so horõ. (F. 12, 7. Hos. 6, 6. Tim. I. 1, 15).
14III. Ba daʼõ mõi chõnia nifahaõ Johane andrõ, lamane: Hana ndraʼaga ba farizaio, wa mamoni ba gõ ndraʼaga, ba lõʼo sa mamoni nifahaõmõ? (Loek. 18, 12). 15Ba imane chõra Jesoe: Hadia, tola aboe dõdõ zi mõi ba walõw̃a, fatoea awõra zangowaloe? Ba iroegi baw̃a dania, ba aheta chõra zangowaloe, ba awena dania mamoni ba gõ ira, (Joh. 3, 29). 16Ba lõ sombalo baroe satoea balobalo si bohooe; asika zoei sa mbaroe, ba zinga mbalobalo andrõ, ba tobali eboea zasikania. 17Ba lõʼõ gõi lalaoe nagoe si bohooe ba nahia satoea. Ba na lalaoe, ba asika nahia andrõ ba adoewa nagoe ba tekiko nahia. Ba nahia si bohooe lalaoe nagoe si bohooe, ba faoma lõ hadia ia.
(A. 9, 18—26: Mar. 5, 22—43: Loek. 8, 41—56)
18IV. Me iw̃aʼõ chõra daʼõ, ba hiza zalaw̃a, si mõi jomo, mangaloeloe chõnia, imane: No mate mege nonogoe alawe, ba ae toefa ia tangaoe, ba aoeri ia. 19Ba maoso Jesoe, iʼoʼõ, awõ nifahaõnia. 20Ba hiza ndra alawe, sendro taloe, no mewelendroea fache saʼae; iʼondrasi Jesoe moroi foeri, ibabaja gahe mbaroenia; 21imane sa dõdõnia: He ha baroenia oebabaja, ba dõhõ wõchõgoe. (F. 14, 36). 22Ba ibaliʼõ ia Jesoe, iʼila ba imane: Bõi ataʼoefi, onogoe; no iʼorifi ndraʼoegõ famatimõ andrõ. Ba abeʼe ndra alawe andrõ, iʼotarai daʼõ sibai.
23V. Ba me iroegi nomo zalaw̃a no mege Jesoe, me iʼila zolaoe sigoe, awõ niha sato, si fagoeagoea, ba imane: (Jer. 9, 17). 24Miheta ami, tenga sa si mate nono alawe andrõ, si mõrõ. Ba laʼigiʼigiʼõ ia. (Joh. 11, 11). 25Ba me no tefofanõ baero niha sato, ba mõi ia si bacha, iraʼoe danga, ba maoso nono alawe andrõ. 26Ba hoemõngõ doeria daʼõ ba danõ andrṍ, maʼasagõrõ. (Loek. 7, 17).
27VI. Ba me mofanõ Jesoe ba daʼõ, ba laʼoʼõ ia niha saoeʼa, daroea, moeʼao ira, lamane: Hachõsi tõdõ ndraʼaga, maʼoewoe Dawido! (F. 20, 30). 28Ba me mõi ia jomo, ba laʼondrasi ia saoeʼa andrõ, ba imane chõra Jesoe: Hadia, fadoehoe dõdõmi, oeʼila oelaoe daʼõ? Lamane chõnia: Fadoehoe dõdõma, Toea. 29Awena ibabaja hõrõra, imane: Jaʼitõrõ zi fadoehoe dõdõmi. (F. 8, 13). 30Ba teboka hõrõra. Ba itenaw̃a sibai ira Jesoe, imane: Mifaigi, bõi irongo daʼõ niha, gofoe ha nihá. (F. 12, 16. Mar. 1, 44). 31Ba mõi ira baero, ba laʼombachaʼõ ia ba danõ andrõ maʼasagõrõ. 32Ba me no mõi ira baero, ba hiza, laʼohe chõnia niha si lõ hede, sobechoe. (F. 12, 22). 33Ba me no tefofanõ mbechoe andrõ, ba hoemede zi lõ hede no mege, ba ahõlihõli dõdõ niha sato, lamane: Lõ irai oroma zi manõ ba Ndraono Gizeraëli. 34Ba lamane farizaio: Moroi ba zalaw̃a mbechoe andrõ, wa ifofanõ mbechoe. (F. 12, 24. Mar. 3, 22).
35VII. Ba itõrõi mbanoea seboea awõ mbanoea sideʼide Jesoe, mamahaõ ia ba zekola chõra, manoeriagõ toeria mbanoea Lowalangi andrõ, toeria somoeso dõdõ, ba ifadõhõ fefoe ngawalõ wõchõ ba fefoe ngawalõ waʼatebai. (F. 4, 23). 36Ba me iʼila niha sato, ba ahachõ dõdõnia ira, me no nifakao ira, nifazaewe, hoelõ mbiribiri, si lõ koebalo. (Hes. 34, 4. 5. Mar. 6, 34). 37Ba imane chõ ndra nifahaõnia: Ebolo sa mbasitõ, ba lõ ato zohalõw̃õ. (Loek. 10, 2). 38Andrõ miʼandrõ chõ zochõ basitõ andrõ, enaʼõ ifatenge zohalõw̃õ ba mbasitõnia.
Currently Selected:
MATAIO FAZA 9.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.