MATAIO FAZA 10.
FAZA 10.
I. Ifatenge zinengenia, si felendroea, Jesoe. II. Ifobawa lala chõra. III. Ifarooe dõdõra.
(A. 10, 1—15: Mar. 3, 13—19: 6, 7—13: Loek. 6, 14—16: 9, 1—6)
1I. Ba hoemede ia ba nifahaõnia andrõ, si felendroea, itehe chõra, wolaw̃a bechoe si raʼiõ, enaʼõ lafofanõ ba enaʼõ lafadõhõ fefoe ngawalõ wõchõ ba fefoe ngaw̃alõ waʼatebai.
2II. Daʼe dõi zinenge andrõ, si felendroea: Si fõfõna Zimoni, nifotõi Fetero ba Andrea, talifoesõnia; ba Jakobo, ono Zebedaio ba talifoesõnia Johane, (Hal. zin. 1, 13), 3ba Filifo ba Batolomaio, ba Toma ba Mataio, sanema beo andrõ, ba Jakobo, ono Galifaio ba Lebaio, 4ba Simoni selote, ba Joeda, banoea Kariota, si manga mbõlinia dania. 5Si felendroea andrõ nifatenge Jesoe ba iw̃aʼõ li chõra, imane: Bõi misaw̃a lala niha baero ba bõi miʼae ba mbanoea Ndrawa Zamaria andrõ. 6Ba mbiribiri sisoena andrõ, maʼoewoe Gizeraëli miʼaeʼe. (F. 15, 24. Hal. zin. 13, 46). 7Miʼaeʼe ba miʼangombacha, mimane: No ahatõ mbanoea zoroego andrõ. (F. 4, 17. Loek. 10, 9). 8Mifadõhõ wõchõ zofõchõ, ba misoesoegi zi mate, ba mifadõhõ mbooe aoeri ba mifofanõ mbechoe. Lõ nibeʼemi bõli, ba bõi gõi mihalõ mbõli. (Mar. 16, 17 b. t. Hal. zin. 8, 20). 9Bõi miʼohe ganaʼa ba bõi gõi firõ ba bõi gõi kefe, ba mbõbõ taloemi. (Loek. 22, 35). 10Bõi mamola ami ba lala, bõi domboea mbaroemi, bõi mobadagahe ami ba bõi maniʼo, noa sa si nangea labeʼe gõ ba zohalõw̃õ. (Loek. 10, 7. Kor. I. 9, 7. 14. Tim. I. 5, 18). 11Ba ba zi mõi ami ba mbanoea seboea, ba ma ba mbanoea sideʼide, ba mizofoezofoe ha niha zi nangea ba daʼõ, ba ba daʼõ miʼiagõ, irege mofanõ ami. 12Ba na mõi ami jomo ba nomo, ba miʼowai ira. (Loek. 10, 5. 6). 13Ba na si nangea nomo andrõ, ba jafaloecha ia waʼohahaoe dõdõ andrõ chõmi. Ba na tenga si nangea ia, ba jamangawoeli chõmi waʼohahaoe dõdõ andrõ chõmi. 14Ba na so zi lõ mamaʼamõi jomo jaʼami ba si lõ mamondrongo limi, ba miheta ami ba nomo andrõ ba ba mbanoea andrõ, miʼanotogõ gawoegawoe ba gahemi. (Hal. zin. 13, 51; 18, 6). 15Si ndroehoe niw̃aʼõgoe chõmi, õnaʼõna na zi gõna mbanoea Zodoma ba banoea Gomora andrõ, na loeo wangoehoekoe, moroi ba zi gõna mbanoea andrõ. (F. 11, 24). 16Hiza, oefatenge ami, hoelõ mbiribiri, ba hoenõ nasoe gatoea. Andrõ jaʼoneche ami, si mane oelõ ba jaʼatoelõ ami, si mane marafadi. (Loek. 10, 2. Hal. zin. 23, 6).
(A. 10, 17—22: Mar. 13, 9—13)
17Ba miʼangelamaisi niha; laʼohe sa dania ami ba rafe, ba ba zekola chõra, labõzibõzi dania ami. (F. 24, 9. Loek. 21, 12. Hal. zin. 5, 40). 18Ba ba goemandroe ba ba razo teʼohe ami, bõrõ ndraʼo, ba wamadoehoeʼõ chõra ba ba niha baero. (Hal. zin. 25, 23). 19Ba na labeʼe ba dangara ami, ba bõi miʼaboesi tõdõ he miwisa ba hadia niw̃aʼõmi; tebeʼe sa chõmi dania, ba daʼõ sibai, hadia niw̃aʼõmi. (Loek. 12, 11. 12). 20Tenga sa jaʼami zihede, Eheha Namami andrõ zihede, na hoemede ami. 21Ibeʼe dania niboenoe dalifoesõnia niha, ba ibeʼe niboenoe nononia ama, ba maoso ndraono, oedoe ndra amara, laboenoe. 22Ba dozi ira dania faʼoedoe chõmi, bõrõ dõigoe. Ba sanaoe õlõ, iroegi gamozoea, daʼõ niʼorifi. (Loek. 21, 16. 17. Joh. 15, 18—21. F. 24, 13). 23Ba na lagohi ami ba mbanoea si samboea, ba miʼoloi, misa w̃a mbanoea bõʼõ. Si ndroehoe niw̃aʼõgoe chõmi: Lõ fachamõ mi dozigõ mbanoea Ndraono Gizeraëli irege so Nono Niha. 24Tenga seboea moroi chõ zamahaõ nifahaõ, ba tenga seboea moroi chõ zochõ jaʼia zawoejoe. (Joh. 13, 16; 15, 20). 25Abõnõ saʼae chõ nifahaõ, na tobali faoma ira zamahaõ jaʼia, ba na faoma ira zochõ zawoejoe. Na no labeʼe tõi zochõ omo Mbeleseboe, ba tenga mendroea manõ lamanõ gõi ba zoroijomonia? (F. 12, 24).
(A. 10, 26—33: Loek. 12, 2—9)
26III. Andrõ bõi miʼataʼoefi ira. Lõʼõ sa hadia ia nibaloegõ, si lõ tefaʼeleʼõ dania, ba lõ nibiniʼõ, si lõ aboto ba dõdõ dania. (Mar. 4, 22. Loek. 8, 17). 27Hadia niw̃aʼõgoe chõmi ba zogõmigõmi, ba niw̃aʼõ ba zohaga; ba hadia nirongomi tõgi dalingami, ba mitoeriagõ ba mbawa doewoetoewoe. 28Ba bõi miʼataʼoefi zamoenoe boto, si tebai mamoenoe noso. Ba mendroea manõ miʼataʼoefi zangila mamakiko noso, fabaja boto, ba narako. 29Tenga domboea zakefe, na laʼamawa ziliw̃i nali? ba samboea lõ aechoe tooe ba danõ daʼõ, na tenga moroi chõ Namami andrõ; 30ba ba chõmi, ba no teʼerai gõi rozi mboe fefoe, ba hõgõ jaw̃a. 31Andrõ bõi ataʼoe ami; no tohoede ami moroi ba ziliw̃i nali, he w̃aʼae oja ira. 32Ba dozi ha niha zamadoehoeʼõ jaʼo ba niha, daʼõ gõi nifadoehoeʼõgoe chõ Namagoe, si so ba zoroego. (Rom. 10, 9. 10). 33Ba sangosilõʼõgõ jaʼo ba niha, ba oeʼosilõʼõgõ gõi chõ Namagoe, si so ba zoroego. (Loek. 9, 26. Tim. II. 2, 12). 34Bõi miw̃aʼõ tõdõmi, ba wolohe faʼatoelõ ba goeli danõ so ndraʼo; tenga ba wolohe faʼatoelõ mõi ndraʼo, ba wolohe fasõndrata mõido. 35Ba wamaʼoedoe niha chõ namania mõi ndraʼo, ba ba wamaʼoedoe ono alawe chõ ninania ba ba wamaʼoedoe oemõnõ ira alawe chõ ninania matoeania. (Mich. 7, 6), 36ba si faʼoedoe ba niha dania zoroijomonia. 37Ha niha zomasi amania, ba ma inania, moroi ba waʼomasinia ndraʼo, ba tenga si nangea chõgoe daʼõ; ba ha niha zomasi ononia matoea, ba ma ononia alawe, moroi ba waʼomasinia ndraʼo, ba tenga si nangea chõgoe. (Moz. V. 13, 6. b. t. Loek. 14, 26). 38Ba ha niha zi lõ manoejoe rõfania, ba woloʼõ jaʼo, ba tenga si nangea chõgoe. (F. 16, 24. b. t. Loek. 14, 26). 39Chõ zanõndra nosonia aetoe ia, ba ha niha zaetoe noso, na bõrõ ndraʼo, daʼõ zanõndra jaʼia. (Loek. 17, 33. Joh. 12, 25). 40Samaʼamõi jomo jaʼami, ba ifaʼamõi jomo ndraʼo, ba samaʼamõi jomo jaʼo, ba ifaʼamõi jomo zamatenge jaʼo andrõ. (F. 18, 5. Joh. 13, 20). 41Samaʼamõi jomo samaʼeleʼõ, me no samaʼeleʼõ dõinia, ba itema loeo zamaʼeleʼõ, ba samaʼamõi jomo satoelõ, me no satoelõ dõinia, ba itema loeo zatoelõ. (Sal. I. 17. 10 b. t.; Sal. II. 4, 8 b. t.). 42Ba ha niha zamabadoegõ si samba mako idanõ kafoe, he ha daʼõ, ba zi samõsa, sideʼide andre, me no nifahaõ dõinia, ba si ndroehoe niw̃aʼõgoe chõmi, tebai aechoe loeonia. (F. 25, 40. Mar. 9, 41).
Currently Selected:
MATAIO FAZA 10.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.