MATAIO FAZA 13.
FAZA 13.
Amaedola. I. Samazaewe tanõmõ zinanõ. II. Doeʼoe barõ wache. III. Tanõmõ lada. IV. Tanõmõ roti. V. Girõgirõ nibiniʼõ ba mbenoea. VI. Manimani. VII. Kiri. VIII. Laʼositengagõ Jesoe banoeara.
(A. 13, 1—23: Mar. 4, 1—20: Loek. 8, 4—15)
1I. Me loeo daʼõ mõi baero Jesoe, moedadao ia ba zinga mbaw̃a andrõ. 2Ba ato zowoelo chõnia niha, ba mõi ia baowo ba moedadao, ba baene so niha sato fefoe. 3Ba oja hoehoeonia chõra, amaedola, imane: Hiza, mõi ba nowi zamazaewe tanõmõ, ba wamazaewe tanõmõ zinanõ. 4Ba ba wamazaewenia, ba so zi gõna ba lala, ba so wofo, ba laʼā. 5Ba so zi gõna ba zokara, ba zi lõ aweʼeweʼe tanõ chõnia, ba iʼanemaʼõ motalinga, me lõ aweʼeweʼe danõ chõnia. 6Ba me toemboe loeo, ba angongo ba mate, me no ambõ w̃aʼania. 7Ba so zi gõna barõ ndroi, ba eboea ndroi ba mate zinanõ ibeʼe. 8Ba so zi gõna ba danõ si sõchi, ba mowoea, so zowoea si doea woeloe, so zi felendroea ba so zi õnõ, zamba jõoe. 9Si so tõgi dalinga, ba jamoefondrondrongo! (F. 11, 15). 10Ba laʼondrasi ia nifahaõnia, lamane chõnia: Hana wa amaedola niw̃aʼõoe chõra? 11Ba itema li, imane: Chõmi no moebeʼe waʼaboto ba dõdõ zi no tobini andrõ, ba mbanoea zoroego andrõ, ba chõrá, ba lõ moebeʼe. (F. 11, 25; 16, 17. Kor. I. 2, 7—10). 12Ba zi ho so sa, ba tebeʼe na, lahõna chõnia, ba ba zi lõʼõ, ba laheta gõi zi no so chõnia. (F. 25, 29. Mar. 4, 25. Loek. 8, 18; 19. 26). 13Daʼõ mbõrõ wa amaedola hoehoeogoe chõra, me lõ mangila ira, he w̃aʼae no teboka hõrõra, ba me lõ mamondrongo, he w̃aʼae larongo, ba me lõ aboto ba dõdõra. 14Ba itõrõ ba chõra nifaʼeleʼõ Jesaja, me imane: ”Mirongo dania ia tõgi dalingami, ba lõʼõ manõ aboto ba dõdõmi; anehe hõrõmi, ba lõ miʼila. 15Noa sa moeʼabeʼeʼõ dõdõ niha andre ba no afisofiso ira, ba no lafakifoe hõrõ, enaʼõ lõ laʼila hõrõra ba enaʼõ lõ larongo tõgi dalingara ba enaʼõ lõ aboto ba dõdõra, fa lõ lafoeli ira, enaʼõ oeʼorifi ira.” 16Ba jaʼahowoe hõrõmi, me laʼila, ba tõgi dalingami, me larongo. (Loek. 10, 23, b. t.). 17Si ndroehoe niw̃aʼõgoe chõmi: No ato zamaʼeleʼõ ba no ato zatoelõ somasi mangila niʼilami andrõ, ba lõ niʼilara, ba somasi mamondrongo nirongomi andrõ, ba lõ nirongora. (Fet. I. 1, 10. Heb. 11, 13). 18Ba mifondrondrongo geloeaha gamaedola andrõ, samazaewe tanõmõ zinanõ: 19Na so zamondrongo toeria mbanoea andrõ, ha niha ia, ba na lõ aboto ba dõdõnia, ba so Gafõcha, iʼoloiʼõ nifazaewe ba dõdõnia; daʼõ nifazaewe tanõmõ si gõna ba lala andrõ. 20Ba nifazaewe ba zokara, ba daʼõ ia: Irongo daroma li andrõ, ba iʼanemaʼõ itema, omoeso dõdõnia. 21Ba lõ mow̃aʼa ba dõdõnia, lõʼõ sa anaoenaoe gõlõ; ba na tesao wamakao, ba ma folohi, na bõrõ daroma li andrõ, ba iʼanemaʼõ mangawoeli foeri. 22Ba nifazaewe barõ ndroi, ba daʼõ ia: Irongo daroma li andrõ, ba so waʼaboe dõdõ ba goeli danõ andre, awõ wamaeloengoe andrõ, ba ganaʼa, ba iboenoe daroma li, ba tobali lõ mowoea. (F. 19, 23. Tim. I. 6, 9). 23Ba nifazaewe ba danõ si sochi, ba daʼõ ia: Irongo daroma li, ba aboto ba dõdõnia, ba jaʼia zowoea, so zowoea si doea woeloe, so zi felendroea ba so zi õnõ, zamba jõoe.
24II. Amaedola tánõ bõʼõ iw̃aʼõ chõra, imane: No fachilichili ira mbanoea zoroego andrõ niha samazaewe tanõmõ si sõchi ba nowinia. 25Ba me no mõrõ niha, ba so zi fatioe tõdõ chõnia, mõi moefazaewe, danõmõ ndroeʼoe barõ zinanõ ba ilaoe mofanõ. 26Ba me no eboea zinanõ, me molai, awena gõi oroma ndroeʼoe andrõ. 27Ba so genoni zochõ, lamane chõnia: He Toea! hadia, tenga tanõmõ zinanõ si sõchi nifazaeweoe ba nowioe? Ba he moroi chõnia ndroeʼoe andrõ? 28Ba imane chõra: Niha si fatioe tõdõ zolaoe daʼõ. Ba lamane chõnia enoni: Ba hadia, omasiʼõ na mõiga moeʼozaragõ ia? 29Ba imane: Bõi, ma dania mifao wondrõni sinanõ, na miʼozaragõ ndroeʼoe. (Jes. 65, 8). 30Acha faoma eboea ia, irege wamasi, ba na baw̃a wamasi, ba oew̃aʼõ ba zamasi, oemane: Miʼofõnaiʼõ wangozaragõ doeʼoe ba milaoe ba ngambõbõ, ba wanoenoe jaʼia, ba boea zinanõ, ba miʼowoeloi ba halasa chõgoe. (F. 3, 12. Sam. II. 23, 6).
(A. 13, 31—34: Mar. 4, 30—34: Loek. 13, 18—21)
31III. Amaedola tanõ bõʼõ iw̃aʼõ chõra, imane: No fachilichili ira mbanoea zoroego andrõ hoenõ lada, nihalõ niha, nifazaewenia ba nowinia. 32Fondrege zideʼide mboea zinanõ sa ia, ba na no manõi, ba eboea ia moroi ba goelegoele bõʼõ ba tobali motõla, tobali mõi wofo ba daloe mbanoea, mangazoeni ba ndrahania.
33IV. Amaedola tánõ bõʼõ iw̃aʼõ chõra, imane: No fachilichili ira mbanoea zoroego andrõ danõmõ roti, nihalõ ndra alawe, nifaroekania ba zi tõloe jõoe hamo, irege aisõ maʼafefoe. 34Daʼo fefoe niw̃aʼõ Jesoe ba niha sato, amaedola, lõ bõʼõnia, hoehoeonia chõra, ha sambalõ amaedola. 35Enaʼõ itõrõ niw̃aʼõ zamaʼeleʼõ andrõ, me imane: ”Damoehededo, oelaoe gamaedola, oebokai zi no tobini, iʼotarai mbõrõta danõ.” (Sin. 78, 2. Kor. I. 2, 7). 36Aefa daʼõ, ba ifofanõ niha sato ba mõi ia jomo. Ba mõi chõnia nifahaõnia, lamane: Ombachaʼõ chõma geloeaha gamaedola andrõ, doeʼoe ba nowi. 37Ba itema lira, imane: Samazaewe tanõmõ zinanõ si sõchi andrõ, ba jaʼia Nono Niha, 38ba nowi andrõ, ba jaʼia niha ba goeli danõ; ba tanõmõ si sõchi andrõ, ba ono mbanoea andrõ; ba doeʼoe, ba ono Gafõcha. (Joh. 8, 44; Joh. I. 3, 8). 39Ba si fatioe tõdõ andrõ, samazaewe jaʼia, ba jaʼia Gafõcha andrõ. Ba famasi, ba amozoea gõtõ danõ andre; ba samasi, ba malaʼika andrõ. (Fam. 14, 15). 40Ba hoelõ si mane na laʼozaragõ ndroeʼoe, nitoenoe ba galitõ, si manõ gõi dania ba gamozoea gõtõ danõ andre. 41Ifatenge dania malaʼikania Ono Niha, ba laʼozaragõ fefoe wangala ba mbanoeania andrõ, awõ zamazõchi si lõ atoelõ, (F. 24, 31), 42ba latiboʼõ ba mbaho galitõ andrõ, ba fegeʼege dania ba daʼõ ba fatangisa mboha. (Sin. 50. Fam. 19, 20). 43Ba hoemaga dania zatoelõ andrõ, hoelõ loeo, ba mbanoea Namara andrõ. Ha niha zi so tõgi dalinga, ba jamoefondrondrongo! (Dan. 12, 3. Kor. I. 15, 40 b. t.).
44V. No fachilichili ira mbanoea zoroego andrõ girõgirõ nibiniʼõ ba mbenoea, nisõndra niha, ba ibiniʼõ; ba ba waʼomoeso dõdõnia andrõ, ba mõi ia, iʼamawa fefoe hadia ia zi so chõnia, ba iʼõli mbenoea andrõ. (Fil. 3, 7).
45VI. Fachilichili zoei ira mbanoea zoroego andrõ niha saniaga, sangaloei manimani si sõchi. 46Ba me isõndra zamboea manimani seboea bõli, ba mõi ia, iʼamawa fefoe hadia ia zi so chõnia ba iʼõli daʼõ. (Amaed. 8, 10. 11).
47VII. Fachilichili zoei ira mbanoea zoroego andrõ giri, nilaoe ba nasi, famaʼoeʼoe fefoe hadia ia ngawalõ giʼa. 48Ba na no afõnoe ia, ba ladõni jaw̃a baene ba moedadao ira, laʼozaragõ zi sõchi, lalaoe ba nahia ba si lõ sõchi, ba latiboʼõ. 49Si manõ gõi dania ba gamozoea gõtõ danõ andre. Mõi dania malaʼika andrõ ba lafabali zi lõ sõchi andrõ ba zatoelõ; 50ba latiboʼõ ba mbaho galitõ andrõ, ba fegeʼege dania ba daʼõ ba fatangisa mboha. (F. 22, 13; 24, 51). 51Hadia, no aboto ba dõdõmi daʼõ fefoe? Lamane chõnia: Noa. 52Ba imane chõra: Me si manõ, ba dozi sangila amachoita, nifahaõ ba ngawalõ mbanoea Lowalangi andrõ, ba no fachilichili ba niha, satoea baomo, sanaoʼõ baero, moroi ba girõgirõnia andrõ, si bohooe, awõ zi no ara.
(A. 13, 53—58: Mar. 6, 1—6: Loek. 4, 16. 22—24)
53VIII. Ba me no iʼoʼozoei Jesoe gamaedola andrõ, ba iheta ia ba daʼõ. 54Ba me iroegi mbanoeara, ba ifahaõ ira ba zekola chõra, irege tobali dõdõra, ba lamane: Heza moroi chõnia waʼatoeatoea andrõ, awõ waʼabõlõ andrõ? 55Tenga ono doeka andrõ ia? Tenga Maria dõi ninania andrõ, ba tenga Jakobo ba Josefo ba Simoni ba Joeda dõi dalifoesõnia matoea andrõ? (F. 12, 46. Joh. 6, 42). 56Ba talifoesõnia alawe andrõ, ba tenga chõda so ira, fefoe? Ba heza moroi chõnia daʼõ fefoe? 57Ba fatoewoe ia chõra. Ba imane chõra Jesoe: Lõʼõ sa teʼositengagõ zamaʼeleʼõ, na tenga ba mbanoeara ba na tenga moroi jomo chõra. (Joh. 4, 44). 58Ba lõ oja ifazõchi ba daʼõ tandra, bõrõ wa lõ mamati ira.
Currently Selected:
MATAIO FAZA 13.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.