MATAIO FAZA 6.
FAZA 6.
Fanohoegõ hoehoeo ba hili andrõ: I. He wisa wameʼe ameʼela ba zi noemana. II. He wisa wangandrõ. III. He wisa wamoni. IV. Bõi omasi ita ganaʼa. V. Bõi taʼaboesi tõdõ mbalazo.
1I. Ba mifaigi waʼatoelõmi andrõ, bõi ha ba zanehe niha atoelõ ami, enaʼõ laʼila ami; ba na si manõ, ba lõ loeomi chõ Namami andrõ, si so ba zoroego. (F. 23, 5). 2Andrõ, na õbeʼe gameʼela bi zi noemana, ba bõi falaoeʼõ dorofe fõnaoe, si mane samini tõdõ andrõ, ba zekola ba ba newali, enaʼõ lasoeno ira niha. Si ndroehoe niw̃aʼõgoe chõmi, no latema loeora. 3Ba na mameʼe ameʼe la ndraʼoegõ ba zi noemana, ba bõi jaʼiʼila tangaoe kabera hadia nilaoe dangaoe kambõlõ, (Rom. 12, 8), 4enaʼõ lõ oroma gameʼelamõ andrõ; ba isoelõni chõoe Amaoe andrõ, sangila si tobini. (Loek. 14, 14).
5II. Ba na mangandrõ ami, ba bõi si mane samini tõdõ ami. Noa sa omasi ira ba zekola so ira, ba ma ba newali, ba waeroea lala misa, na mangandrõ ira, afoera oroma ira ba niha. Si ndroehoe niw̃a õgoe chõmi, no latema loeora. 6Ba jaʼoegõ, na mangandrõʼõ, ba ae si bacha ba mbateʼe chõoe ba koesi mbawandroehõ chõmõ, ba angandrõ chõ Nawaoe andrõ, ba zi tobini, ba isoelõni chõoe Amaoe andrõ, sangila si tobini. (Sal. II. 4, 33). 7Ba na mangandrõ ami, ba bõi miʼojaʼõ li, si mane niha baero; lawai sa tefondrondrongo chõra, ba waʼoja lira. (Sal. I. 18, 26. Jes. 1, 15). 8Andrõ bõi mifaomagõ ami chõra, noa sa iʼila Amami andrõ, hadia zogoena chõmi, he lõʼõ na niʼandrõmi chõnia. (Sin. 38. 10). 9Andrõ mimane wangandrõ: He Ama chõma si so ba zoroego! Jateʼamoniʼõ dõioe. (Loek. 11, 2—4. Sin. 115, 1). 10Jatobali banoeaoe fefoe niha. Jaʼitõrõ zomasi ndraʼoegõ, hoelõ ba zoroego, jasi manõ gõi ba goeli danõ. (Loek. 17, 20 b. t. 22, 42. Sin. 103, 21). 11Oma siroegi maʼõchõ beʼe chõma maʼõchõ andre. (Amaed. 30, 8). 12Ba efaʼõ chõma horõma, si mane fangefaʼõma sala ba zi so sala chõma. (F. 18, 21 b. t.). 13Ba bõi ohe ndraʼaga ba wanandraigõ, ba efaʼõga ba Gafõcha. Me chõoe mbanoea, awõ waʼabõlõ, awõ lachõmi, iroegi zi lõ aetoe. Jadoehoe. (F. 26, 41. Kor. I. 10, 13. Tim. II. 4, 18). 14Na miʼefaʼõ saʼae zala niha ba iʼefaʼõ gõi chõmi Amami andrõ, si so ba zoroego. (Mar. 11, 25. 26. Kol. 3, 13). 15Ba na lõ miʼefaʼõ zala niha, ba lõʼõ gõi iʼefaʼõ chõmi horõmi Amami andrõ.
16III. Ba na mamoni ami, ba bõi mifangeraoe mbawami, si mane samini tõdõ; me labaloegõ mbawara, afoera oroma ira ba niha, ba wamonira andrõ. Si ndroehoe niw̃aʼõgoe chõmi no latema loeora. (Jes. 58, 5). 17Ba jaʼoegõ, na mamoniʼõ, ba bajoini hõgõoe ba sasai mbawaoe; 18enaʼõ lõ oroma ba niha, na mamoniʼõ, ba enaʼõ oroma chõ Namaoe andrõ, si so ba zi tobini, ba isoelõni chõoe Amaoe andrõ, sangila si tobini.
19IV. Bõi mihõna chõmi girõgirõ ba goeli danõ, nifakiko hama ba niʼā howoe, nicharoe zanagõ ba nitagõ. (F. 19. 21; Loek. 16, 9). 20Ba zoroego mihõna chõmi girõgirõ, ba zi lõ ifakiko hama, ba zi lõ iʼā howoe, ba zi lõ lacharoe sanagõ, ba zi lõ latago. (Loek. 12, 33. Tim. I. 6, 17 b. t.). 21Ba zi so girõgirõ chõoe sa, ba daʼõ gõi so dõdõoe dania. 22Haga mboto hõrõ; na si sõchi hõrõoe, ba mohaga mbotooe maʼasamboea. (Loek. 11, 34 b. t.). 23Ba na no mofõchõ hõrõoe, ba ogõmigõmi mbotooe maʼasamboea. Andrõ, na no sogõmigõmi haga andrõ, si so ba dõdõoe, ba ha waʼabõlõ waʼogõmigõmi andrõ. 24Tebai enoni zi daroea nihá, ma faʼoedoe ia ba zi samõsa ba iʼomasiʼõ zi samõsa, ba ma zoei molemba ia ba zi samõsa, ba iʼositengagõ zi samõsa. Tebai enoni Lowalangi ami ba enoni ganaʼa gõi. (Loek. 16, 13, Kor. II. 6, 14 b. t. Sal. I. 18, 21).
(A. 6, 25—33: Loek. 12, 22—31)
25V. Andrõ oew̃aʼõ chõmi; Bõi miʼaboesi tõdõ nosomi, hadia mbalazomi, ba ma botomi, hadia noechami. Tenga no eboea noso, moroi ba gõ, ba tenga no eboea mboto, moroi ba noecha? (Fil. 4, 6. Fet. I. 5. 7.) 26Mifaigi wofo andrõ, ba daloe mbanoea, lõ manaroe ira ba lõ mamasi, lõ mangõhõna ba halasa ira, ba ibalazoi ira Amami andrõ, si so ba zoroego. Tenga no arõoe faehoe ami wofo? (F. 10, 29—31). 27Ba ha niha ba chõmi zangila mondrooeʼõ faʼanaoe nosonia samba siʼoe, na iʼaboesi tõdõ? 28Ba ba noecha, ba hana wa miʼaboesi tõdõ? Mitõngõni ladari mbõhõ andrõ ba danõ, he wisa wanõinia, lõ mohalõw̃õ ia, lõ managoe. 29Ba oew̃aʼõ chõmi, lõ si manõ waʼasõchi noecha Zelomo, ba lachõminia andrõ fefoe, si mane noecha zi sara daʼõ. 30Ba na imanõ Lowalangi wamonoecha doeʼoe ba danõ, si so maʼõchṍ andre, nitiboʼõ ba galitõ mahemoloe, ba tenga mendroea manõ imanõ chõmi, jaʼami sambõ famati? 31Andrõ bõi miboesi dõdõmi ba bõi miw̃aʼõ: Ha maʼā? ma: ha mabadoe? ma: ha maʼonoecha? 32Aʼoi sa niʼaloei niha baero daʼõ fefoe; noʼa sa iʼila Amami andrõ, ba zoroego, wa sogoena chõmi daʼõ fefoe. 33Miʼofõnaiʼõ wangaloei banoea Lowalangi andrõ, awõ waʼatoelõ dõdõ andrõ chõnia, ba tebeʼe nõnõnõnõ dania chõmi daʼõ fefoe. (Loek. 10, 42; 12, 31). 34Andrõ bõi miʼaboesi tõdõ zogoena mahemoloe; mahemoloe tesõndra lala zaboe dõdõ mahemoloe. Noa manõ wamakao zi sarasara ngaloeo.
Currently Selected:
MATAIO FAZA 6.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.