MATAIO FAZA 7.
FAZA 7.
Fangoʼozoei hoehoeo ba hili andrõ: I. Bõi mangoehoekoe niha ita. II. Bõi taʼoʼaja niʼamoniʼõ. III. Tefondrondrongo wangandrõda. IV. Toeho goroisa. V. Lala ba mbanoea Lowalangi. VI. Bõi tafondrondrongo li zamahaõ, samini tõdõ. VII. Amaedola: Omo nitaroeʼõ ba dete gara.
(A. 7, 1—5: Loek. 6, 37—42)
1I. Bõi mihoekoe niha, fa bõi tehoekoe ami. (Rom. 2, 1. b. t.; 14, 10). 2Hadia hoekoe nifatõrõmi ba niha bõʼõ, daʼõ nifatõrõ chõmi zoei dania; ba soeʼasoeʼa niʼanoeʼaʼõmi, ba laʼanoeʼaʼõ zoei dania ba wanoeʼa chõmi. (Mar. 4, 24). 3Ba hana wa õʼila golowingõ, si so ba hõrõ dalifoesõoe, ba lõ ba dõdõoe mboto geoe andrõ ba hõrõmõ? 4Ba hadia wa õw̃aʼõ chõ dalifoesõoe: Baseʼõ, daʼoeheta golowingõ andrõ ba hõrõoe, ba hiza mboto geoe ba hõrõ chõoe. 5Ofõnaiʼõ ba hõrõoe, wangeheta boto geoe andrõ, samini tõdõ, ba awena dania õfaigi wameta olowingõ andrõ ba hõrõ dalifoesõoe.
6II. Bõi mibeʼe õ nasoe niʼamoniʼõ andrõ, ba bõi mitiboʼṍ ba mbaʼo mbawi manimani andrõ chõmi, fa bõi lahoendragõ ahera bawi ba fa bõi labaliʼõ ira foeri, ba wanasawi jaʼami.
(A. 7, 7—11: Loek. 11, 9—13)
7III. Miʼangandrõ ba tebeʼe chõmi; miʼangaloei, ba misõndra, mibõkõbõkõ mbawandroehõ, ba tebokai chõmi. (F. 21, 22, Joh. 14, 14). 8Dozi sangandrõ manema, ba sangaloei, ba isõndra, ba chõ zamõkõmõkõ bawandroehõ, ba tebokai. 9Ma ha niha ba chõmi niha, sameʼe chõ nononia kara, na iʼandrõ roti chõnia? 10Ba ma sameʼe oelõ, na iʼandrõ giʼa? 11Andrõ, na miʼila mibeʼe ba ndraonomi gameʼela si sõchi, jaʼami si lõ sõchi, ba tenga mendroea manõ ibeʼe zi sõchi Amami andrõ, si so ba zoroego, ba zangandrõ chõnia? (Jak. 1, 5. 6. 17).
12IV. Andrõ, fefoe hadia ia zomasi ami lalaoe chõmi niha, daʼõ gõi milaoe chõra; daʼõ sa goroisa andrõ ba daʼõ niw̃aʼõ zamaʼeleʼõ andrõ. (Loek. 6, 31. Rom. 13, 8—10).
13V. Mitõrõ mbawa gõli siseʼise andrõ, me no eboea mbawa gõli ba me no ebolo lala saechoe ba waʼatekiko andrõ, ba me no ato zanõrõ jaʼia. (Loek. 13, 24). 14Ba me no ideʼide mbawa gõli ba me no iseʼise lala saechoe ba waʼaoeri andrõ, ba me lõ ato zanõndra jaʼia.
15VI. Miʼangelamaisi zamaʼeleʼõ andrõ, si falimo, si mõi chõmi, si so noecha mbiribiri, ba bacha, ba asoe gatoea, si manga niha, ira. (F. 24, 4. 5. 24. Hal. zin. 20, 29). 16Ba mboeaboeara aboto ba dõdõmi ira. Hadia, teteteoe mboea nagoe ba zaʼasaʼa mao, ba ma boea marafala ba lato? (Loek. 6, 44. Jak. 3, 12). 17Si manõ wa iʼowoea mboea si sõchi fefoe geoe si sõchi, ba eoe sobooe, ba iʼowoea mboea si lõ sõchi. (F. 12, 33 b. t.). 18Tebai iʼowoea mboea si lõ sõchi eoe si sõchi ba tebai iʼowoea mboea si sõchi eoe sobooe. 19Fefoe geoe si lõ mowoea boea si sõchi, ba teʼobõ ba tetiboʼõ ba galitõ. (F. 3, 10). 20Andrõ, ba mboeaboeara aboto ba dõdõmi ira. 21Lõ dozi molala dania ba mbanoea zoroego andrõ si fasoʼaja chõgoe, wangoemaʼõ: He Soʼaja! he Soʼaja! ha soloʼõ somasi Namagoe andrõ, si so ba zoroego. (Loek. 6, 46. Jak. 1, 22—25). 22Ato dania zangoemaʼõ chõgoe, na loeo daʼõ: He Soʼaja! he Soʼaja! Hadia, tenga tõimõ chõma, ba wamaʼeleʼõ, ba hadia, tenga tõimõ chõma, wamofanõ bechoe, ba hadia, tenga no oja nifazõchima tandra, soroi ba dõimõ andrõ? (Loek. 13, 25 b. t.). 23Ba ha daʼõ dania, ba lõ oebiniʼõ chõra, oemane: Lõ oerai faʼila chõmi, miheta ami chõgoe, jaʼami solaoe si lõ atoelõ. (F. 25, 41).
24VII. Andrõ, fefoe ha niha zamondrongo niw̃aʼõgoe andre, ba soloʼõ, ba ba niha satoeatoea, sanaroeʼõ omonia ba zokara, fachilichili ia. (Loek. 6, 47. 48. Joh. 13, 17). 25Ba ilaoe teoe sabõlõbõlõ, so molõ, ilaoe angi, itõrõ nomo andrõ, ba lõ asoʼa ia, me no nitaroeʼõ ba dete gara. 26Ba fefoe ha niha zamondrongo niw̃aʼõgoe andre, si lõ moloʼõ, ba ba niha sambõ tõdõ, sanaroeʼõ omonia ba gawoe nasi, fachilichili ia. (Loek. 6, 49). 27Ba ilaoe teoe sabõlõbõlõ, so molõ, ilaoe angi, itõrõ nomo andrõ, ba asoʼa, abõlõbõlõ waʼasoʼania. (Hez. 13, 11 b. t.). 28Ba tobali, me no iʼoʼozoei hoehoeonia andrõ Jesoe, ba tobali dõdõ zato ba wamahaõnia. (Mar. 1, 22. Loek. 4, 32). 29Me no famahaõ zabõlõ wamahaõnia jaʼira, ba tenga si mane ba zangila amachoita andrõ chõra.
Currently Selected:
MATAIO FAZA 7.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.