MATAIO FAZA 8.
FAZA 8.
I. Ifadõhõ mbooe aoeri Jesoe, II. ba fõchõ zawoejoe goemandra andrõ ba Gafanaoema III. ba fõchõ matoea Wetero, ira alawe, IV. ifahaõ ira ba woloʼõ jaʼia, V. itenaw̃a mbade; VI. ifadõhõ wõchõ zobechoe, daroea.
(A. 8, 1—4: Mar. 1, 40—45: Loek. 5, 12—15)
1I. Ba ato zoloʼõ jaʼia, me mõi ia mitooe, moroi ba hili. 2Ba hiza zobooe aoeri, si mõi chõnia, mangaloeloe chõnia, imane: He Toea, õʼila õfadõhõ wõchõgoe, na edõna ndraʼoegõ. 3Ba iʼoroʼõ dangania, ibabaja, imane: Edõna ndraʼo, jadõhõ! Ba iʼanemaʼõ dõhõ mbooe aoerinia. 4Ba imane chõnia Jesoe: Faigi, fa bõi õʼombachaʼõ ba niha, ba ae oromaʼõ ndraʼoegõ chõ gere ba beʼe gameʼela andrõ, niw̃aʼõ Moze, ba wamadoehoeʼõ chõra. (Loek. 17, 14. Moz. III. 14, 2 b. t.).
(A. 8, 5—13: Loek. 7, 1—10)
5II. Ba me mõi ia mijomo ba Gafanaoema ba iʼondrasi ia koemandra, mangandrõ chõnia, imane: 6He Toea, so jomo zawoejoegoe, tooe ba zalo manõ, no mate dambai, aʼoi so waʼafõchõ. 7Imane chõnia: Mõido moefadõhõ wõchõnia. 8Ba itema linia koemandra andrõ, imane: He Toea, ambõ ndraʼo mõiʼõ ba nomogoe, ba hede manõ, ha samboea li, ba dõhõ wõchõ zawoejoegoe. (Sin. 107, 20). 9Jaʼodo sa gõi, ba no niha si so barõ mbaw̃a zalaw̃a, ba so barõ mbawagoe zaradadoe, ba na oew̃aʼõ ba zi samõsa: Aeʼe, ba mofanõ ia, ba ba zi samõsa: Aine, ba so ia; ba na oew̃aʼõ chõ zawoejoegoe: Halõw̃ooe daʼõ, ba ihalõ. 10Ba me irongo daʼõ Jesoe, ba ahõlihõli dõdõnia, ba imane ba zoloʼõ jaʼia: Si ndroehoe niw̃aʼõgoe chõmi, ba Ndraono Gizeraëli na i, ba lõ nisõndragoe famati si manõ. 11Ba oew̃aʼõ chõmi, ato dania zi otarai danõ ba gatoemboecha, awõ zi otarai danõ ba gaechoela ba manga ira, awõ ndra Aberahamo, Izaʼaki, Jakobo ba mbanoea zoroego andrõ, (Loek. 13, 29), 12ba nitiboʼõ baero nono mbanoea andrõ ba zogõmigõmi, baero sibai, ba fegeʼege dania ba daʼõ, ba fatangisa mboha. (F. 23, 13; 25, 30). 13Ba imane Jesoe chõ goemandra andrõ: Foeliʼõ, jaʼitõrõ zi fadoehoe dõdõoe. Ba ba daʼõ sibai dõhõ wõchõ zawoejoe no mege. (F. 9, 22. 29; 15, 28).
(A. 8, 14—17: Mar. 1, 29—34: Loek. 4, 38—40)
14III. Ba me mõi jomo Jesoe ba nomo Wetero, ba iʼila matoeania ira alawe, tooe ba zalo, achõmõ. (Kor. I. 9, 5). 15Ba iraʼoe danga ba dõhõ waʼachõmõ, maoso ia mangai gõ Jesoe. 16Ba me bongi, ba ato laʼohe chõnia sobechoe; ba ifofanõ mbechoe linia ba dozi sofõchõ, ba ifadõhõ wõchõ. 17Enaʼõ itõrõ niw̃aʼõ Jesaja, samaʼeleʼõ andrõ, me imane: ”No iheta waʼatebaida ba no jaia zoloei fõchõda.” (Jes. 53, 4. Fet. I. 2, 24).
18IV. Ba me iʼila Jesoe, ato niha, sowoelo chõnia, ba iw̃aʼõ laʼõtõ mbaw̃a. (Loek. 8, 22). 19Ba iʼondrasi ia sangila amachoita, samõsa, imane chõnia: He samahaõ, oeʼoʼõ ndraʼoegõ, gofoe heza mõiʼõ. (Loek. 9, 57 b. t.). 20Ba imane chõnia Jesoe: So dõgi narõ hili ba zigõloe ba so gazoeni ba wofo ba daloe mbanoea, ba chõ Nono Niha, ba lõ naha wemõrõ. (Kor. II. 8, 9). 21Ba imane chõnia nifahaõ bõʼõ: He Toea, tehe chõgoe, enaʼõ mõido oea mogoʼo amagoe. 22Ba imane chõnia: Oʼõ ndraʼo ba ndramoekoʼo zi mate chõra niha si mate. (Efes. 2, 1 b. t.).
(A. 8, 23—27: Mar. 4, 35—41: Loek. 8, 23—25)
23V. Ba me mõi ia baowo, ba laʼoʼõ ia nifahaõnia. 24Ba hiza, ilaboe bade sabeʼe ba mbaw̃a andrõ, tobali tehawoe doeloe nowo, ba jaʼia, ba no mõrõ. 25Ba laʼondrasi ia, lasoesoegi, lamane: Tolo Toea, tekiko ita! 26Ba imane chõra: Ha lõ ataʼoe ami, sambõ famati! Awena maoso ia, itenaw̃a nangi, awõ ndroeloe, ba tobali ahono sibai. (F. 14, 31. Sin. 107, 29). 27Ba ahõlihõli dõdõ niha, lamane: Ha niha daʼõ, me lafondrondrongo gõi linia angi ba doeloe?
(A. 8, 28—34: Mar. 5, 1—20: Loek. 8, 26—39)
28VI. Ba me iroegi si jefo, danõ mbanoea Gadara, ba faloecha ia niha sobechoe, daroea, laʼotarai lewatõ, no owõhõ sibai, tebai itõrõ lala andrõ niha bõʼõ labeʼe. 29Ba hiza, moeʼao ira, lamane: Hadia niw̃aʼõoe chõma, Ono Lowalangi? Hadia, ba wamakao jaʼaga mõiʼõ ba daʼe, ba tenga inõtõ na? (Mar. 1, 24. Loek. 4, 41). 30Ba so ba daʼõ, sarõoe chõra, mbawi, sambawá seboea, nikoebaloi. 31Ba laʼandrõ chõnia bechoe andrõ, lamane: Na õfofanõ ndraʼaga, ba fatengega ba mbawi si sambawá andrõ. 32Ba imane chõra: Miʼaeʼe. Ba larõi niha andrõ, lasaw̃a mbawi. Ba hiza, fagohi ira ba zanaere, latiboʼõ ira ba mbaw̃a, sambawá manõ, ba alõmõ. 33Ba moloi goebalo, lasaw̃a mbanoea, ba laʼombachaʼõ daʼo fefoe, ba hadia ia ba zobechoe andrõ. 34Ba hiza, mõi ira baero, samba banoea manõ, ba wamaondragõ Jesoe, ba me laʼila ia, ba laʼandrõ chõnia, enaʼõ iheta ia ba danõra andrõ.
Currently Selected:
MATAIO FAZA 8.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.