MATAIO FAZA 17.
FAZA 17.
I. Famolachõmi Jesoe. II. Ifadõhõ wõchõ zaniri Jesoe. III. Ifaʼeleʼõ wamakao jaʼia. IV. Fameʼe bobotolõ.
(A. 17, 1—13: Mar. 9, 2—13: Loek. 9, 28—36)
1I. Ba õnõ bongi aefa daʼõ, ba iw̃aʼõ awõnia Jesoe Wetero ba Jakobo ba Johane, talifoesõ Jakobo, ba iʼohe ira ba hili salaw̃a, ba zi ha jaʼira. (F. 26, 37 b. t.). 2Ba tobali ia fõnara, hoemaga mbawania, hoelõ loeo, ba noechania, ba afoesi, hoelõ haga. (Fet. II. 1, 16—18). 3Ba hiza, oroma chõra Moze ba Elija, si fahoehoeo chõnia. 4Ba hoemede Wetero, imane chõ Jesoe: He Toea, ba daʼe zi sõchi nahada, na omasi ndraʼoegõ, ba daʼoelaoe nose ba daʼe, tõloe, samboea chõoe ba samboea chõ Moze ba samboea chõ Gelija. 5Ba me moehede ia na, ba hiza lawoeo sihaga, si loemõʼõ jaʼira, ba hiza li, si otarai lawoeo andrõ, imane: Onogoe daʼõ, ono omasiõ, waʼomasigoe; mifondrondrongo linia. (F. 3, 17. Moz. V. 18, 15). 6Ba me larongo daʼõ ira nifahaõ, ba lafalõgoe tooe ira, ataʼoe sibai. 7Ba mõi chõra Jesoe, itoefa ira tangania, imane: Mifaoso, ba bõi miʼataʼoefi. 8Ba me lafaõga hõrõra, ba lõ niʼilara niha, ha Jesoe. 9Ba me latoeeli hili, ba iw̃aʼõ chõra Jesoe, bõi laʼombachaʼõ gangilata andrõ, gofoe ha õchõ, irege no maoso Nono Niha moroi ba ngai zi mate. 10Ba lasofoe chõnia nifahaõ andrõ, lamane: Ba hana wa law̃aʼõ sangila amachoita, lõ tola lõ mõi Gelija oea? (Mal. 3, 1; 4, 5). 11Ba itema li, imane: Mõi sa Gelija ba ifoeli iʼaʼazõchi fefoe hadia ia. (Fam. 11, 3 b. t.). 12Ba oew̃aʼõ chõmi: Noa saʼae mõi Gelija, ba lõ saboto ia ba dõdõra, ba no lalaoe chõnia hadia zomasi ira. Si manõ gõi ba Nono Niha; lafakao dania. (F. 11, 14; 14, 8. Loek. 1, 17). 13Awena aboto ba dõdõ ndra nifahaõ, wa chõ Johane, samajagõ idanõ andrõ, tetandrõsaigõ niw̃aʼõnia chõra.
(A. 17, 14—21: Mar. 9, 14—29: Loek. 9, 37—43)
14II. Ba me laroegi niha sato, ba iʼondrasi ia niha, itoehi danõ fõnania, imane: 15He Toea, hachõsi tõdõ nonogoe andrõ, maniri, mofõchõ sibai; asese saʼae alaoe ia ba galitõ ba asese gõi ba nidanõ. 16Ba no oeʼohe ia chõ ndra nifahaõmõ, ba tebai lafadõhõ. 17Ba itema linia Jesoe, imane: He jaʼami, niha si lõ famati, si no tefoejoe tõdõ! ha waʼaragoe na chõmi enaʼõ? ha waʼara oetaha wolaoemi andrõ? Miʼohe ia chõgoe ba daʼe. 18Ba itenaw̃a ia Jesoe, ba aheta chõnia mbechoe andrõ, ba dõhõ wõchõ nono andrõ, iʼotarai daʼõ sibai. 19Aefa daʼõ, ba mõi ndra nifahaõ chõ Jesoe, ba zi ha jaʼira, lamane: Hana ndraʼaga, wa tebai mafofanõ ia? 20Ba imane chõra: Ba waʼambõ wamatimi andrõ. Si ndroehoe sa niw̃aʼõgoe chõmi, na so chõmi wamati, sezai boea lada, ba miw̃aʼõ ba hili andrõ: Fawoeʼaʼõ ba daʼe, faʼeseʼõ ba daʼõ! ba ifawoeʼa ia; ba lõ hadia ia zi tebai chõmi. (F. 21, 21. Mar. 11, 23. Loek. 17, 6). 21Ba lõ aheta zi sambalõ andrõ, na tenga ba wangandrõ ba ba wamoni.
(A. 17, 22. 23: Mar. 9, 30. 32: Loek. 9, 43—45)
22III. Ba me oroedoe ira ba Galilaia, ba imane chõra Jesoe; Tebeʼe dania Nono Niha ba danga niha, 23ba laboenoe ia, ba na no iroegi tõloe ngaloeo, ba maoso ia, ifoeli aoeri. Ba aboe sibai dõdõra.
24IV. Ba me laroegi Gafanaoema, ba mõi chõ Wetero zanema bobotolõ andrõ, lamane: Hadia, lõ ibeʼe mbobotolõ andrõ samahaõ jaʼami? (F. 22, 17). 25Imane: Ibeʼe. Ba me no mõi ia jomo, ba ihoelõ linia Jesoe, imane: Hadia ba dõdõoe, Simoni, razo ba goeli danõ andrõ, ha chõ lahalõ mbeo ba sew̃a? hadia, ba ndraonora, hadia, ba niha bõʼõ? 26Ba me imane: Ba niha bõʼõ, ba imane chõnia Jesoe: Ba tobali aefa ndraono andrõ. 27Ba fa bõi fatoewoe ita chõra, ba ae ba mbaw̃a, ba laoe gai, ba halõ giʼa andrõ, si fõfõna mõi jaw̃a, ba na õbokai mbawania, ba õsõndra bacha zamboea roefia; daʼõ halõ ba beʼe õmõda daroea ita. (F. 3, 15. Rom. 13, 7. Kor. I. 10, 32).
Currently Selected:
MATAIO FAZA 17.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.