MATAIO FAZA 28.
FAZA 28.
I. Femaoso Jesoe. II. Laʼa ganaʼa sanaro andrõ. III. Iʼangonasi nifahaõnia Jesoe.
(A. 28, 1—8: Mar. 16, 1. 2. 5—8: Loek. 24, 5—9)
1I. Ba ba zi bongi, me no aefa loeo sabato, me aracha moloeo loeo migoe, ba mõi Maria andrõ, banoea Magadala, awõ Maria si samboea andrõ, mamaigi lewatõ. (Joh. 20, 1). 2Ba hiza ziheoe sabõlõbõlõ. No mõi tooe malaʼika Zoʼaja, moroi ba zoroego, mõi ia mameta gowe andrõ, ba idadaoni. 3Ba hoelõ gari mbanoea wamaigira jaʼia, ba baroenia, ba no afoesi, hoelõ mbetoea. (Hal. zin. 1, 10). 4Ba manizinizi zanaro andrõ, faʼataʼoera ia bo tobali hoelõ zi mate ira. 5Ba hoemede malaʼika andrõ, imane ba ndra alawe andrõ: Bõi miʼataʼoefi! oeʼila sa, miʼaloei Jesoe andrõ, niforõfa. 6Lõ jaʼia ba daʼe; noa sa maoso ia, itõrõ niw̃aʼõnia; miʼae mifaigi naha andrõ, ba zi so ia mege. (F. 12, 40; 16, 21). 7Ba mitaʼitaʼi, miʼae miw̃aʼõ chõ ndra nifahaõnia, wa no maoso ia moria ba ngai zi mate, ba hiza, mowaõwaõ ia ba Galilaia, ba daʼõ miʼila ia dania. 8Hiza, no oew̃aʼõ chõmi. Ba laʼaiioʼõ ira, larõi lewatõ, ataʼoe ira, ba omoeso sibai dõdõra, fagohi ira, ba wangombacha ba nifahaõnia. 9Ba hiza, faloecha ira Jesoe, ba imane chõra: Jaʼami! Ba laʼondrasi ia, laraʼoe gahenia, latoehi danõ fõnania. (Sal. II. 4, 27). 10Ba imane chõra Jesoe: Bõi miʼataʼoefi, miʼae miw̃aʼõ ba dalifoesõgoe, enaʼõ mõi ira ba Galilaia, ba ba daʼõ laʼilado dania. (Joh. 20, 17).
11II. Ba me mõi ira, ba hiza zanaro õsa, mõi ira mijomo ba mbanoea, ba laʼombachaʼõ daʼõ no mege fefoe chõ ndra ere seboea. 12Ba faloecha ira, awõ zatoea mbanoea andrõ, mamagõlõ ira, ba labeʼe ganaʼa sabõnõ ba zaradadoe andrõ, lamane: 13Mimane: No mõi ndra nifahaõni andrõ, ba zi bongi, no latagõ ia, me no alaoe hõrõma. (F. 27, 64). 14Ba na terongo chõ goemandroe, ba jaʼaga zi honogõ jaʼia, ba lõ mabeʼe aboe dõdõmi. 15Ba lahalõ ganaʼa andrõ, laʼoʼõ niw̃aʼõ chõra. Ba si manõ doeria andrõ, ba Niha Jehoeda, iroegi maʼõchõ andre.
16III. Ba mõi ba Galilaia nifahaõ andrõ, si felezara, ba hili andrõ, niw̃aʼõ Jesoe chõra. (F. 26, 32; 28, 7). 17Ba me laʼila ia, ba latoehi danõ; ba so zanoefa tõdõ õsa. (Loek. 24, 11). 18Ba iʼondrasi ira Jesoe, hoemede ia chõra, imane: Fefoe waʼabõlõ andrõ ba zoroego ba ba goeli danõ, ba no moebeʼe chõgoe. (F. 11, 27. Loek. 10, 22. Joh. 13, 3. Fil. 2, 9 b. t.). 19Miʼaeʼe, mibaliʼõ nifahaõ fefoe soi, wamajagõ idanõ jaʼira ba dõi Nama ba ba dõi Nono ba ba dõi Geheha niʼamoniʼõ; (Mar. 16, 15. 16; 16. Hal. zin. 1, 8) 20mifahaõ ira ba woloʼõ fefoe hadia ia niw̃aʼõgoe chõmi. Ba hiza, fao chõmi ndraʼo, ero maʼõchõ, iroegi gamozoea gõtõ danõ andrõ. (F. 18, 20. Joh. 14, 18).
Currently Selected:
MATAIO FAZA 28.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.