MATAIO FAZA 5.
FAZA 5.
Hoehoeo Jesoe ba hili: I. Famahowoeʼo si sõchi boeaboea. II. Famarooe tõdõ nifahaõ. III. Famobawa lala satoelõ.
(Faz. 5, 5—7: Faigi gõi Loek. 6, 20—49)
1I. Ba me iʼila niha sato andrõ, ba mõi ia ba hili, ba me no moedadao ia, ba laʼondrasi ia nifahaõnia. 2Ba ibõrõtaigõ fahoehoeo, ifahaõ ira, imane: 3Jaʼahowoe zi noemana tõdõ, me chõra mbanoea zoroego andrõ. (Loek. 6, 20. Jes. 57, 15). 4Jaʼahowoe zebolo tõdõ, me jaʼira zochõ oeli danõ dania. (Sin. 126, 5. Kor. II. 7, 10). 5Jaʼahowoe zaboe tõdõ, me jaʼira nirara tõdõ dania. (Sin. 37, 11). 6Jaʼahowoe zolofo ba sowõchi tõdõ faʼatoelõ dõdõ andrõ, me jaʼira niʼaboesoiʼõ dania. (Loek. 6, 21. Joh. 6, 35). 7Jaʼahowoe zahachõ tõdõ, me jaʼira nihachõsi tõdõ dania. (F. 25, 35. b. t. Loek. 6, 36. Jak. 2, 13). 8Jaʼahowoe zohaoehaoe tõdõ, me jaʼira zangila Lowalangi dania. (Sin. 24, 3—5. Joh. I. 3, 2. 3). 9Jaʼahowoe zangatoelõʼõ niha, me jaʼira nofotõi ono Lowalangi dania. (Heb. 12, 14). 10Jaʼahowoe nigohi ba waʼatoelõ dõdõ andrõ, me chõra dania mbanoea zoroego andrõ. (Fet. I. 3, 14). 11Jaʼahowoe ami, na laʼoʼaja ami niha, ba na lagohi ami, ba na siw̃a mbalõ labõbõgõ chõmi si lõ sõchi, na bõrõ ndraʼo. (Loek. 6, 22, 23. Fet. I. 4, 14). 12Miʼomoesoiʼõ dõdõmi ba miʼowoeawoeaʼõ dõdõmi, me eboea loeomi ba zoroego. No si manõ gõi ira, wolohi samaʼeleʼõ andrõ, fõnami. (Jak. 5, 10. Hal. zin. 7, 52).
13II. Jaʼami nasio ba goeli danõ. Ba na taja waʼasiʼasi nasio, ba ha labeʼe fangasingasinia? Lõ goenania saʼae, hatõ fanibo jaʼia, fa lahoendrahoendra niha. (Mar. 9, 50. Loek. 14, 34. 35). 14Jaʼami haga ba niha ba goeli danõ. Tebai tobini mbanoea, si so ba hili jaw̃a. (Fil. 2, 15). 15Lõʼõ gõi tatoenoe wandroe ba tabaloegõ toemba jõoe, tabeʼe jaw̃a ba naha wandroe, ba ihagaini hadia ia, chõra fefoe, si so jomo. (Mar. 4, 21. Loek. 11, 33). 16Jasi manõ hagami andrõ, jahoemaga ba niha, enaʼõ laʼila mboeaboeami andrõ, si sõchi, ba enaʼõ lasoeno Namami andrõ, si so ba zoroego. (Fet. I. 2, 12).
17III. Bõi miw̃aʼõ tõdõmi, ba wowoeʼai oroisa, awõ zoera zamaʼeleʼõ andrõ, mõi ndraʼo; tenga ba wowoeʼai, ba woloʼõ oroisa mõi ndraʼo. (Rom. 3, 31). 18Si ndroehoe sa niw̃aʼõgoe chõmi, iroegi adoedoe mbanoea si jaw̃a, awõ danõ, ba lõ awoeʼa zamboea dandra zoera andrõ, ba he si samboea niti, ba goroisa andrõ, irege no ahori itõrõ. (Jes. 40, 8. Loek. 16, 17). 19Andrõ, na so zowoeʼai oroisa sambalõ, fondrege zideʼide, ba na imanõ wamahaõ niha, daʼõ nifotõi fondrege zideʼide ba mbanoea zoroego andrõ. Ba na so zoloʼõ jaʼia, ba na samahaõ niha ia, daʼõ nifotõi seboea ba mbanoea zoroego. (Jak. 2, 10. Dan. 12, 3). 20Oew̃a õ sa chõmi, na lõ arõoe tohoede waʼatoelõ dõdõmi, moroi ba waʼatoelõ dõdõ zangila amachoita andrõ, ba moroi ba waʼatoelõ dõdõ warizaio andrõ, ba tebai mõi ami ba mbanoea zoroego andrõ. (F. 23, 2. b. t. Loek. 18, 11. 12). 21No mirongo, wa no moew̃aʼõ chõ ndra toea: Bõi angeʼe; ba na so zangeʼe, ba gõna ia hoekoe. (Moz. II. 20, 13; 21, 12). 22Ba jaʼo, ba oew̃aʼõ chõmi: Fefoe, ha niha zofõnoe chõ dalifoesõnia, ba si gõna hoekoe; ba sangoemaʼõ chõ dalifoesõnia: ”sowõhõ mowa ndraʼoegõ”, ba nihoekoe ba rafe seboea andrõ, ba sangoemaʼõ ”sowõhõ ndraʼoegõ”, ba si gõna narako alitõ. (Jsh. 1. 3, 15). 23Andrõ, na õbeʼe gameʼelaoe ba naha wameʼe soemange, ba na itõrõ tõdõoe ba daʼõ so hadia ia zinegoe dalifoesõoe chõoe, (Mar. 11, 25) 24ba rõi ba daʼõ gameʼelaoe fõna naha wameʼe soemange, ba ae oea, ba atoelõʼõ ndraʼoegõ chõ dalifoesõoe, ba awena õfoeliʼõ, ba õbeʼe gameʼelaoe andrõ. (F. 6, 14). 25Taʼitaʼi foloʼõ chõ zi faʼoedoe chõoe, fatoea so ami ba lala, fa lõ ibeʼe ba danga zangoehoekoe andrõ ndraʼoegõ si faʼoedoe chõoe andrõ, ba ibeʼe ba danga wazoeri ndraʼoegõ sangoehoekoe ba tebeʼe ba goeroenga ndraʼoegõ. (F. 18, 34. 35. Loek. 12, 58. 59). 26Si ndroehoe niw̃aʼõgoe chõoe, lõ aefaʼõ ba daʼõ, na tosai zi sakefe õmõoe, si lõ moeboeʼa. 27No mirongo, wa no moew̃aʼõ: Bõi ohorõ! (Moz. II. 20, 14). 28Ba jaʼo, ba oew̃aʼõ, chõmi: Dozi, ha niha zamaigi ira alawe, wangisõ jaʼia, ba no ihorõni tõdõnia. (Job. 31, 1). 29Ba na iʼalani ndraʼoegõ hõrõoe kambõlõ, ba tema koë ia ba tiboʼõ. Mohareʼõ sa ba daʼõ, na tekiko ndrotondrotooe zamboea, moroi tetibo ba narako mbotooe maʼasamboea. (F. 18, 9. Mar. 9, 47. Gal. 5, 24). 30Ba na iʼalani ndraʼoegõ tangaoe kambõlõ, ba tema ew̃a ia ba tiboʼõ. Mohareʼõ sa ba daʼõ, na tekiko ndrotondrotooe zamboea moroi tetibo ba narako mbotooe maʼasamboea. (F. 18, 8. Mar. 9, 43). 31Ba no moew̃aʼõ: ”Na so zangefaʼõ ngambatõnia ba jamoebeʼe chõnia zoera wangefaʼõ”. (Mat. 19, 3—9. Moz. V. 24). 32Ba jaʼo, oew̃aʼõ chõmi: Dozi, ha niha zangefaʼõ ngambatõnia, na tenga horõ mbõrõ, ba samohorõ ngambatõnia daʼõ, ba sangowaloe niʼefaʼõ, ba sohorõ. (Loek. 16, 18. Kor. I. 7, 11). 33No mirongo gõi, wa no moew̃aʼõ chõ ndra toea: ”Bõi ae ba hõloe, na si lõ doehoe, ba õtõro chõ Zoʼaja ba zi mõiʼõ ba hõloe”. (Moz. III. 19, 12. Moz. IV. 30, 37). 34Ba jaʼo, ba oew̃aʼõ chõmi: Bõi manõ miʼae ba hõloe. Bõi mibeʼe hõloe mbanoea si jaw̃a, me no dadaoma Lowalangi. (Jes. 66, 1; F. 23, 16 b. t.). 35Ba bõi gõi tanõ, me no danedane gahenia, ba bõi gõi Jeroezalema andrõ, me no banoea razo seboea. (Sin. 48, 3). 36Bõi gõi beʼe hõloe hõgõoe, me sara mboe lõ õʼila õʼafoesiʼõ ba lõ õʼila õʼaitõni. 37Daʼõ wehedemi: Jaʼia, na jaʼia! ba: lõʼõ, na lõʼõ! Ba moroi ba Gafõcha zi tõra daʼõ. (Jak. 5, 12). 38No mirongo, wa no moew̃aʼõ: ”Hõrõ fangali hõrõ ba ifõ fangali nifõ.” (Moz. II. 21, 23. 24). 39Ba jaʼo, ba oew̃aʼõ chõmi: Bõi milaw̃a zi lõ sõchi andrõ. Ba na so zamalisi boʼõmõ kambõlõ, ba oroʼõ chõnia zi tambai gõi. (Loek. 6, 29. Amaed. 24, 29). 40Ba na so zangadoegõ jaʼoegõ, ba wangai baroemõ, ba loeloe chõnia lembe gõi. (Kor. I. 6, 7). 41Ba na so zamorege chõoe, ba wolohe jaʼoegõ awõnia ba lala zi saza faʼarõoe, ba ae awõnia zi doea za. 42Beʼe ba zangandrõ chõoe, ba bõi erogõ, na so zamalali chõoe hadia ia. (Moz. V. 15, 7, b. t. Loek. 6, 30. 34). 43No mirongo, wa no moew̃aʼõ: ”Omasiʼõ zahatõ chõoe, ba jafatioe dõdõoe ba zi fatioe tõdõ chõoe.” (Moz. III. 19, 18; 23, 3 b. t.). 44Ba jaʼo, ba oewaʼõ chõmi: Miʼomasiʼõ zi fatioe tõdõ chõmi ba miʼangandrõ, salahi zolohi jaʼami; (Amaed. 25, 21. 22. Loek. 6, 27 b. t. Loek. 23, 34. Hal. zin. 7, 60, Fet. I. 3, 9. Rom. 12, 14—20), 45enaʼõ tobali ono Namami andrõ, si so ba zoroego, ami, me ifatoemboeʼõ loeonia andrõ ba zi lõ sõchi ba ba zi sõchi, ba teoe andrõ chõnia, ba ibeʼe ba zatoelõ ba ba zi lõ atoelõ. (Loek. 6, 35. Efes. 5, 1). 46Na miʼomasiʼõ sa zomasi jaʼami, ba hadia loeomi? Tenga lamanõ gõi sanema beo andrõ? (Loek. 6, 32). 47Ba na ha talifoesõmi miʼowai, ba hadia zi sõchi nilaoemi? 48Tenga lamanõ gõi niha baero? Andrõ jamoʼahonoa ami, si mane faʼamoʼahonoa Namami andrõ ba zoroego. (Loek. 6, 36. Kol. 3, 15).
Currently Selected:
MATAIO FAZA 5.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.