MATAIO FAZA 21.
FAZA 21.
I. Feʼamõi Jesoe mijomo ba Jeroezalema. II. Fangehao osali. III. Marafala si mate. IV. Lasofoe, hana wa tola imanõ Jesoe. V. Amaedola: Sohalõw̃õ ba kaboe nagoe.
(A. 21, 1—11: Mar. 11, 1—10: Loek. 19, 29—38: Joh. 12, 12—18)
1I. Ba me no ahatõ ira ba Jeroezalema, me laroegi Mbetifage, ba gahe hili wanicha, ba ifatenge nifahaõnia Jesoe, daroea, 2imane chõra: Miʼae ba mbanoea sideʼide andrõ, fõnami, ba iʼanemaʼõ faloecha ami galide si alawe niʼamõhõgõ ba so gõi nono; mitotoʼõ wesoe ba miʼohe ia chõgoe. 3Ba na so zangoemaʼõ chõmi hadia ia, ba mimane: Mogoena chõ Doea, ba iʼanemaʼõ ifaʼoheʼõ. 4Andrõ si manõ, enaʼõ itõrõ niw̃aʼõ zamaʼeleʼõ andrõ, me imane: ”Miw̃aʼõ chõ nono Ziona alawe andrõ: 5”Hiza, iʼondrasiʼõ razomõ, sebolo tõdõ, fakoedo ia ba hoeloe galide, ba ba hoeloe nono zonoro”. (Sach. 9, 9). 6Ba mõi nifahaõ andrõ, laʼoʼõ niw̃aʼõ Jesoe, chõra, laʼohe galide andrõ, 7awõ nono, ba labologõ noecha ba hoeloe ba fakoedo ia jaw̃a. 8Ba ato niha samologõ ba lala noechara; ba so zolew̃a toetoeroe geoe ba lafazawili ba lala. (Sal. II. 9, 13). 9Ba moeʼao niha sato, si so fõna, awõ zoloʼõ moroi foeri, lamane: ”Hozana chõ maʼoewoe Dawido andrõ, jaʼahowoe zi so andrõ, ba dõi Zoʼaja; hozana ba zalaw̃a jawa!” (Sin. 118, 25. 26). 10Ba me iroegi jomo ba Jeroezalema, ba hoemoefa mbanoea maʼafefoe, lamane: Ha niha daʼõ? 11Ba lamane niha sato: Daʼõ zamaʼeleõ andrõ, Jesoe, banoea Nazareta, ba Galilaia. (F. 2, 23. Joh. 1, 46).
(A. 21, 12—17: Mar. 11, 15—19: Loek. 19, 45. 46)
12II. Ba mõi ba gosali Lowalangi andrõ Jesoe, ba ifofanõ baero fefoe zamawamawa hadia ia, awõ zowõliwõli ba gosali, ba isoʼagõ meza zanoeka anaʼa, awõ dadaoma zamawa marafadi. (Joh. 2, 14 b. t.). 13Ba imane chõra: No so ba zoera: ”Omo wangandrõ dõi nomogoe.” Ba jaʼami, ba no mibaliʼõ tõgi narõ hili naha zoraboe. (Jes. 56, 7. Jer. 7. 11). 14Ba laʼondrasi ia saoeʼa, awõ zomboejoemboejoe tõla, ba gosali, ba ifadõhõ wõchõra. 15Ba me laʼila ere seboea ba sangila amachoita zahõlihõli dõdõ andrõ, nilaoenia, ba me larongo li ndraono, siʼao ba gosali, sangoemaʼõ: ”Hozana chõ maʼoewoe Dawido andrõ!” ba lõ sõchisõchi dõdõra. 16Ba lamane chõnia: Õrongo, hadia niw̃aʼõ daʼõ? Ba imane chõra Jesoe: Oerongo. Hadia, lõ mirai miʼila ba zoera: ”No õʼasogõ chõoe wanoeno si oroi mbewe ndraono si lõ hoemede na, ba si oroi mbewe zamaenoe?” (Sin. 8, 3). 17Ba irõi ira, mõi ia baero mbanoea, isaw̃a Mbetania, ba mõrõ ia ba daʼõ. (Mar. 11, 11. 19).
(A. 21, 18—22: Mar. 11, 12—14. 20—24)
18III. Ba me mangawoeli ia mijomo ba Jeroezalema, si hoelõ wongi, ba olofo ia. 19Ba me iʼila marafala, sageoe, ba ngai lala, ba mõi ia ba daʼõ, ba lõ jaw̃a boea niʼilania, ha boeloe. Ba imane chõnia: Bõi jamowoea ndraʼoegõ saʼae, iroegi zi lõ aetoe. Ba iʼanemaʼõ mate marafala andrõ. 20Ba me laʼila daʼõ nifahaõ, ba ahõlihõli dõdõra ba lamane: Ha lõ alio mate marafala andrõ! 21Ba hoemede Jesoe, imane chõra: Si ndroehoe niw̃aʼõgoe chõmi: Na so chõmi wamati, na lõ manoefa dõdõmi, ba tenga ha daʼõ milaoe, ba marafala andrõ; na miw̃aʼõ gõi ba hili andrõ: Fazaw̃aʼõ ba tiboʼõgõ ba nasi, ba itõrõ niw̃aʼõmi. (F. 17, 20). 22Ba hadia ia, fefoe, niʼandrõmi ba wangandrõ, na mamati ami ba lõ zi lõ mitema. (F. 7, 7; 18, 19).
(A. 21, 23—27: Mar. 11, 27—33: Loek. 20, 1—8)
23IV. Ba me mõi ia ba gosali, ba laʼondrasi ia ere seboea ba satoea mbanoea, me mamahaõ ia, lamane: Hadia, wa tola õlaoe daʼõ ba ha niha zanehe chõoe? (Joh. 2, 18). 24Ba itema lira Jesoe, imane chõra: So gõi nisofoegoe chõmi zambalõ; na miw̃aʼõ chõgoe daʼõ, ba oew̃aʼõ gõi chõmi, hadia, wa tola oelaoe daʼõ. 25Famajagõ idanõ andrõ chõ Johane, he moroi ia, hadia, moroi ba zoroego, hadia moroi ba niha? Ba laʼeraʼera tõdõra, ba lamane: (Loek. 3, 3; 7, 30). 26Na taw̃aʼõ: Moroi ba zoroego, ba imane chõda dania: Ba hana wa lõ mamati ami no chõnia? Ba na taw̃aʼõ: Moroi ba niha, ba ataʼoe ita niha sato, me ba dõdõra fefoe, samaʼeleʼõ Johane andrõ. (F. 14, 5). 27Ba latema li Jesoe, lamane: Lõ maʼila. Ba imane chõra gõi: Ba lõʼõ gõi oew̃aʼõ chõmi, hadia, wa tola oelaoe daʼõ. 28Ba hadia ba dõdõmi? So niha, si so ono matoea, daroea. Ba mõi ia ba zi samõsa, imane: He onogoe, ae ohalõw̃õ ba kaboe nagoe maʼõchõ. 29Ba itema linia, imane: Lõ edõnado. Ba aefa daʼõ, ba mangesa dõdõnia, ba mõi ia. 30Ba mõi ia ba zi samõsa, ba imanõ gõi. Ba itema linia daʼõ, imane: Mõi ndraʼo, ama, ba lõ mõi ia. 31Ha niha ba zi daroea andrõ zoloʼõ somasi nama? Lamane: Si fõfõna andrõ. Imane chõra Jesoe: Si ndroehoe niw̃aʼõgoe chõmi, ofõna molala ba mbanoea Lowalangi andrõ zanema beo ba sohorõ, moroi chõmi. (Loek. 3, 12; 18, 14). 32Noa sa mõi Johane chõmi, wangombacha lala satoelõ, ba lõ samati ami chõnia, ba no mamati chõnia zanema beo ba sohorõ. Ba me miʼila daʼõ, ba lõ sangesa dõdõmi, foeri õ, ba wamati chõnia enaʼõ. (F. 3, 17).
(A. 21, 33—46: Mar. 12, 1—12: Loek. 20, 9—19)
33V. Mifondrondrongo gamaedola bõʼõ: So niha, satoea baomo, samazõchi kaboe nagoe, ifasoei õli, ikoʼo ba danõ wolazi, ba iʼotomosi malige, ba ibeʼe nisew̃a kaboe andrõ ba zohalõw̃õ, ba ilaoe mofanõ. (Jes. 5, 1 b. t. Jer. 2, 21). 34Ba me no ahatõ mbaw̃a wangai boea, ba ifatenge zawoejoenia ba zohalõw̃õ andrõ, ba wanema boea nagoe chõnia. 35Ba laraʼoe zawoejoenia andrõ sohalõw̃õ: so nibõbõzi, so niboenoe manõ, ba so niboenoe niteboe kara. (F. 22. 6). 36Ba ifoeli ifatenge zawoejoe bõʼõ, ato moroi ba zi fõfõna andrõ, ba lamanõ gõi ba daʼõ. 37Ba ba gafoeriata, ba ifatenge chõra nononia, imane: Ataʼoe ira nonogoe. (Heb. 1, 1. 2). 38Ba me laʼila nononia andrõ sohalõw̃õ, ba lamane dõdõra: Sanema ondrõita daʼõ, talaboe, taboenoe ia ba tahalõ chõda gondrõita andrõ chõnia. (F. 26, 3. 4. 66; 27, 23). 39Ba laraʼoe ia, latoeliʼõ baero kaboe nagoe, ba laboenoe. (F. 23, 37. Heb. 13, 12). 40Ba na mõi zochõ kaboe nagoe andrõ, ba he iwisa ba zohalõw̃õ andrõ? 41Lamane chõnia: Ihaogõ wamakiko seboea horõ andrõ, ba kaboe nagoe andrõ, ba ibeʼe nisew̃a ba zohalõw̃õ bõʼõ, sameʼe boea chõnia na baw̃ania. 42Imane chõra Jesoe: Hadia, lõ mirai miʼila ba zoera: ”Gowe andrõ, nitiboʼõ zotomo andrõ, ba no tobali tojo ba watalinga; chõ Zoʼaja moroi daʼõ, ba sahõlihõli dõdõda.” (Sin. 118, 22. 23. Hal. zin. 4, 11. Jes. 28, 16). 43Andrõ oew̃aʼõ chõmi: Laheta dania chõmi mbanoea Lowalangi andrõ, ba labeʼe ba niha sowoea boeania. (Hal. zin. 13, 46). 44Ba sarasa zalaoe ba gowe andrõ, ba nilangõnia, ba imama. (Jes. 8, 14. 15. Dan. 2, 34 b. t.). 45Ba me larongo gamaedola andrõ chõnia ere seboea ba farizaio, ba aboto ba dõdõra, wa chõra itandrõsaigõ daʼõ. 46Ba laʼaloei wondraʼoe jaʼia, ba no ataʼoe ira niha sato, me ba dõdõra samaʼeleʼõ ia. (Loek. 7, 16. Loek. 19, 48. Mar. 12, 12).
Currently Selected:
MATAIO FAZA 21.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.