MATAIO FAZA 20.
FAZA 20.
I. Amaedola: Loeo zohalõw̃õ ba kaboe nagoe. II. Ifoeli iʼombachaʼõ wamakao jaʼia Jesoe. III. Ina nono Zebedaio andrõ. IV. Ifadõhõ Jesoe hõrõ niha saoeʼa, daroea.
1I. Noa sa fachilichili ira mbanoea zoroego andrõ niha, satoea baomo, si mõi, si hoelõ wongi, mangoni sohalõw̃õ ba kaboe nagoe chõnia. (F. 21, 33). 2Ba me no mamagõlõ ira zohalõw̃õ, sasoekoe maʼṍchõ loeora, ba ifatenge ira ba kaboe nagoe andrõ chõnia. 3Ba me ifoeli mõi, me labõzi siw̃a, ba iʼila dánõ bõʼõ, si so ba kade, si lõ halõw̃õ, 4ba imane chõra: Miʼaeʼe, jaʼami gõi, ba kaboe nagoe, ba si nangea loeomi, ba oebeʼe chõmi. 5Ba mõi ira. Ba ifoeli mõi me laloeo ba me labõzi tõloe, ba imanõ zoei. 6Ba me mõi ia me labõzi lima, ba faloecha ia dánõ bõʼõ, si so ba daʼõ, ba imane chõra: Hadia wa miʼomaʼõchõi manõ ba daʼe, lõ halõw̃õ? 7Lamane chõnia: Me lõ sangoni jaʼaga. Imane chõra: Miʼaeʼe gõi, ba kaboe nagoe andrõ. 8Ba me bongi saʼae, ba imane sochõ kaboe nagoe andrõ chõ doeroetoelinia: Hede ba zohalõw̃õ andrõ ba beʼe loeora; bõrõgõ ba zafoeria mõi, noemalõ ba zi fõfõna andrõ. (F. 19, 30). 9Ba laʼondrasi niʼoni me labõzi lima, ba sasoekoe zamõsa loeora. 10Ba me so zi fõfõna andrõ, ba lawai eboea zinemara. Ba tebeʼe sasoekoe zamõsa chõra gõi. 11Ba me no latema daʼõ, ba koemõkõkõkõ ira chõ zatoea baomo andrõ, (Loek. 15, 29 b. t.), 12lamane: Ha saza wohalõw̃õ zafoeria andrõ, ba no fagõlõgõlõ ndraʼaga õbeʼe, jaʼaga si no manaha faʼafõchõ andrõ, maʼõmaʼõchõ, awõ waʼaoechoe zino. (F. 19, 29). 13Ba itema li zi samõsa andrõ, imane: He le, lõ oelimo ndraʼoegõ. Tenga no mamagõlõ ita ba zi sasoekoe? 14Halõ dána chõoe ba ofanõ. Somasido, oefagõlõgõlõ wameʼe chõmi safoeria andre. 15Ma lõ tola oeʼoʼõ manõ nilaoe dõdõgoe ba zi so chõgoe? Ma afõchõ dõdõoe, me no seboea tõdõ ndraʼo? (Rom. 9, 21, b. t.). 16Si manõ wa tobali si so fõna zi so foeri, awõ wa tobali si so foeri zi so fõna. (F. 19, 30; 22, 14).
(A. 20, 17—19: Mar. 10, 32—34: Loek. 18, 31—34)
17II. Ba me mõi misi jaw̃a Jesoe ba Jeroezalema, ba iʼohe awõnia zi felendroea, ba zi ha jaʼira ba imane chõra ba lala: 18Hiza, mõi ita misi jaw̃a ba Jeroezalema; ba tebeʼe dania ba danga gere seboea ba ba danga zangila amachoita andrõ Nono Niha, ba laʼetoeʼõ hoekoenia, hoekoe famoenoe, (F. 16, 21), 19ba labeʼe ia ba danga niha baero, ba wangoʼaja jaʼia ba ba wamõbõzi ba ba wamorõfa; ba na no iroegi tõloe ngaloeo, ba maoso ia, ifoeli aoeri. (E. 27, 2 b. t.).
(A. 20, 20—28: Mar. 10, 35—45)
20III. Ba mõi chõnia nina nono Zebedaio andrõ, awõ nononia, itoehi danõ fõnania, so niʼandrõnia chõnia. (F. 10, 2). 21Ba imane chõnia: Hadia niw̃aʼõoe? Imane chõnia: W̃aʼõ, enaʼõ doemadao dania nonogoe andre, si daroea, samõsa ba gambõlõoe ba samõsa ba gaberaoe, ba mbanoeaoe andrõ. 22Ba itema linia Jesoe, imane: Lõ miʼila watahõgõ hadia niʼandrõmi. Hadia miʼila mibadoe nõsi mako andrõ, nibadoegoe dania? Lamane chõnia: Maʼila. (F. 26, 39. Loek. 12, 50). 23Imane chõra: Mibadoe sa nõsi mako andrõ chõgoe dania, ba fedadao andrõ ba gambõlõgoe ba ba gaberagoe, ba tenga iaʼo zangoemaʼõ; ha daʼõ zidadao ba daʼõ, nihonogõi Namagoe fedadao. (F. 25, 34). 24Ba me larongo daʼõ si dafoeloe, ba lõ sõchisõchi dõdõra ba zi daroea andrõ, si fatalifoesõ. 25Ba hoemede chõra Jesoe, imane: Miʼila, lafatõrõ mbanoeara salaw̃a niha ba labeʼe barõ mbawara niha seboeara. (Loek. 22, 25 b. t.). 26Ba ba chõmi, ba bõi si manõ; ha niha zomasi eboea ba chõmi, ba jamõi enonimi; (F. 23, 11; Mar. 9, 35; Efes. 5, 21), 27ba na so ba chõmi zomasi mõi fõnami, ba jamõi sawoejoemi. 28Si mane Ono Niha, tenga si mõi mangoni, no si mõi enoni, si mõi mameʼe nosonia hõli zato. (Loek. 22, 27. Jes. 53, 10. 12. Tim. I. 2, 6. Fet. I. 1, 18. 19).
(A. 20, 29—34: Mar. 10, 46—52: Loek. 18, 35—43)
29IV. Ba me mofanõ ira, me aefa ira ba Jericho, ba ato zoloʼõ jaʼia niha. 30Ba hiza niha saoeʼa, daroea, sidadao ba zinga lala; me larongo itõrõ Jesoe, ba moeʼao ira, lamane: Hachõsi tõdõ ndraʼaga, maʼoewoe Dawido! (F. 9, 27). 31Ba latenaw̃a ira sato, enaʼõ labato. Ba lahõtõi feʼao, lamane: He Toea, maʼoewoe Dawido, hachõsi tõdõ ndraʼaga! 32Ba ibadoegõ ia Jesoe, moehede ia chõra, imane: Hadia zomasi ami, he oewisa chõmi? 33Lamane chõnia: He Toea, enaʼõ teboka hõrõma! 34Ba ahachõ dõdõ Jesoe ba ibabaja hõrõra, ba iʼanemaʼõ ifoeli laʼila niha ba laʼoʼõ ia.
Currently Selected:
MATAIO FAZA 20.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.