MATAIO FAZA 15.
FAZA 15.
I. Oroisa niha, si lõ goena. II. Ifadõhõ wõchõ nono ndra alawe Ganaʼana andrõ Jesoe. III. Ibeʼe gõ ba niha si õfa ngahõnõ.
(A. 15, 1—20: Mar. 7, 1—23)
1I. Me loeo daʼõ mõi chõ Jesoe warizaio ba sangila amachoita, banoea Jeroezalema, lamane: 2Hana wa lasawõ niw̃aʼõ ndra toea ira nifahaõmõ? Lõʼõ sa mombanõ ira, na laʼā gõra. (Loek. 11, 38). 3Ba itema li, imane chõra: Ba hana ami gõi, wa misawõ goroisa Lowalangi, ba nifachoimi andrõ? 4Noa sa iʼoroiʼõ Lowalangi, imane: ”Fosoemange namaoe, awõ ninaoe ba: ”si mate zangelifi amania ba ma inania.” (Moz. II. 20, 12; 21, 17. Amaed. 23, 22). 5Ba jaʼami, ba mimane: Na so zangoemaʼõ chõ namania, ba ma chõ ninania: Tebeʼe soemange [Lowalangi] zinemaoe chõgoe enaʼõ, ba alacha lõ ifoesoemange namania, awõ ninania. 6Ba no miwoeʼai goroisa Lowalangi andrõ, ba nifachoimi andrõ. 7He jaʼami, samini tõdõ! Si ndroehoe wamaʼeleʼõ Jesaja ba chõmi andrõ, me imane: 8”Lafosoemange ndraʼo bewera niha andrõ, ba tõdõra, ba no arõoe chõgoe. 9Zajazaja gõlõra wamosoemangera jaʼo, me no nifachoi niha wamahaõra andrõ.” 10Ba ikaoni chõnia niha sato, ba imane chõra: Mifondrondrongo ba jaʼaboto ba dõdõmi! 11Tenga daʼõ zanaʼoenõi niha si mõi bacha ba mbawania, ha si mõi baero, si oroi mbawania daʼõ zanaʼoenõi niha. (Hal. zin. 10, 15. Rom. 14, 14). 12Ba so ndra nifahaõ, lamane chõnia: Hadia, õʼila wa no fatoewoe ba warizaio, me larongo niw̃aʼõoe andrõ? 13Ba itema li, imane: Fefoe zinanõ, si tenga nitanõ Namagoe andrõ ba zoroego, ba ladeha dania. (Hal. zin. 5, 38). 14Mibõhõi ira; niha saoeʼa ira, samasao saoeʼa, ba na ifasao nawõnia saoeʼa saoeʼá, ba faoma aechoe ira ba gohokoho. (F. 23, 16. Loek. 6, 39. Rom. 2, 19). 15Ba itema linia Fetero, imane chõnia: Ombachaʼõ chõma geloeaha gamaedola andrõ. 16Ba imane: Hadia, lõʼõ na saboto ba dõdõmi gõi? 17Hadia, lõ miʼila, wa isaw̃a mbetoeʼa fefoe zi mõi bacha ba mbawa, awõ wa ifoeli mõi baero ba dõgitõgi? 18Ba hadia ia zi otarai mbawa, ba ba dõdõ iʼotarai, ba daʼõ zanaʼoenõi niha. (Jak. 3, 6). 19Moroi ba dõdõ sa iʼotarai eraʼera si lõ sõchi, ba fangeʼe, ba fohorõni donga zodonga ba fohorõ bõʼõ ba fanagõ ba famõbõgõ si lõ doehoe ba fanandraw̃a. (Moz. I. 6, 5. Rom. 7, 18). 20Jaʼia wanaʼoenõi niha. Ba lõ itaʼoenõi niha, na manga lõ mombanõ.
(A. 15, 21—31: Mar. 7, 24—31)
21II. Ba iheta ia ba daʼõ Jesoe, isaw̃a danõ Diro ba tanõ Zidona. 22Ba hiza ndra alawe Ganaʼana, siotarai danõ daʼõ; moeʼao ia, imane: Hachõsi tõdõ ndraʼo Toea, maʼoewoe Dawido! ifakao sibai nonogoe alawe bechoe. 23Ba lõ itema linia, samboea li lõʼõ. Ba mõi chõnia ndra nifahaõnia, mangandrõ ira chõnia, lamane: Fofanõ ia, me si aoʼao moroi foerida. 24Ba itema lira, imane: Ha ba mbiribiri sisoena andrõ, maʼoewoe Gizeraëli, tefatenge ndraʼo. (F. 10, 6). 25Ba mõi ndra alawe no mege, itoehi danõ fõnania, imane: He Toea, tolodo! 26Ba itema linia, imane: Lõ tola lahalõ gõ ndraono, ba wameʼe õ nasoe. 27Ba imane: Si ndroehoe Toea, ba laʼā sa atṍ asoe gachõchõla, saechoe tooe, na manga zochõ jaʼira. 28Ba itema linia Jesoe, imane chõnia: He alawe, no eboea wamatimõ andrõ, jafaloechaʼõ zomasi ndraʼoegõ! Ba dõhõ wõchõ nononia alawe, ba daʼõ sibai. (F. 8, 10. 13). 29Ba iheta ia ba daʼõ Jesoe, isaw̃a mbaw̃a Galilaia andrõ, ba mõi ia ba hili, moedadao ia ba daʼõ. 30Ba ato zangondrasi jaʼia niha, si so sogomboejoemboejoe ba sagaoeʼa ba si lõ hede ba sagabõda ba bõʼõnia, ato, ba latooeʼõ tooe fõnania; ba ifadõhõ wõchõra, (F. 11, 5. Jes. 35, 5 b. t.), 31tobali ahõlihõli dõdõ niha sato, me laʼila hoemede zi lõ hede andrõ ba dõhõ wõchõ zagabõda ba mowaõwaõ zogomboejoemboejoe ba laʼila niha sagaoeʼa; ba lasoeno Lowalangi Ndraono Gizeraëli.
(A. 15, 32—39: Mar. 8, 1—10)
32III. Ba hoemede Jesoe ba nifahaõnia, imane: Ahachõ dõdõgoe niha sato andrõ, me no tõloe bongi waʼara lõ nirõira jaʼo, ba lõ õra, ba lõ omasido oefofanõ ira lõ manga, fa lõ mate olofo ba lala. (F. 14, 15 b. t.). 33Ba lamane chõnia nifahaõ: Heza tahalõ gõ si manõ faʼoja, ba danõ si mate, fangaboeso niha si manõ faʼató? 34Ba imane chõra Jesoe: Ha oega roti, si so chõmi? Ba lamane: Fitoe, ba so maʼifoe giʼa. 35Ba iw̃aʼõ ba niha sato, enaʼõ moedadao ira ba danõ; 36ba ihalõ roti andrõ si fitoe, awõ giʼa andrõ, ba iʼaohasi gõlõ Lowalangi, ba iboboto ba ibeʼe chõ ndra nifahaõ, ba ira nifahaõ zameʼe ba niha sato. 37Ba manga ira fefoe, ba aboeso; ba laʼozaragõ zi tõra, achõchõla, fitoe koede. 38Ba si manga andrõ, ba no õfa ngahõnõ ndra matoea, baero ndraono, baero ndra alawe. 39Ba ifofanõ niha sato, ba mõi ia baowo, isaw̃a danõ Magada.
Currently Selected:
MATAIO FAZA 15.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.