MATAIO FAZA 4.
FAZA 4.
I. Itandraigõ Jesoe Afõcha. II. Mõi ba Galilaia Jesoe. III. Ikaoni nifahaõnia si fõfõna andrõ. IV. Mamahaõ ia ba mamadõhõ fõchõ.
(A. 4, 1—11: Mar. 1, 12. 13: Loek. 4, 1—13)
1I. Aefa daʼõ, ba iʼohe ba danõ si mate Jesoe Eheha, enaʼõ itandraigõ ia Afõcha. (Heb. 4, 15. Moz. I. 3). 2Ba me lõ si manga ia, õfa woeloe wongi waʼara, ba olofo ia, me aefa daʼõ. 3Ba mõi chõnia zanandraigõ andrõ, imane chõnia: Na ono Lowalangi ndraʼoegõ, ba w̃aʼõ, enaʼõ tobali roti gara andre. 4Ba itema linia, imane: ”Tenga ha ba gõnia aoeri niha, ba ngawalõ li fefoe, si otarai mbawa Lowalangi, aoeri ia”. (Moz. V. 8, 3). 5Ba iʼohe ia ba mbanoea niʼamoniʼõ andrõ Afõcha, ba mboemboe gosali ifaʼaso. 6Ba imane chõnia: Na ono Lowalangi ndraʼoegõ, ba tiboʼõgõ tooe, noa sa so ba zoera: ”Iw̃aʼõ ba malaʼika andrõ chõnia dania, ba chõmõ andrõ, ba lataja tangara ndraʼoegõ, fa lõ manendre gaheoe ba gara.” (Sin. 91, 11 b. t.). 7Imane chõnia Jesoe: So gõi ba zoera: ”Bõi tandraigõ Zoʼaja, Lowalangioe.” (Moz. V. 6, 16). 8Ba iʼohe zoei ia Afõcha, ifasao ba hili salaw̃a sibai, iʼoromaʼõ chõnia mbanoea ba goeli danõ fefoe, awõ lachõminia, 9ba imane chõnia: Ahori oebeʼe chõoe daʼõ, na õtoehi danõ, ba wangaloeloe chõgoe. 10Ba imane chõnia Jesoe: Betaʼõgõ Satana! Noa sa so ba zoera: ”Chõ Zoʼaja, Lowalangioe, mangaloeloe ndraʼoegõ ba ha jaʼia õfosoemange”. (Moz. V. 6, 13. Fam. 22, 8. 9). 11Awena irõi ia Afõcha, ba hiza, ba la ondrasi ia malaʼika, mõr ira ngoningoninia. (Heb. 1, 14).
(A. 4, 12—17: Mar. 1, 14. 15: Loek. 4, 14. 15)
12II Ba me irongo Jesoe, no tekoeroe Johane, ba ifoeli ia ba Galilaia. (F. 14, 3. Loek. 4, 14. 15). 13Ba iheta ia ba Nazareta, mõi ia fatewoe ba Gafanaoema, ba zinga mbaw̃a nidanõ andrõ, ba danõ mado Nafetali, ba ngai mado Zeboeloni. (Loek. 4, 16—31). 14Enaʼõ itõrõ niw̃aʼo Jesaja, samaʼeleʼõ andrõ, me imane: 15”Tanõ Ndraono Zeboeloni ba tanõ Ndraono Nafetali, tanõ ba zinga mbaw̃a, jefo Joridano. Galilaia niha baero andrõ, niha andrõ, 16sidadao ba zogõmigõmi, ba no laʼila haga seboea, ba no toemboe haga ba zidadao ba danõ waʼamate ba ba loemõ waʼamate.” (Jes. 9, 1. 2). 17Iʼotarai daʼõ, ba ibõrõtaigõ mangombacha Jesoe, imane: Mifalalini geraʼerami, noa saʼae ahatõ mbanoea zoroego andrõ! (F. 3, 2).
(A. 4, 18—22: Mar. 1, 16—20: Loek. 5, 1—11)
18III. Ba me mowaõwaõ ia ba zinga mbaw̃a Galilaia andrõ, ba iʼila niha, si fatalifoesõ, Simoni, nifotõi Fetero ba Andrea talifoesõnia, lalaoe giri ba mbaw̃a, me no toeka giri ira. (Joh. 1, 35 b. t.). 19Ba imane chõra: Miʼoʼõ ndraʼo, ba oebaliʼõ samaʼoeʼoe niha ami. 20Ba iʼanemaʼõ larõi giri, ba laʼoʼõ ia. (F. 19, 27). 21Ba me mofanõ ia ba daʼõ, ba iʼila dánõ bõʼõ, daroea zoei, si fatalifoesõ gõi, Jakobo, ono Zebedaio ba Johane, talifoesõnia, no so ba doendraha, awõ namara Sebedaio, mamõnõ kirira. Ba hoemede ia chõra. 22Ba laʼanemaʼõ larõi doendraha, awõ namara, ba laʼoʼõ ia.
23IV. Ba itõrõi danõ Galilaia maʼafefoe, mamahaõ ia ba zekola chõra ba manoeriagõ toeria somoeso dõdõ, toeria mbanoea Lowalangi andrõ, ba ifadõhõ ngawalõ wõchõ fefoe, awõ ngawalõ waʼatebai, ba niha. (F. 9, 35. Hal. zin. 10, 38). 24Ba hoemõngõ doeriania ba danõ Ziria maʼasagõrõ. Ba laʼohe chõnia fefoe zofõchõ, hadia ia ngawalõ wõchõ, ma hadia ia zafõchõ chõra, awõ zobechoe, awõ zaniri, awõ zi no mate dambai, ba ifadõhõ. (Mar. 3, 7, b. t.). 25Ba ato zoloʼõ jaʼia banoea Galilaia, ba si foeloe banoea, ba banoea Jeroezalema, ba banoea Joedaia, ba banoea jefo Joridano andrõ. (Loek. 6, 17, b. t.).
Currently Selected:
MATAIO FAZA 4.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.