MATAIO FAZA 14.
FAZA 14.
I. Laboenoe Johane andrõ, samajagõ idanõ. II. Tebeʼe gõ ba niha si lima ngahõnõ. III. Mowaõwaõ ba dete nidanõ Jesoe. IV. Oja ifadõhõ fõchõ.
(A. 14, 1—12: Mar. 6, 14—31: Loek. 9, 7—9)
1I. Me loeo daʼõ irongo doeria Jesoe andrõ Herode, razo ba zi sagõrõ niʼoʼõfa tanõ andrõ. 2Ba imane ba genoninia: Johane daʼõ, samajagõ idanõ; no maoso daʼõ moroi ba ngai zi mate, andrõ so chõnia waʼabõlõ andrõ. (F. 16, 14). 3Noa sa ifaraʼoeʼõ Johane andrõ Herode, no ifabõbõʼõ ba no ifabeʼeʼõ ba goeroenga, bõrõ Herodia andrõ, foʼomo dalifoesõnia [Filifo]. (Loek. 3, 19. 20). 4Noa sa iw̃aʼõ chõnia Johane; Lõ tola so ia chõoe. (Moz. III. 18, 16). 5Ba iboenoe enaʼõ Johane Herode, ba ataʼoe ia niha sato, me ba dõdõra samaʼeleʼõ Johane andrõ. (F. 21, 26). 6Ba me baw̃a waʼatoemboe chõ Herode, ba manari nono Herodia andrõ chõra ba daʼõ, ba omasi Herode. 7Andrõ ifaboeʼoe chõnia, fahõloe ia, ibeʼe chõnia hadia ia niʼandrõnia. 8Ba me no isofoe chõ ninania oea; ba imane: Beʼe chõgoe ba daʼe, ba wiga jaw̃a, hõgõ Johane andrõ, samajagõ idanõ. 9Ba aboe dõdõ razo, ba ba wahõloesa no mege ba ba domenia andrõ, ba iʼoroiʼõ labeʼe. 10Ba ifatenge, ifaʼew̃aʼõ mbagi Johane ba goeroenga. 11Ba laʼohe hõgõnia, ba wiga, ba labeʼe chõ nono alawe andrõ, ba iʼohe chõ ninania. 12Ba so ndra nifahaõnia, lahalõ mbotonia ba lakoʼo; ba mõi ira mangombacha daʼõ chõ Jesoe.
(A. 14, 13—21: Mar. 6, 31—44: Loek. 9, 11—17: Joh. 6, 1—14)
13Ba me irongo Jesoe, ba iheta ia ba daʼõ, molojo ia, isaw̃a danõ si mate, ba zi ha jaʼia; ba me larongo niha sato, ba laʼoʼõ ia, latõrõ tanõ, moroi ba mbanoea misa.
14II. Ba me iroegi Jesoe, ba iʼila niha sato sibai andrõ, ba ahachõ dõdõnia ira ba ifadõhõ wõchõ ba zofõchõ chõra. (F. 9, 36). 15Ba me tánõ owi, ba mõi chõnia nifahaõ, lamane: Tanõ si mate daʼe, ba bongi; fofanõ saʼae niha sato, enaʼõ mõi ira ba mbanoea misa, mowõli gõra. 16Ba imane chõra: Alacha lõ mofanõ ira, mibeʼe gõra, jaʼami. 17Ba lamane chõnia: Lõ chõma ba daʼe, ha lima roti ba ha doea rozi giʼa. 18Ba imane: Miʼohe ia chõgoe ba daʼe. 19Ba iw̃aʼõ moedadao niha sato ba ndroeʼoe, ba ihalõ roti andrõ, si lima, awõ giʼa andrõ, si doea rozi, ifaõga hõrõnia mijaw̃a ba zoroego, iʼaohasi gõlõ Lowalangi ba iboboto ba ibeʼe chõ ndra nifahaõ roti no mege, ba ira nifahaõ zameʼe ba niha sato. (F. 15, 32 b. t.). 20Ba manga ira fefoe ba aboeso, ba laʼozaragõ zi tõra, achõchõla, felendroea koede. 21Ba si manga andrõ, ba mato lima ngahõnõ ndra matoea, baero ndra alawe, baero ndraono.
(A. 14, 22—35: Mar. 6, 45—56: Joh. 6, 15—21)
22III. Ba ifarooe nifahaõ, enaʼõ mowaõwaõ ira baowo, molojo mijefo, gasagasa wamofanõnia niha sato. 23Ba me no ifofanõ niha sato, ba mõi ia ba hili, ha jaʼia, mangandrõ. Ba me no bongi, ba ha jaʼia ba daʼõ. 24Ba no so ba daloe mbaw̃a nowo no mege, no tosasa ba ndroeloe, noa sa zoezoemõ nangi. 25Ba me miwo manoe, ba mõi chõra Jesoe, mowaõwaõ ba dete nidanõ. (Joh. 9, 8). 26Ba me laʼila ia, sowaõwaõ ba dete nidanõ, ba tokea ira, lamane: Bechoe! ba moeʼiraʼira ba waʼataʼoe. (Loek. 24, 37.) 27Ba iʼanemaʼõ moehede chõra Jesoe, imane: Mihonogõ ami, jaʼodo; bõi miʼataʼoefi! 28Ba itema linia Fetero, imane: Na jaʼoegõ, Toea, ba w̃aʼõ chõgoe, mõido chõoe ba dete nidanõ. 29Ba imane: Aine! Ba mõi tooe Wetero, moroi ba nowo, mowaõwaõ ia ba dete nidanõ, iʼondrasi Jesoe. 30Ba me iʼila nangi, ba ataʼoe ia ba ibõrõtaigõ ahõndrõ, ba imane: He Toea, orifido! 31Ba iʼanemaʼõ iʼoroʼõ dangania Jesoe, iraʼoe, imane chõnia: He sambõ famati, hana wa manoefa dõdõoe? (F. 8, 26). 32Ba me mõi ira baowo, ba tebato nangi. 33Ba mangaloeloe chõnia zi so baowo, lamane: Doehoe, Ono Lowalangi ndraʼoegõ. (F. 16, 16).
34IV. Ba laʼõtõ mbaw̃a, lasaw̃a danõ Genezare. 35Ba me laʼila ia banoea daʼõ, ba lafatenge zinenge ba zi fasoei andrõ fefoe ba laʼohe chõnia fefoe zi so fõchõ. 36Ba laʼandrõ chõnia, enaʼõ ha ahe mbaroenia lababaja, ba dozi sombambaja, ba dõhõ wõchõ. (F. 9, 21. Loek. 6, 19).
Currently Selected:
MATAIO FAZA 14.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.