MATAIO FAZA 27.
FAZA 27.
I. Laʼohe chõ Wilato Jesoe. II. Faʼamate Joeda. III. Laʼetoeʼõ hoekoe Jesoe. IV. Laʼoʼaja. V. Laforõfa. VI. Mate ia. VII. Lakoʼo. VIII. Latarogõ lewatõ.
1I. Ba me no moloeo, ba mamagõlõ ndra ere seboea fefoe, awõ zatoea mbanoea andrõ, ba chõ Jesoe, ba wamoenoe jaʼia. (Mar. 15, 1. Loek. 22, 66—71). 2Ba labõbõ ia, laʼohe, labeʼe ba danga goemandroe, Filato. (F. 20. 19. Loek. 23. Joh. 18, 28).
3II. Ba me iʼila Joeda andrõ, si no manga mbõlinia, laʼetoeʼõ hoekoe, ba mangesa dõdõnia; ba ifoeli zi tõloe ngafoeloe roefia, ba gere seboea ba ba zatoea mbanoea andrõ, 4imane: Horõgoe, me no oeʼā mbõli ndro zi lõ horõ. Ba lamane: Hana wa õfoeli, chõma? Faigi, he õwisa. 5Ba itiboʼõ ba gosali roefia andrõ ilaoe mofanõ, mõi ia moehie mbaginia. (Hal. zin. 1, 18). 6Ba lahalõ roefia andrõ ira ere seboea, lamane: Lõ tola tabeʼe ba naha gameʼela, me bõli ndro. 7Ba mamagõ õ ira, ba labeʼe bõli mbenoea zamõzi bowoa andrõ, nibeʼe lewatõ zikoli. 8Andrõ labeʼe tõi mbenoea andrõ mbenoea ndro, iroegi maʼõchõ andre. (Hal. zin. 1, 19). 9Ba daʼõ itṍrõ niw̃aʼõ Jeremia andrõ, samaʼeleʼõ, me imane: ”Ba lahalõ zi tõloe ngafoeloe roefia andrõ, bõli nifatõ bõli andrõ, nifatõ Ndraono Gizeraëli bõli, (Sach. 11, 13) 10ba labeʼe bõli mbenoea zamõzi bowoa andrõ; oeʼoʼõ niw̃aʼõ Zoʼaja chõgoe.”
(A. 27, 11—26: Mar. 15, 2—15: Loek. 23, 2—4. 17—25: Joh. 18, 33—40)
11III. Ba fõna goemandroe so Jesoe. Ba isofoe chõnia koemandroe, imane: Hadia, razo niha Jehoeda ndraʼoegõ? Ba imane Jesoe: Jaʼia niw̃aʼõoe. 12Ba me laʼadoegõ ia ere seboea ba satoea mbanoea andrõ, ba lõʼõ manõ itema li. (F. 26, 63). 13Ba imane chõnia Filato: Hadia, lõ õrongo, hadia ia fefoe, wangadoegõra jaʼoegõ? 14Ba lõ itema linia, samboea li lõʼõ, tõbali ahõlihõli sibai dõdõ goemandroe. 15Ba no moebõwõgõ, ero na owasa ibeʼe aefa koemandroe ba zato zamõsa nikoeroe, ha niha zomasi ira. 16Ba so chõra nikoeroe, safaito, me loeo daʼõ, Baraba dõinia. 17Ba me owoelo ira, ba imane chõra Filato: Ha niha zomasi ami, oeʼefaʼõ chõmi, Baraba andrõ, ba ma Jesoe andrõ, nifotõi Keriso? 18Noa sa iʼila, bõrõ waʼafõchõ dõdõ, wa labeʼe ia ba dangania. 19Ba me doemadao ia ba dadaoma zangoehoekoe, ba ifatenge chõnia foʼomonia, imane: Bõi babaja niha satoelõ andrõ, noa sa tefakao sibai ndraʼo, ba chõnia andrõ, ba wangifi me owi. 20Ba lafaweʼe zato ira, ere seboea ba satoea mbanoea andrõ, enaʼõ laʼandrõ Mbaraba andrõ, ba enaʼõ lafakiko Jesoe. (Hal. zin. 3, 13. 14). 21Ba hoemede koemandroe, imane chõra: Ha niha zomasi ami oeʼefaʼõ chõmi, ba zi daroea andrõ? Ba lamane: Baraba andrõ. 22Imane chõra Filato: Ba he oewisa chõ Jesoe andrõ, nifotõi Keriso? 23Lamane fefoe: Niforõfa! Ba imane: Ba hadia horõnia? Ba monõnõ weʼaora, lamane: Niforõfa! 24Ba me iʼila Filato, lõʼõ manõ mana ndrõsa, ba tedooe manõ wagoeagoeasa, ba ihalõ nidanõ, isasai dangania, fõna zato, imane: Lõ horõgoe ba ndro daʼe; mifaigi he miwisa. (Moz. V. 21, 6 b. t. Sin. 26, 6). 25Ba latema linia niha sato fefoe, lamane: Jamõi ba hoeloema ndronia ba ba hoeloe ndraonoma. (F. 23, 35. Hal. zin. 5, 28). 26Ba aefa daʼõ, ba iʼefaʼõ chõra Mbaraba andrõ, ba Jesoe, ba ifabõziʼõ ba ibeʼe niforõfa.
(A. 27, 27—30: Mar. 15, 16—19: Joh. 19, 1—3)
27IV. Ba laʼohe ba gõdo Jesoe saradadoe goemandroe andrõ, ba laʼowoeloi chõnia zi sabari andrõ fefoe. 28Ba laheta chõnia noechania, ba lafobaroe ia baroe loeo sojo. 29Ba lalalaoe dakoela doi ba lafotakoela ia ba sara zoechoe labeʼe ba dangania kambõlõ, ba latoehi danõ fõnania, laʼoʼaja ia, lamane: Jaʼoegõ, razo niha Jehoeda? 30Ba ladidiloi ia, lahalõ zoechoe no mege, ba lahareʼõ ba hõgõnia.
(A. 27, 31—44: Mar. 15, 20—32: Loek. 23, 26. 33—39: Joh. 19, 16—24)
31V. Ba me no aefa laʼoʼaja ia, ba laheta chõnia mbaroe loeo andrõ, ba lafonoecha ia noechania, ba laʼohe ia misa, ba wamorõfa jaʼia. 32Ba me mõi ira baero, ba faloecha ira niha, banoea Girene, Simoni dõinia, ba laraʼoe daʼõ, ba wolohe rõfania. (Heb. 13, 12. 13). 33Ba me laroegi naha andrõ, sotõi Gologota — 34sokamoeʼoe geloeaha — ba lafabadoegõ chõnia nagoe nifaroeka awõchoe, ba me no itandra, ba lõ edõna ibadoe. (Sin. 69, 22. Amaed. 31, 6). 35Ba me no laforõta ia, ba lafosasi noechania, fadahõdahõ ira. (Sin. 22, 19). 36Ba doemadao ira, manaro jaʼia ba daʼõ. 37Ba labeʼe jaw̃a hõgõnia mbõrõ waʼamatenia, soera: ”Jesoe daʼe, razo niha Jehoeda.” 38Ba laforõfa awõnia zamaraʼoe, daroea, samõsa ba gambõlõ ba samõsa ba gabera. (Loek. 23, 32. Jes. 53, 12). 39Ba latandrawaisi ia sanõrõ, lafalichõ ira, (Sin. 22, 8), 40ba lamane: He sanoedoegõ osali andrõ, ba sangotomosi jaʼia, si ha tõloe ngaloeo, orifi ndraʼoegõ, na Ono Lowalangi ndraʼoegõ; ba ae tooe moroi ba rõfa andrõ! (F. 26, 61; 4, 3. 6). 41Si manõ gõi ndra ere seboea, laʼoʼaja ia, awõ zangila amachoita awõ zatoea mbanoea andrõ, lamane: 42Niha bõʼõ, ba no iʼorifi, ba tebai iʼorifi ia. Razo Ndraono Gizeraëli ia, jamõi tooe iadaʼe moroi ba rõfa, ba mamati saʼae ita chõuia. 43No fadoehoe dõdõnia chõ Lowalangi, ba jamoeʼefaʼõ ia daʼõ iadaʼe, na iʼomasiʼõ ia: noa sa iw̃aʼõ: Ono Lowalangi ndraʼo. (Sin. 22, 9). 44Ba si manõ gõi zamaraʼoe andrõ, niforõfa awõnia, wanandraw̃aisi jaʼia.
(A. 27, 45—56: Mar. 15, 33—41: Loek. 23, 44—49: Joh. 19, 28—30)
45VI. Ba iʼotarai laloeo, ba tobali ogõmigõmi ba danõ maʼasagõrõ, iroegi labõzi tṍloe. 46Ba so labõzi tõloe, ba moeʼao Jesoe, eboea li, imane: Eli! Eli! lema sabachtani? He Lowalangigoe! He Lowalangigoe! hana wa no õʼerogõ ndraʼo? geloeahania. (Sin. 22, 2). 47Ba lamane õsa, si so ba daʼõ, me larongo daʼõ: Mogaoni Elija daʼõ. (F. 17, 10). 48Ba iʼanemaʼõ fagohi zamõsa chõra, ihalõ rabo, ifoʼõsi niro aisõ, ibeʼe ba mbalõ zoechoe ba ifabadoegõ chõnia. 49Ba lamane tánõ bõʼõ: Bõi oea! datafaigi, na mõi Gelija, ba wangorifi jaʼia. 50Ba ifoeli moeʼao Jesoe, eboea li, ba aetoe noso. 51Ba hiza, asika mbaʼabaʼa andrõ ba gosali, fabali, iʼotarai si jaw̃a, noemalõ mitooe, ba modoeroe danõ, fabali gara, (Moz. II. 26, 31. Heb. 10, 19. 20) 52ba teboka lewatõ ba oja zi maoso boto niha niʼamoniʼõ, si no mate, larõi lewatõ, 53me no aefa maoso Jesoe, mõi ira ba mba noea niʼamoniʼõ andrõ, ato zangila jaʼira. 54Ba me laʼila ira koemandra andrõ ba awõnia sanaro Jesoe, ndroeroe danõ andrõ ba hadia ia fefoe, ba ataʼoe sibai ira, lamane: Doehoe, Ono Lowalangi daʼõ. 55Ba ato zi so ba daʼõ ira alawe, samaigimaigi, moroi ba zarõoe, si no moloʼõ Jesoe, moroi ba Galilaia, si no mõi ngoningoninia; 56ira Maria, banoea Magadala, ba Maria ina ndra Jakobo Josefo, ba ina nono Zebedaio andrõ.
(A. 27, 57—61: Mar. 15, 42—47: Loek. 23, 50—55: Joh. 19, 38—42)
57VII. Ba mafi owi, ba so niha soʼanaʼa banoea Garimatia, Josefo dõinia, si no mõi nifahaõ Jesoe gõi. 58Daʼõ zi mõi chõ Wilato, mangandrõ boto Jesoe andrõ. Ba iʼoroiʼõ Filato labeʼe (Moz. V. 21. 23). 59Ba ihalõ mboto Josefo, iʼolohoeni moeko si sõchi, 60ba ibeʼe ba lewatõ si bohooe chõnia, nifacharoeʼõnia ba gara, ba ifagaõlõ gowe seboea ba mbawa lewatõ andrõ, ba mofanõ ia. (Jes. 53, 9). 61Ba so ba daʼõ Maria andrõ, banoea Magadala ba Maria si samboea andrõ, doemadao ira ba gamaoedoe lewatõ.
62VIII. Ba sara wongi aefa daʼõ, me no aefa loeo wangehao andrõ, ba faloecha ndra ere seboea ba farizaio, chõ Wilato, (Joh. 19, 14), 63lamane: He Toea, no itõrõ tõdõma, wa no iw̃aʼõ samaeloengoe andrõ, me lõ si mate ia na: Na aefa tõloe ngaloeo, ba maoso ndraʼo; (F. 16, 21; 17, 23) 64andrõ oroiʼõ, enaʼõ latarogõ lewatõ, irege tõloe ngaloeo, fa bõi mõi nifahaõnia andrõ managõ jaʼia, ba ma lamane dania ba niha: No maoso ia moroi ba ngai zi mate, ba tobali abõlõbõlõ wamaeloengoe safoeria andrõ, moroi ba zi fõfõna. 65Imane chõra Filato: Labeʼe chõmi zanaro; miʼaeʼe, mihaogõ wanaro. 66Ba mõi ira, lafotandro gowe ba lafatarogõʼõ lewatõ ba zanaro no mege.
Currently Selected:
MATAIO FAZA 27.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.