MATAIO FAZA 26.
FAZA 26.
I. Famagõlõ gere, ba wamoenoe Jesoe. II. Tebajoini Jesoe, ba Mbetania. III. Iʼombachaʼõ zi manga mbõlinia. IV. Iʼoroiʼõ wemanga niʼamoniʼõ andrõ. V. Mangandrõ Jesoe ba kaboe Gezemane. VI. Laraʼoe ia. VII. Teʼetoeʼõ hoekoenia ba rafe seboea andrõ. VIII. Iʼosilõʼõgõ Jesoe Fetero.
(A. 26, 1—5: Mar. 14, 1. 2: Loek. 22, 1. 2)
1I. Ba me no iʼoʼozoei Jesoe hoehoeonia andrõ fefoe, ba imane chõ ndra nifahaõnia: 2Miʼila, doea wongi tõ wasa, ba tebeʼe ba danga niha Nono Niha, ba wamorõfa jaʼia. (Joh. 13, 1). 3Ba faloecha ndra ere seboea ba satoea mbanoea, baolajama gere seboea andrõ, sotõi Kajafa. (Joh. 11, 47 b. t.). 4Ba mamagõlõ ira, enaʼõ laʼonechesi wondraʼoe Jesoe, ba wamoenoe jaʼia. 5Ba lamane: Bõi ba gowasa, fa lõ aechoe niha.
(A. 26, 6—13: Mar. 14, 3—9: Joh. 12, 1—8)
6II. Ba me so ba Mbetania Jesoe, ba nomo Zimoni andrõ, sobooe aoeri, ba iʼondrasi ia ira alawe, 7so chõnia zamba boeliboeli wanicha samohoea, seboea bõli, ba ifadoewa ba hõgõ Jesoe, me manga ia. 8Ba me laʼila daʼõ nifahaõ, ba koemõkõkõkõ ira, lamane: Hadia wa laʼalimagõsi? 9Tola sa laʼamawa menaʼõ, eboea mbõli, ba labeʼe ba zi noemana menaʼõ. 10Ba me iʼila daʼõ Jesoe, ba imane chõra: Hadia wa miboesi dõdõ ndra alawe andre? si sõchi sa nilaoenia chõgoe. 11Lõʼõ sa mamalõmalõ chõmi zi noemana, ba jaʼodo, ba tenga si lõ mamalõmalõ chõmi. 12Ba wangehao jaʼo, ba wogoʼo jaʼo, ilaoe ba nõsigoe wanicha andre. 13Si ndroehoe niw̃aʼõgoe chõmi, fefoe gofoe heza, ba nitoeriagõ toeria somoeso dõdõ andrõ, ba goeli danõ maʼasagõro, ba daʼõ gõi teʼombachaʼõ nilaoe daʼe, ba wanõrõ tõdõ jaʼia. (F. 24, 14).
(A. 26, 14—16: Mar. 14, 10. 11: Loek. 22, 3—6)
14Ba mõi zi samõsa, awõ zi felendroea, si so tõi Joeda, banoea Kariota, isaw̃a gere seboea, imane: 15Ha waʼeboea mibeʼe chõgoe, ba oeʼombachaʼõ ia chõmi? Ba latoelo chõnia zi tõloe ngafoeloe roefia. (Sach. 11, 12. Moz. II. 21, 32. F. 27, 9). 16Ba iʼotarai daʼõ, ba iʼaloei lala, ba wangombacha jaʼia. (Tim. I. 6, 9. 10).
(A. 26, 17—20: Mar. 14, 12—16: Loek. 22, 7—18)
17III. Ba me baw̃a roti si lõ moeʼaisõni, si fõfõna, ba mõi chõ Jesoe ndra nifahaõ, lamane: Hezo zomasiʼõ maʼasiwai chõoe, ba wemanga wasa? (Moz. II. 12, 3 b. t.). 18Ba imame: Miʼae mijomo ba mbanoea, chõ zane, ba mimane chõnia: Daʼõ niw̃aʼõ zamahaõ chõoe: No ahatõ ginõtõ andrõ chõgoe; ba chõoe oeʼā wasa, awõ ndra nifahaõgoe. 19Ba laʼoʼõ nifahaõ andrõ niw̃aʼõ Jesoe chõra, ba laʼasiwai wasa andrõ. 20Ba me bongi saʼae, ba mõi ia manga, awõ zi felendroea andrõ.
(A. 26, 21—25: Mar. 14, 18—21: Loek. 22, 21—23)
21Ba me manga ira, ba imane: Si ndroehoe niw̃aʼõgoe chõmi, fasamõsa ami zi manga mbõligoe. (Joh. 13, 21 b. t.). 22Ba aboe sibai dõdõra, ba labõrõtaigõ lamane chõnia, dozi ira: Hadia, jaʼodo, Toea? 23Ba itema lira, imane: Si faloeloe manga chõgoe, daʼõ zi manga mbõligoe. (Sin. 41, 10. Joh. 13, 18. 26). 24Mõi sa Nono Niha, itõrõ nisoera andrõ ba chõnia, ba alai niha andrõ, si manga mbõli Nono Niha: mohare menaʼõ niha andrõ, na lõ irai toemboe. (Sin. 22. Jes. 53. Loek. 22, 19. 20). 25Ba itema linia Joeda andrõ, si manga mbõlinia, imane chõnia: Ma jaʼodo, samahaõ? Ba imane chõnia: Jaʼia niw̃aʼõoe.
(A. 26, 26—29: Mar. 14, 22—25: Loek. 22, 19. 20: Kor. I. 11, 23 b. t.)
26IV. Ba me manga ira, ba ihalõ roti Jesoe, ifahowoeʼõ, iboboto ba ibeʼe chõ ndra nifahaõ ba imane: Mitema, miʼa, botogoe daʼe. 27Ba ihalõ mako, iʼaohasi gõlõ Lowalangi, ibeʼe chõra ba imane: 28Mibadoe, dozi ami, dogoe sa daʼe, do gamaboeʼoela li andrõ, sadoewa dania saiahi zato, ba wangefaʼõ horõ. (Mat. 20, 28. Moz. II. 24, 8. Jer. 31, 31 b. t.). 29Ba oew̃aʼõ chõmi, lõʼõ saʼae oebadoe nõsi mboea nagoe andrõ, iʼotarai daʼe, iroegi loeo wamadoegoe si bohooenia, ba mbanoea Namagoe andrõ, aw̃omi. (Loek. 22, 18. 29. 30).
(A. 26, 30—35: Mar. 14, 26—31)
30V. Ba me no aefa manoenõ ira, ba mõi ira baero ba gahe hili wanicha andrõ. (Loek. 21, 37; 22, 39). 31Ba imane chõra Jesoe: Dozi teʼala ami ba chõgoe bongi andre. Noa sa so ba zoera: ”Oebago dania goebalo andrõ, ba moezaewe mbiribiri andrõ, nikoebaloi.” (Sach. 13, 7. Joh. 16, 32). 32Ba na aefa maoso ndraʼo, ba mowaõwaõdo ba Galilaia, fõnami. (F. 28, 7. 16). 33Ba itema linia Fetero, imane chõnia: Ba he dozi teʼala ira ba chõoe, ba jaʼo, ba tebai teʼala. (Loek. 22, 33 b. t.). 34Imane chõnia Jesoe: Si ndroehoe niw̃aʼõgoe chõoe, bongi andre, lõ fachamõ miw̃o zilatao, ba no medõloe õʼosilõʼõgõ ndraʼo. (Joh. 13, 38). 35Imane chõnia Fetero: Ba he mate enaʼõ ndraʼo, awõoe, ba lõ oeʼosilõʼõgõ ndraʼoegõ. Ba si manõ wangoemaʼõ ndra nifahaõ fefoe.
(A. 26, 36—46: Mar. 14, 32—42: Loek. 22, 40—46)
36Ba iroegi Jesoe halama, Gezemane dõinia, fao ira chõnia. Ba imane chõ ndra nifahaõ: Midadao ba daʼe, fatoea mõido ba daʼõ, ba wangandrõ. 37Ba iʼohe awõnia Wetero, ba ono Zebedaio andrõ, si daroea, ba ibõrõtaigõ aboe dõdõ ba alangoe dõdõ. (F. 17, 1. Jes. 53, 7). 38Ba imane chõra: Aboe sibai dõdõgoe, iroegi waʼamate; miʼiagõ daʼe, bõi mifõrõ, awõgoe. 39Ba mõi ia, lõ arõoe, ifalõgoe ia tooe, mangandrõ ia, imane: He Ama, na so lala, ba jamoetaloeʼi ndraʼo mako andrõ. Ba bõi somasi ndraʼo, ha somasi ndraʼoegõ. (F. 20, 22. Joh. 5, 7. 8). 40Ba mõi ia chõ ndra nifahaõ andrõ, ba no mõrõ ira, me iroegi, ba imane chõ Wetero: Ba tebai si lõ mõrõ ami mato saza, awõgoe? 41Bõi mifõrõ, ba miangandrõ, fa lõ itõrõ ami fanandraigõ. Aoha sa gõlõ dõdõ, ba no sambõ faʼabõlõ nõsi. (Fet. I. 5, 8. Gal. 5, 17). 42Ba ifoeli mõi, zamoeza tõ, mangandrõ ia, imane: He Amagoe! na teʼai italoeʼi ndraʼo, fa lõ oebadoe ia, ba jaʼitõrõ zomasi ndraʼoegõ. 43Ba me ifoeli ia ba noa zoei mõrõ ira, me iroegi, noa sa aboea goeli hõrõra. 44Ba irõi ira, ifoeli mõi mangandrõ, no medõloe, si manõmanõ linia. 45Aefa daʼõ, ba mõi ia chõ ndra nifahaõ andrõ, ba imane chõra: Ba mifõrõ saʼae, ba miʼolombase! — Hiza, no fadege, fa tebeʼe ba danga niha si so horõ Nono Niha. 46Mifaoso, talaboe, hiza no ahatõ zi manga mbõligoe andrõ.
(A. 26, 47—57: Mar. 14, 43—50: Loek. 22, 47—53: Joh. 18, 3—12)
47VI. Ba me hoemede ia na, ba hiza Joeda andrõ, awõ zi felendroea, ba ato zi fao chõnia; so wõda ba bago gama, laʼotarai gere seboea ba satoea mbanoea andrõ. 48Ba no iw̃aʼõ chõra dandra si manga mbõlinia andrõ, no imane: Si faʼago bawa ndraʼo, daʼõ ia, daʼõ miraʼoe. 49Ba iʼanemaʼõ iʼondrasi Jesoe, imane: He samahaõ? ba faʼago bawa ia chõnia. 50Ba imane chõnia Jesoe: He le, hadia, wa so ndraʼoegõ? Awena laʼondrasi, lababaja Jesoe, laraʼoe. 51Ba hiza, itoejoe wõdania si samõsa, awõ Jesoe, isõbi, ihareʼõ chõ zawoejoe gere seboea, iʼew̃a dalingania, si samboea. 52Ba imane chõnia Jesoe: Saemboegõ wõdamõ! Dozi sa sangai fõda, ba fõda wamoenoera. (Moz. I. 9, 6. Rom. 13, 4). 53Ma owai tebai mangandrõ ndraʼo chõ Namagoe, enaʼõ ifatenge awõgoe iadaʼe malaʼika, tõra felendroea legio? 54Ba he wisa itõrõ ba daʼõ niw̃aʼõ ba zoera? Lõ tola lõʼõ, si manõ lala. (Loek. 24, 44). 55Ba daʼõ iw̃aʼõ Jesoe ba zato andrõ: Hoelõ ba zamaraʼoe mõi ami, no mofõda ami ba mobago gama, ba wondraʼoe jaʼo. Ba no ero maʼõchõ moedadao ndraʼo ba gosali, mamahaõ, ba lõ niraʼoemi jaʼo. (Joh. 18, 20). 56Ba andrõ si manõ daʼõ fefoe, enaʼõ itõrõ zi so ba zoera zamaʼeleʼõ andrõ. Ba larõi ia nifahaõ fefoe, moloi. (Sin. 88, 9).
(A. 26, 67—68: Mar. 14, 53—65: Loek. 22, 54. 63—71: Joh. 18, 12—14. 24)
57VII. Ba laʼohe Jesoe sondraʼoe jaʼia andrõ, laʼohe chõ gere seboea andrõ, Kajafa, ba zi faloecha zangila amachoita ba satoea mbanoea andrõ. 58Ba iʼoʼõ Fetero, arõoe moroi foeri, iroegi golajama gere seboea andrõ, ba mõi ia bacha, doemadao ia ba ngai genoni, ba wamaigi loealoea. 59Ba laʼaloei ere seboea ba salaw̃a rafe seboea andrõ fefoe, he lawisa wamõbõgõ horõ chõ Jesoe, ba wamoenoe jaʼia, (Hal. zin. 6, 13), 60ba lõ lasõndra, he w̃aʼae ato zi so samõbõgõ, sofaja. Ba ba gafoeriata, ba daroea zi so, (Sin. 35, 11; 100, 2. Moz. V. 19. 15), 61lamane: No iw̃aʼõ daʼõ: Oeʼila oedoedoegõ gosali Lowalangi andrõ, ba ha tõloe ngaloeo oeʼangotomosiʼõ. (F. 27, 40. Joh. 2, 10). 62Ba maoso gere seboea, imane chõnia: Hadia, lõ õtema li ba nibõbõgõ daʼe chõoe? 63Ba lõ hedehede Jesoe. Ba hoemede gere seboea, imane chõnia: Oebeʼe ba hõloe ndraʼoegõ, chõ Lowalangi saoeri andrõ, enaʼõ õw̃aʼõ chõma, na Keriso andrõ ndraʼoegõ, Ono Lowalangi. 64Imane chõnia Jesoe: Jaʼia niw̃a õoe. Ono Lowalangi ndraʼodo. Ba oew̃aʼõ chõmi, iʼotarai daʼe, ba miʼila, doemadao Nono Niha ba gambõlõ waʼabõlo andrõ, ba miʼila so ia moroi sa, ba dete lawoeo, ba mbanoea si jaw̃a. (Dan. 7, 13. Hal. zin. 7, 55). 65Awena isika noechania ere seboea, imane: No mangaohangaoha ia! Hadia goena zi so ba mbõrõ saʼae chõda? hiza, faefá mirongo wangaohangaoha andrõ. (Joh. 10, 33 b. t.). 66He wisa ba dõdõmi? Ba latema linia, lamane: Hoekoe tamoenoe hoekoenia. (Moz. III. 24, 16. Joh. 19, 7). 67Ba ladidiloi mbawania, lagoechoei ia, ba so gõi zamalisi bawania (Jes. 50, 6), 68lamane: Faʼeleʼõ chõma, Keriso, ha niha zamõsi jaʼoegõ?
(A. 26, 69—75: Mar. 14, 66—72: Loek. 22, 55—62: Joh. 18, 16—18. 25—27)
69VIII. Ba no doemadao Wetero baero ba golajama. Ba mõi chõnia zawoejoe, ono alawe, imane: Jaʼoegõ gõi nawõ Jesoe andrõ, banoea Galilaia. 70Ba iʼosilõʼõgõ fõnara fefoe, imane: Lõ oeʼila hadia niw̃aʼõoe. 71Ba me itõrõ mbawa gõli, weʼamõi baero, ba iʼila ia tánõ bõʼõ, ba imane ba zi so ba daʼõ: Awõ Jesoe, banoea Nazareta, daʼõ. 72Ba ifoeli iʼosilõʼõgõ, fahõloe ia, imane: Lõ oeʼila, ha niha daʼõ. (F. 16, 16). 73Ba lõ ara gotaloea, ba mõi chõ Wetero zi so ba daʼõ, lamane chõnia: Doehoe, samõsa gõi ndraʼoegõ chõra, ifaʼeleʼõ sa gõi ndraʼoegõ lioe. 74Ba ibõrõgõ iʼelifi ia ba fahõloe, imane: Lõ oeʼila, ha niha daʼõ. Ba iʼanemaʼõ miwo zilatao. 75Ba itõrõ tõdõ Wetero niw̃aʼõ Jesoe, me imane: Lõ fachamõ miwo zilatao, ba no medõloe õʼosilõʼõgõ ndraʼo. Ba mõi ia baero, megeʼege sibai. (A. 34).
Currently Selected:
MATAIO FAZA 26.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.