MATAIO FAZA 12.
FAZA 12.
I. Ladõdõni lai wache ira nifahaõ. II. Ifadõhõ wõchõ danga sokõlikõli Jesoe, me loeo sabato. III. Latandraw̃aisi Jesoe farizaio, ba iboeʼa ba hoeloenia. IV. Laʼandrõ dandra farizaio. V. Ira ina Jesoe.
(A. 12, 1—8: Mar. 2, 23—28: Loek. 6, 1—5)
1I. Me loeo daʼõ itõrõ nowi Jesoe, me loeo sabato, ba no olofo nifahaõnia ba labõrõtaigõ ladõdõni lai wache ba laʼā nõsi. (Moz. V. 23, 25). 2Ba me laʼila daʼõ farizaio, ba lamane chõnia: Hiza, lalaoe zi lõ tola ba loeo sabato ira nifahaõmõ. 3Ba imane chõra: Hadia, lõ niʼilami ba zoera, he iwisa Dawido, me olofo ia, ba awõnia fao? (Sam. I. 21, 6). 4Me mõi ia ba nomo Lowalangi, ba me laʼā roti nifaigifaigi andrõ, si lõ tola iʼā ba si lõ tola laʼā awõnia fao? ha ere zi tola manga daʼõ. (Moz. III. 24, 5—9. Moz. II. 29, 32—33). 5Ba lõ niʼilami ba zoera goroisa andrõ, wa lõ laʼamoniʼõ loeo sabato ere ba gosali, ba lõ salara? (Moz. IV. 28, 9 b. t.). 6Ba oew̃aʼõ chõmi, no so ba daʼe zeboea moroi ba gosali. 7Ba na aboto ba dõdõmi enaʼõ, hadia geloeaha niw̃aʼõ andrõ: ”Faʼahachõ dõdõ zomasido, ba tenga soemange”, ba lõ mihoekoe enaʼõ zi lõ sala. (F. 9, 13. Hos. 6, 6). 8Soʼaja loeo sabato sa Nono Niha.
(A. 12, 9—14: Mar. 3, 1—6: Loek. 6, 6—11)
9II. Ba mofanõ ia ba daʼõ, mõi ia ba zekola chõra. 10Ba hiza niha si no ariri tanga, si sara. Ba lasofoe chõnia, lamane: Hadia, tola mamadõhõ fõchõ na loeo sabato? ba wangadoegõ jaʼia. (Loek. 13, 14; 14, 3 b. t.). 11Ba imane chõra: Ha niha ba chõmi, si so biribiri, sageoe, si lõ mondraʼoe daʼõ, ba wanõbi jaw̃a, na aechoe ba dõgi, na loeo sabato? 12Ba he zi sõchi ira niha mbiribiri? Tobali tola tafazõchi zi sõchi na loeo sabato. 13Awena iw̃aʼõ ba niha andrõ: Oroʼõ dangaoe andrõ! Ba iʼoroʼõ. Ba ifoeli sõchi si mane si sara. 14Ba mõi baero warizaio, mamagõlõ, ba chõnia andrõ, ba wamoenoe jaʼia. (Joh. 5, 16—18). 15Ba me aboto daʼõ ba dõdõ Jesoe, ba iheta ia ba daʼõ. Ba ato zoloʼõ jaʼia ba ifadõhõ wõchõra fefoe. 16Ba itenaw̃a ira, fa lõ laʼombachaʼõ ia. (F. 9, 30). 17Enaʼõ itõrõ niw̃aʼõ Jesaja andrõ, samaʼeleʼõ, me imane: 18”Hiza genonigoe andrõ, nitoejoegoe, niʼomasiʼõgoe, somasi dõdõgoe andrõ, oebeʼe chõnia Gehehagoe, ba iʼombachaʼõ hoekoe ba niha baero. (Jes. 42, 1—4; 11, 2). 19Lõ fasoso ia ba lõ moeʼaoʼao ba lõ larongo linia ba newali misa. 20Ono geoe si no tefatõ, ba lõ ifaloea ifatõ ba fandroe si lõ holahola saʼae, ba lõ iboenoe, irege mõna hoekoe ibeʼe. 21Ba ba dõinia dania manõtõna niha baero.” (Rom. 15, 12).
(A. 12, 22—32: Mar. 3, 22—30: Loek. 11, 14—23)
22III. Aefa daʼõ, ba laʼohe chõnia zobechoe, saoeʼa ba si lõ hede, ba ifadõhõ, tobali moehede zi lõ hede andrõ ba iʼila niha. (F. 9, 32). 23Ba tobali dõdõ niha sato fefoe ba lamane: Hadia, tenga maʼoewoe Dawido andrõ daʼõ? 24Ba lamane farizaio, me larongo daʼõ: Lõ ifofanõ mbechoe daʼõ, na tenga moroi chõ Mbeleseboe, salaw̃a mbechoe andrõ. (F. 9, 34). 25Ba me no iʼila geraʼerara, ba imane chõra: Dozi õri adoedoe, na no fabali dõdõ; ba dozi banoea ba dozi omo, ba lõ fachai, na no fabali dõdõ. 26Ba na ifofanõ Zatana Satana, ba noa saʼae fabali dõdõnia, ba he wisa waʼaro mbanoeania? 27Ba na moroi chõ Mbeleseboe, wa oefofanõ mbechoe ba ha chõ moroi, wa lafofanõ iraonomi? Andrõ jaʼira dania zangoehoekoe jaʼami. 28Ba na moroi chõ Geheha Lowalangi, wa oefofanõ mbechoe, ba noa saʼae iʼondrasi ami banoea Lowalangi andrõ. (Joh. I. 3, 8). 29Ba he wisa niha weʼamõi jomo ba nomo zabõlõ, ba woraboe gamagamania, na lõ ihõnagõ ibõbõ zabõlõ andrõ? ba awena iʼosindraʼoei hadia ia ba nomonia. (Jes. 49, 24). 30Si lõ fao chõgoe, ba no si faʼoedoe chõgoe, ba si lõ mangozara, awõgoe, ba samazaewe. (Mar. 9, 40). 31Andrõ oew̃aʼõ chõmi: Fefoe hadia ia horõ ba fefoe hadia ia wanandraw̃a, ba teʼefaʼõ ba niha; ba fanandraw̃aisi Eheha andrõ, ba lõ teʼefaʼõ. (Heb. 6, 4—6; 10, 26). 32Ba na so zamõbõgõ hadia ia chõ Nono Niha ba teʼefaʼõ chõnia; ba na so zamõbõgõ hadia ia chõ Geheha niʼamoniʼõ, ba lõ teʼefaʼõ chõnia, he ba gõtõ daʼe, ba he ba gõtõ dania. (Loek. 12, 10). 33Sõchi dõla geoe mibeʼe, ba si sõchi mboeania, ba na lõʼõ, ba sobooe dõla geoe mibeʼe, ba sobooe mboeania. Ba mboea sa aboto ba dõdõda dõla geoe. (F. 7, 17. Loek. 6, 44). 34He jaʼami, ono goelõ! he moroi miʼila miw̃aʼõ zi sõchi, me no si lõ sõchi ami? Hadia sa zi no fahõna ba dõdõ, daʼõ zaloea ba mbewe. (F. 3, 7). 35Isaoʼõ baero zi sõchi niha si sõchi, moroi ba girõgirõ si sõchi andrõ; ba niha si lõ sõchi, ba isaoʼõ baero zi lõ sõchi andrõ. (Loek. 6, 45). 36Ba oew̃aʼõ chõmi, tezofoezofoe dania, na loeo wangoehoekoe, fefoe ngawalõ wehede si lõ goena, nilaoe niha. (Efes. 4, 29). 37Moroi ba wehedemõ sa satoelõ ndraʼoegõ dania, ba moroi ba wehedemõ teʼetoeʼõ hoekoemõ.
(A. 12, 38—42: Loek. 11, 16. 29—32)
38IV. Ba so õsa zanema linia, sangila amachoita ba farizaio, lamane: He samahaõ, omasiga maʼila dandra chõmõ. (F. 16, 1 b. t. Joh. 6, 30). 39Ba itema lira, imane chõra: Laʼandrõ dandra niha andre, si lõ sõchi, sohorõhorõ, ba lõ tebeʼe chõra dandra, ha tandra chõ Jona samaʼeleʼõ andrõ. (F. 16, 4). 40Hoelõ si mane Jona sa, me tõloe ngaloeo tõloe mbongi ia ba daloe giʼa seboea andrõ, si manõ gõi Nono Niha dania, tõloe ngaloeo tõloe mbongi dania ia ba hoenõ danõ. (Jon. 2, 1). 41Maoso dania mbanoea Niniwe andrõ, na loeo wangoehoekoe, oedoe niha daʼe ba laʼetoeʼõ hoekoe niha daʼe; me no lafalalini geraʼerara ba wangombacha Jona andrõ, ba hiza, so ba daʼe zeboea moroi chõ Jona. (Jon. 3, 5 b. t.). 42Maoso dania razo ira alawe andrõ, moroi raja, na loeo wangoehoekoe, oedoe niha daʼe, ba iʼetoeʼõ hoekoe niha daʼe, me no mõi ia moroi ba wondrege danõ, ba wamondrongo faʼatoeatoea Zelomo andrõ; ba hiza, so ba daʼe zeboea moroi chõ Zelomo. (Sal. I. 10. 1 b. t.).
(A. 12, 43—45: Loek. 11, 24—26)
43Ba na aheta mbechoe si raʼiõ ba niha, ba itõrõi danõ si lõ idanõ, mangaloei nahia wolombase, ba lõ isõndra. 44Awena dania imane: Daʼoefoelido ba nomogoe, ba zi otarai ndraʼo. Ba na so ia, ba lõ moeʼonahia iʼila, ba no labõzini ba no lahaogõ. 45Ba mõi ia, ihalõ awõnia mbechoe bõʼõ, dafitoe, safaito moroi chõnia, ba mõi ira bacha, labeʼe nahiara daʼõ, ba tobali tedooe walõsõchi zafoeria ba niha andrõ, moroi ba zi fõfõna mege. Si manõ gõi dania ba niha si lõ sõchi andre. (Fet. II. 2, 20).
(A. 12, 46—50: Mar. 3, 31—35: Loek. 8, 19—21)
46V. Ba lõ nibatonia na hoehoeonia andrõ ba niha sato, ba hiza ninania, awõ ndra talifoesõnia, so ira baero, laʼaloei lala, so niw̃aʼõra chõnia. (Joh. 7, 5). 47Ba so zangoemaʼõ chõnia: Hiza baero ninaoe, awõ ndra talifoesõoe, laʼaloei lala, so niw̃aʼõra chõoe. (F. 13, 57). 48Ba itema li, imane ba zangoemaʼõ chõnia: Ha niha ninagoe, ba ha niha dalifoesõgoe? 49Ba iʼoroʼõ dangania, jaw̃a ndra nifahaõnia, imane: Jaʼe ninagoe ba talifoesõgoe! 50Ha niha sa zoloʼõ somasi Namagoe andrõ, si so ba zoroego, daʼõ dalifoesõgoe matoea ba talifoesõgoe alawe ba inagoe.
Currently Selected:
MATAIO FAZA 12.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.