MATAIO FAZA 22.
FAZA 22.
I. Amaedola; Falõw̃a. II. Lasofoe, na labeʼe mbeo, ba na lõʼõ, ba III. he wisa ba wemaoso zi mate andrõ, ba IV. hadia zeboea goroisa. V. Ha maʼoewoe Keriso?
1I. Ba hoemede Jesoe, amaedola zoei ilaoe chõra, imane: (A. 2—14: Loek. 14, 16—24). 2No fachilichili ira mbanoea zoroego andrõ razo niha, samangowaloe ononia. 3Ba ifatenge zawoejoenia, ba wehede ba zi ho koemaoni, ba weʼamõi ba walõw̃a, ba lõ edõna mõi ira. 4Ba ifoeli ifatenge zawoejoe bõʼõ, imane: Mimane ba zi ho koemaoni andrõ: Hiza, no oeʼasiwai gõ andrõ chõgoe, õrõbao chõgoe ba hadia ia goerifõ niʼaʼatabõ, ba no toemaba ba no awai fefoe hadia ia, mitaboe ba walõw̃a. 5Ba lõ ba dõdõra; mofanõ ira, so zi mõi ba nowi chõnia, ba so zi mõi maniaga. 6Ba tánõ bõʼõ, ba laraʼoe zawoejoenia andrõ, laʼoʼaja ba laboenoe. (F. 21, 35. 36). 7Ba mofõnoe razo no mege, ba ifatenge zaradadoenia, ifafakikoʼõ zangeʼe andrõ ba banoeara, ba ifatoenoeʼõ. (Dan. 9, 26). 8Aefa daʼõ, ba imane ba zawoejoenia: Noa sa moelaoe walõw̃a, ba tenga si nangea mõi nikaoni andrõ. (Hal. zin. 13, 46). 9Ba miʼae ba wabaliw̃a lala misa, ba ha waʼato zi faloecha ami, ba mikaoni ba walõw̃a. 10Ba mõi ba lala zawoejoe no mege, ba laʼozaragõ fefoe zi faloecha ira, si sõchi, awõ zi lõ sõchi, ba afõnoe niha si manga naha walõw̃a. 11Ba me mõi baoeloe razo, ba wamaigi si manga andrõ, ba iʼila zamõsa ba daʼõ, si lõ baroe ba walõw̃a. (Jes. 61, 10. Efes. 4, 22—24). 12Ba imane chõnia: He le, hadia wa mõiʼõ jomo ba daʼe, ba lõ baroe ba walõw̃a? Ba lõ hedehedenia. 13Ba imane razo ba genoni: Mibõbõ gahenia ba tangania, ba mitiboʼõ ia ba zogõmigõmi, baero sibai; ba fegeʼege dania ba daʼõ ba fatangisa mboha. (F. 8, 12). 14Ato sa nikaoni, ba lõ ato nitoetoejoe. (F. 20, 16).
(A. 22, 15—22: Mar. 12, 13—17: Loek. 20, 20—26)
15II. Ba mõi mamagõlõ warizaio, enaʼõ laʼalani ia ba hoehoeonia. 16Ba lafatenge chõnia nono zekola andrõ chõra, awõ zi faofao chõ Herode, lamane: He samahaõ! maʼila, satoelõ ndraʼoegõ ba si ndroehoe wangombachaʼõoe lala Lowalangi, ba lõ ba dõdõoe niha, lõʼõ sa õfaigi mbawa niha. 17Ba w̃aʼõ chõma, hadia ba dõdõoe, tola labeʼe mbeo chõ kaizaro, ma lõʼõ? 18Ba me no aboto ba dõdõ Jesoe walõsõchira, ba imane: Hana wa mitandraigõ ndraʼo, samini tṍdõ? 19Miʼoromaʼõ chõgoe hoea mbeo andrõ. Ba laʼoroʼõ chõnia zamboea hoea soekoe. 20Ba imane chõra Jesoe: Ha famaedo daʼe, ba ha õchõ zoera andre? Lamane: Chõ kaizaro. 21Ba imane chõra: Ba mibeʼe chõ kaizaro hadia chõ kaizaro, ba chõ Lowalangi hadia chõ Lowalangi. (Loek. 23, 2. Rom. 13, 7). 22Ba me larongo daʼõ, ba ahõlihõli dõdõra ba larõi ia, lalaoe mofanõ.
(A. 22, 23—33: Mar. 12, 18—27: Loek. 20, 27—39)
23III. Me loeo daʼõ mõi chõnia zadoekaio andrõ, sangoemaʼõ lõ femaoso zi mate, ba lasofoe chõnia, (Hal. zin. 23, 6. 8). 24lamane: He samahaõ, no iw̃aʼõ Moze, na so zi mate niha, si lõ ono, ba jamoeʼowaloe woʼomonia talifoesõnia, jamoefongaʼõtõ dalifoesõnia andrõ. (Moz. V. 25, 5). 25Ba no so ba chõma, dafitoe si fatalifoesõ, ba mangowaloe zi aʼa ba mate; ba me lõ ononia, ba chõ nachinia woʼomonia. 26Si manõ gõi wanete daʼõ ba fanete zi daroea, iroegi dafitoe ira. 27Ba ba gafoeriata, foerira fefoe, ba mate gõi galawe andrõ. 28Ba ba wemaoso zi mate andrõ, ba ha foʼomo ia ba zi dafitoe andrõ? noa saʼae dozi zangai jaʼia. 29Ba itema lira Jesoe, imane chõra: Seloengoe ami, lõ saboto ba dõdõmi zoera ba lõ saboto ba dõdõmi waʼabõlõ Lowalangi andrõ. 30Ba wemaoso zi mate andrõ sa, ba lõ mangowaloe ira, ba lõ mõi nihalõ, hoelõ malaʼika Lowalangi andrõ ba zoroego saʼae ira. (Loek. 20, 35). 31Ba ba wemaoso zi mate andrõ, ba hadia, lõ nibasomi niw̃aʼõ Lowalangi chõmi, me imane: (Moz. II. 3, 6). 32”Lowalangi Gaberahamo ndraʼo ba Lowalangi Gizaʼaki ba Lowalangi Jakobo?” Ba tenga Lowalangi zi mate ia, no Lowalangi zaoeri. 33Ba me larongo daʼõ niha sato, ba tobali dõdõra ba wamahaõnia andrõ.
(A. 22, 34—40: Mar. 12, 28—34)
34IV. Ba me larongo farizaio, no ifaʼafoe mbawa zadoekaio, ba faloecha ira. 35Ba so zamõsa chõra, soneche ba goroisa, sanofoe chõnia, ba wanandraigõ jaʼia, imane: 36He samahaõ, hezo zeboea goroisa ba zoera goroisa andrõ? 37Ba imane chõnia: ”Omasiʼõ Zoʼaja jaʼoegõ, Lowalangioe andrõ, moroi siʼaikõ ba dõdõoe, nosooe maʼasamboea zangomasiʼõ jaʼia, ba õhorigõ geraʼeraoe, wangomasiʼõ jaʼia.” (Moz. V. 6, 5; 10. 12). 38Daʼõ zeboea goroisa, daʼõ zi fõfõna. 39Ba samboea tõ, si fachilichili chõnia: ”Omasiʼõ zahatõ chõoe, si mane faʼomasioe ndraʼoegõ.” (Joh. I. 4, 20. 21. Moz. III. 19, 18. Rom. 13, 9). 40Ba goroisa si domboea andrõ manandrõsa goroisa fefoe, awõ niw̃aʼõ zamaʼeleʼõ andrõ.
(A. 22, 41—45: Mar. 12, 35—37: Loek. 20, 41—44)
41V. Ba me faloecha warizaio, ba isofoe chõra Jesoe, imane: 42Hadia ba dõdõmi ba chõ Keriso andrõ? ha maʼoewoe ia? Lamane chõnia: Maʼoewoe Dawido. 43Ba imane chõra: Ba hadia wa ibeʼe tõinia Zoʼaja Dawido, nifarooe Geheha, me imane: 44”No iw̃aʼõ Soʼaja chõ Zoʼaja jaʼo: Dadao ba gambõlõgoe, irege oebeʼe tooe barõ gaheoe zi fatioe tõdõ chõoe.” (Sin. 110, 1. Hal. zin. 2, 34, 35. Heb. 1—13). 45Ba na ibeʼe tõinia Zoʼaja Dawido, ba he wisa wa maʼoewoenia? Ba lõ sangila manema linia, hadia ia, ba lõ si lõ ataʼoe manofoe chõnia saʼae, iʼotarai loeo daʼõ.
Currently Selected:
MATAIO FAZA 22.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.