MATAIO FAZA 16.
FAZA 16.
I. Tandra moroi ba mbanoea si jaw̃a. II. Tanõmõ roti warizaio andrõ. III. Famadoehoe õ Wetero. IV. Ibõrõtaigõ mangombacha famakao jaʼia Jesoe. V. Ifobawa lala ba woloʼõ jaʼia.
(A. 16, 1—12: Mar. 8, 11—21)
1I. Ba mõi chõnia warizaio ba sadoekaio, latandraigõ ia, laʼandrõ chõnia, enaʼõ na iʼoromaʼõ chõra dandra, moroi si jaw̃a ba mbanoea. (F. 12, 38). 2Ba itema li, imane chõra: Na tánõ owi, ba mimane: Lõchõ dania, me no ojo mbanoea; (Loek. 12, 54, b. t.) 3ba na mahemoloe mbanoea, ba mimane; Moteoe sabõlõbõlõ maʼõchṍ, me no ojo mbanoea ba me no aloe. Amoeata mbanoea andrõ, ba miʼila mihoekoe, ba tandra ginõtõ andrõ, ba tebai mihoekoe. 4Laʼaloei dandra niha si lõ sõchi, sohorõhorõ, ba lõ tebeʼe chõra dandra, ha tandra chõ Jona andrõ. Ba irõi ira, mofanõ ia. (F. 12, 39. Jon. 2, 1).
5II. Ba me no laroegi si jefo ira nifahaõ, ba no olifoe ira wolohe roti. 6Ba imane chõra Jesoe: Mifaigi, miʼangelama ba danõmõ roti warizaio andrõ ba ba danõmõ roti zadoekaio. (Loek. 12, 1. Gal. 5, 9. Kor. I. 5, 6). 7Ba lafatooetooe tõdõra, lamane: Me lõ niʼoheda roti. 8Ba me iʼila daʼõ Jesoe, ba imane: Hadia nifatooetooemi tõdõmi, sambõ famati, wa lõ niʼohemi roti? 9Hadia, lõʼõ na saboto ba dõdõmi, ba hadia, lõ itõrõ tõdõmi roti no, si lima ba zi lima ngahõnõ niha ba ha oega koede niʼozaragõmi? (F. 14, 17 b. t.). 10Ba he roti si fitoe ba zi õfa ngahõnõ niha, ba ha oega koede niʼozaragõmi? (F. 15, 34 b. t.). 11Hana wa lõ aboto ba dõdõmi, wa tenga roti niw̃aʼõgoe chõmi, me oemane: Miʼangelama ba danõmõ roti warizaio andrõ ba ba danõmõ roti zadoekaio? 12Awena aboto ba dõdõra, wa tenga daʼõ niw̃aʼõnia: Miʼangelama ba danõmõ roti warizaio andrõ ba ba danõmõ roti zadoekaio, wa famahaõ warizaio ba famahaõ zadoekaio niw̃aʼõnia.
(A. 16, 13—20: Mar. 8, 27—30: Loek. 9, 18—21)
13III. Ba me iroegi Jesoe danõ Kaisaria Wilifo, ba isofoe chõ ndra nifahaõnia, imane: Hadia law̃aʼõ niha, ha niha Nono Niha? 14Ba lamane: So zangoemaʼõ Johane andrõ, samajagõ idanõ ba so zangoemaʼõ Elija, ba so, ba Jeremia lawaʼõ, ba ma fasamõsa zamaʼeleʼõ andrõ. (F. 14, 2; 17, 10). 15Ba imane chõra: Ba jaʼami, ba ha miw̃aʼõ, ha niha ndraʼodo? 16Ba itema li Simoni Fetero, imane: Keriso ndraʼoegõ, Ono Lowalangi saoeri andrõ. (F. 14, 33. Joh. 6, 69; 11, 27). 17Ba itema linia Jesoe, imane chõnia: Jaʼahowoe ndraʼoegõ Simoni, ono Jona, me no tenga niha zamaʼeleʼõ chõoe daʼõ, me Amagoe andrõ, si so ba zoroego, zamaʼeleʼõ. (Gal. 1, 16. Kor. I. 2, 14). 18Ba jaʼodo gõi, oew̃aʼõ chõoe: Fetero ndraʼoegõ, ba ba dete gowe andrõ oetaroeʼõ mbanoeagoe andrõ dania, ba lõ lalaw̃a ia bawa gõli mbanoea tooe. (Joh. 1, 43. Hal. zin. 15, 7). 19Oebeʼe dania chõoe wogoē mbanoea zoroego andrõ, ba na so nibõbõmõ ba goeli danõ, ba nibõbõ gõi ba zoroego, ba hadia niʼefaʼõoe ba goeli danõ, ba niʼefaʼõ gõi ba zoroego. (F. 18, 18. Joh. 20, 23). 20Aefa daʼõ iw̃aʼõ chõ ndra nifahaõ, bõi law̃aʼõ ba niha, wa Keriso ia.
(A. 16, 21—28: Mar. 8, 31—38: 9, 1: Loek. 9, 22—27)
21IV. Iʼotarai daʼõ, ba ibõrõtaigõ Jesoe ibokai chõ ndra nifahaõnia, wa lõ tola lõ mõi ia ba Jeroezalema, awõ wa laʼojaʼõ dania wamakao jaʼia satoea andrõ ba ere seboea ba sangila amachoita, awõ wa laboenoe dania ia, awõ wa tesoesoegi dania ia, na no iroegi tõloe ngaloeo. (F. 17, 22, 23; 20, 18, 19). 22Ba isõbi ia chõnia Fetero, ibõrõtaigõ itenaw̃a, imane: Jamoetimba chõoe Lowalangi, Toea! 23Bõi gõna ndraʼoegõ si manõ. Ba ibaliʼõ ia, imane chõ Wetero: Ae foerigoe, Satana! fangalagoe ndraʼoegõ; me lõ õfatooetooe zomasi Lowalangi, ha somasi niha õfatooetooe. (Sam. II. 19, 22).
24V. Aefa daʼo, ba imane Jesoe chõ ndra nifahaõnia: Na so zedõna moloʼõ jaʼo, ba jamoeʼositengagõ ia ba jamoeloeʼi rõfania ba jamoeʼoʼõ ndraʼo. (F. 10, 38). 25Ba zangaloei faʼanaoe nosonia, aetoe ia, ba saetoe noso, na bõrõ ndraʼo, daʼõ zanõndra jaʼia. (Loek. 17, 33. Joh. 12, 25). 26Hadia sa goena ba niha, na isõndra harenia fefoe hadia ia zi so ba goeli danõ, ba na teʼala ia nosonia? Ba hadia enaʼõ nibeʼe niha hõli nosonia? (Sin. 49, 8. 9). 27So sa dania Nono Niha, so chõnia lachõmi Namania, awõnia malaʼika chõnia, ba ba daʼõ ibeʼe zoelõ ba zamõsana, dali mboeaboeania. (F. 24, 30; 25, 31. Kor. II. 5, 10). 28Si ndroehoe niw̃aʼõgoe chõmi, so õsa, zi so ba daʼe, si lõ mate, irege no laʼila so Nono Niha ba mbanoeania andrõ. (F. 10, 23).
Currently Selected:
MATAIO FAZA 16.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.