MATAIO FAZA 18.
FAZA 18.
I. Bõi fajaw̃a ita. II. Bõi tafobõrõ wangala chõ nawõda. III. He tawisa, na mosala chõda nawõda. IV. Amaedola: Razo sameʼe boeala soegilõnia chõ sawoejoenia, si lõ faʼahachõ dõdõ dania.
(A. 18, 1—5: Mar. 9, 33—37: Loek. 9, 46—48)
1I. Ba daʼõ mõi chõ Jesoe ndra nifahaõnia, lamane: Ha niha atṍ zeboea ba mbanoea zoroego andrõ? 2Ba hoemede ia ba ndraono, ifaʼaso fõnara, ba imane: 3Si ndroehoe niw̃aʼõgoe chõmi, na lõ mifoeli ami, ba na lõ tobali hoelõ ndraono ami, ba lõʼõ manõ lalami ba mbanoea zoroego andrõ. (F. 19, 14 b. t. Mar. 10, 15. Kor. I. 14, 20). 4Ba ha niha zangideʼideʼõ jaʼia, si mane iraono andre, daʼõ zeboea ba mbanoea zoroego andrõ. (F. 23, 12). 5Ba na so zamaʼamõi jomo chõnia iraono si manõ, samboea, ba dõigoe, ba jaʼo nifaʼamõinia jomo. (F. 30, 40).
(A. 18, 6—9: Mar. 9, 42—48)
6II. Ba na so zangalani sideʼide andrõ, samõsa, samati chõgoe, ba sõchi chõnia enaʼõ, na lataw̃i ba mbaginia gara seboea ba na latiboʼõ ia ba daloe nasi. (Loek. 17, 2). 7Alai niha ba goeli danõ, ba wangala andrõ! Lõʼõ sa tola lõ fangala, ba alai niha samobõrõ fangala. (Loek. 17, 1. Kor. I. 11, 19). 8Ba na iʼalani ndraʼoegõ tangaoe, ba ma aheoe, ba tema ew̃a ia ba tiboʼõ; mohareʼõ na sabõda ndraʼoegõ, ba ma sakelakela, ba õchamõ waʼaoeri, moroi doea dangaoe ba doea gaheoe, ba tetibo ndraʼoegõ ba galitõ andrõ, si lõ matemate. (F. 5, 30). 9Ba na iʼalani ndraʼoegõ hõrõoe, ba tema koë ia ba tiboʼõ; mohareʼõ na si bakole ndraʼoegõ ba õchamõ waʼaoeri, moroi domboea hõrõoe, ba tetibo ndraʼoegõ ba narako alitõ andrõ. (F. 5, 29). 10Mifaigi, fa bõi miʼositengagõ zideʼide andrõ, samõsa. Oew̃aʼõ sa chõmi, malaʼikara andrõ ba zoroego, ba lõ mamalõmalõ wa laʼila mbawa Namagoe andrõ, si so ba zoroego. (Sin. 34, 8. Heb. 1, 14). 11Ba wangorifi si no eloengoe sa mõi Nono Niha. (9, 13; Loek. 19, 10. Tim. I. 1, 15).
(A. 18, 12—14: Loek. 15, 4—7)
12Hadia ba dõdõmi? Na so niha, si so biribiri, otoe ngaʼeoe, ba na no eloengoe zi sageoe; hadia, lõ irõi zi siw̃a woeloe a siw̃a ba hili misa ba mõi mangaloei seloengoe andrõ? 13Ba na tobali isõndra, ba si ndroehoe niw̃aʼõgoe chõmi, abõlõ waʼomoeso dõdõnia ba daʼõ, moroi ba waʼomoeso dõdõnia ba zi siw̃a woeloe a siw̃a, si lõ eloengoe. 14Si manõ gõi chõ Namami andrõ, si so ba zoroego; tenga nilaoe dõdõnia taja zamõsa, sideʼide andrõ.
15III. Ba na mosala chõoe dalifoesõoe, ba ae tegoe ia, ba zi ha jaʼami, daroeami; na ifondrondrongo chõoe, ba no õsõndra dalifoesõoe. (Moz. III. 19, 15. Gal. 6, 1.) 16Ba na lõ ifondrondrongo, ba halõ awõoe zamõsa tõ ba ma daroea, enaʼõ aro hoehoeo fefoe ba niw̃aʼõ zi daroea, ba ma si datõloe, si so ba mbõrõ. (Joh. 8, 17). 17Ba na lõ ifondrondrongo chõra andrõ, ba ombachaʼõ ba mbanoea. Ba na lõʼõ gõi ifondrondrongo niw̃aʼõ mbanoea, ba ja hoelõ niha baero ia chõoe, ja hoelõ zanema beo. (Kor. I. 5, 11. 13. Tes. II. 3, 6. 14. 15). 18Si ndroehoe niw̃aʼõgoe chõmi, hadia nibõbõmi ba goeli danõ, ba nibõbõ gõi ba zoroego; ba hadia niʼefaʼõmi ba goeli danõ, ba niʼefaʼõ gõi ba zoroego. (F. 16, 19. Joh. 20, 23). 19Ba oew̃aʼõ gõi chõmi, na daroea ba chõmi zangosaraʼõ tõdõra, ba goeli danõ, ba ngawalõ hadia ia, niʼandrõra, ba ibeʼe chõra Amagoe andrõ, si so ba zoroego. (Mar. 11, 24). 20Ba zoroedoe zi daroea, ba ma si datõloe, ba dõigoe, ba daʼõ sodo chõra ba gotaloeara. (F. 28, 20. Loek. 24, 36).
21IV. Ba mõi chõnia Wetero, imane chõnia: He Toea, ha me oega oeʼefaʼõ zala dalifoesõgoe, na mosala in chõgoe? Hadia iroegi mewitoe? (Loek. 17, 3. 4). 22Imane chõnia Jesoe: Oew̃aʼõ chõoe: tenga ha iroegi zi mewitoe, iroegi zi mewitoe ngafoeloe wa fitoe. 23Andrõ fachilichili ira mbanoea zoroego andrõ razo, sedõna mangerai õmõ chõ zawoejoenia. 24Ba me ibõrõtaigõ mangerai, ba teʼohe chõnia zamõsa, soʼõmõ si foeloe ngahõnõ balaki. 25Ba me lõ chõnia famoeʼa, ba iw̃aʼõ sochõ, laʼamawa ia, awõ woʼomonia, awõ nononia, awõ fefoe hadia ia zi so chõnia, famoeʼa gõmõ. 26Ba itoehi dano sawoejoe andrõ, mangaloeloe ia chõnia, imane: Bologõ dõdõoe chõgoe, ba ahori oeboeʼa ia chõoe. 27Ba ahachõ dõdõ zochõ zawoejoe andrõ, iʼefaʼõ ba ibeʼe boealania chõnia zoegilõ andrõ. 28Ba me mõi baero zawoejoe andrõ, ba faloecha ia nawõnia sawoejoe, soʼõmõ chõnia si lima woeloe roefia. Ba iraʼoe, itõgi mbagi, imane: Boeʼa gõmõoe chõgoe. 29Ba itoehi danõ awõnia sawoejoe andrõ, mangandrõ chõnia, imane: Bologõ dõdõoe chõgoe, ba oeboeʼa chõoe. 30Ba lõ edõna ia; mõi ia, ifakoeroeʼõ, irege iboeʼa gõmõ. 31Ba me laʼila daʼõ awõnia sawoejoe bõʼõ, ba aboe sibai dõdõra ba mõi ira, laʼombachaʼõ chõ zochõ jaʼira daʼõ no mege fefoe. 32Ba ifakaoniʼõ ia sochõ jaʼia, imane chõnia: He sawoejoe si lõ sõchi! Õmõ no andrõ fefoe, ba no oebeʼe boealagoe chõoe, me no mangandrõ ndraʼoegõ chõgoe; 33ba hadia, lõ õhachõsi tõdõ gõi menaʼõ nawõoe sawoejoe, si mane jaʼo, me no oehachõsi tõdõ ndraʼoegõ? (Jak. 2, 13). 34Ba mofõnoe zochõ jaʼia, ibeʼe ba danga zamakao, irege iboeʼa gõmõnia chõnia fefoe. (F. 3, 25. 26). 35Si manõ gõi ilaoe chõmi dania Amagoe andrõ ba zoroego, na tenga moroi ba dõdõmi miʼefaʼõ zala, dozi ami, ba dalifoesõmi. (F. 6, 15. Mar. 11, 25 b. t.).
Currently Selected:
MATAIO FAZA 18.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.