MATAIO FAZA 11.
FAZA 11.
I. Ifatenge chõ Jesoe nifahaõnia Johane andrõ. II. Faʼeboea Johane. III. Itegoe mbanoea andrõ si lõ moloʼõ, Jesoe. IV. Ikaoni chõnia zerege tõdõ.
(A. 11, 2—6: Loek. 7, 18—23)
1I. Ba me no iʼoʼozoei Jesoe wamobawa lala andrõ ba nifahaõnia si felendroea andrõ, ba mofanõ ia ba daʼõ, mõi ia mamahaõ ba mangombacha ba mbanoea chõra misa. 2Ba me irongo nifazõchi Jesoe Johane andrõ, ba goeroenga, ba ifatenge nifahaõnia, (F. 14, 3), 3ifasofoeʼõ chõnia, imane: Hadia, jaʼoegõ zi mõi andrõ, ma mabalobaloi dánõ bõʼõ? (Moz. V. 18, 15). 4Ba itema lira Jesoe, imane chõra: Miʼae miʼombachaʼõ chõ Johane nirongomi, awõ niʼila hõrõmi andrõ. 5Ifoeli laʼila niha saoeʼa, ba mowaõwaõ zomboejoemboejoe tõla, dõhõ mbooe aoeri ba larongo li niha safiso, ba maoso zi mate, ba ba zi noemana teʼombachaʼõ doeria somoeso dõdõ, (F. 15, 30. 31. Jes. 35, 5; 61, 1), 6ba jaʼahowoe ba zi lõ fatoewoe ndraʼo.
(A. 11, 1—19: Loek. 7, 24—35)
7II. Ba me no mofanõ daʼõ, ba ibõrõtaigõ Jesoe, imane ba niha sato, ba chõ Johane andrõ: Hadia nifaigimi, wa mõi baero ami ba danõ si mate? Hadia, soechoe, nifaheoeheoe nangi? 8Ma hadia, wa mõi baero ami? Hadia, ba wamaigi niha sonoecha somboejoemboejoe? Hiza, ba nomo razo so zonoecha somboejoemboejoe. 9Ma hadia, wa mõi baero ami? Hadia, ba wamaigi samaʼeleʼõ? Si ndroehoe niw̃aʼõgoe chõmi, si tõra samaʼeleʼõ. (Loek. 1, 76). 10Jaʼia zi so ba zoera: ”Hiza, oefowaõwaõ fõnaoe zinengegoe, sangehao lalamõ fõnaoe.” (Mal. 3, 1. Mar. 1, 2). 11Si ndroehoe niw̃aʼõgoe chõmi, lõ irai so zeboea moroi chõ Johane andrõ, samajagõ idanõ, ba niʼadonogõ ndra alawe, ba fondrege zideʼide ba mbanoea zoroego andrõ ba no eboea moroi chõnia. 12Ba iʼotarai loeo Johane andrõ, samajagõ idanõ, iroegi daʼe, ba teforege wangaloei banoea zoroego andrõ, ba samorege andrõ, daʼõ zondraʼoe jaʼia chõra. (Loek. 16, 16). 13Noa sa mamaʼeleʼõ zamaʼeleʼõ andrõ fefoe, awõ goroisa, iroegi Johane, 14ba na edõna ami, ba jaʼia Gelija andrõ, niw̃aʼõ si so. 15Si so tõgi dalinga, ba jamoefondrondrongo! (F. 13, 9). 16Ba ha chõ oefaoedoegõ niha andre? Amaedola ndraono ira, sidadao ba kade, 17siʼao ba nawõra, lamane: No malaoe zigoe chõmi, ba lõ solaja ami, no meʼe ndraʼaga, ba lõ saboe dõdõmi. 18Noa sa so Johane andrõ, lõ manga ba lõ mamadoemadoe hadia ia, ba lamane: Sobechoe. (F. 3, 4). 19Ba no so Nono Niha, mangamanga ba mamadoemadoe hadia ia, ba lamane: Hiza niha soloeʼaloeʼa, samadoemadoe agoe, si fahoewoe ba zanema beo andrõ ba ba zeboea horõ; ba tobali sa famoeʼa ba hoeloe waʼatoeatoea andrõ nifazõchi dangania. (F. 9, 10. Joh. 2, 2).
20III. Ba daʼõ ibõrõtaigõ ihedehedeʼõ mbanoea andrõ, ba zoja tefazõchi tandra andrõ chõnia, me lõ nifalalinira eraʼerara, imane: 21Alai ndraʼoegõ, Chorasi! alai ndraʼoegõ, Betisaʼida! Na ba Diro ba na ba Zidona menaʼõ tefazõchi dandra andrõ, nifazõchi ba chõmi andrõ, ba na fõna saʼae lafalalini geraʼera menaʼõ, no laʼonoecha goni, ba no lalaoe nawoe ba hõgõra menaʼõ. (Hes. 2. ba 27. Job. 42, 6). 22Ba oew̃aʼõ na chõmi: Õnaʼõna na zi gõna Diro ba Sidona, na loeo wangoehoekoe andrõ, moroi ba zi gõna ami. 23Ba jaʼoegõ, Kafanaoema, tenga no moeʼalaw̃aʼõ ndraʼoegõ, iroegi mbanoea si jaw̃a? Iroegi mbanoea tooe tetiboʼõ ndraʼoegõ dania. Na ba Zodoma menaʼõ tefazõchi dandra andrõ, nifazõchi ba chõmõ andrõ, ba lõ si teboelõ ia menaʼõ, iroegi maʼõchõ andre. 24Ba oew̃aʼõ na chõmi: Onaʼõna na zi gõna mbanoea Zodoma andrõ, na loeo wangoehoekoe andrõ, moroi ba zi gõna ndraʼoegõ. (F. 10, 15. Loek. 12, 47). 25Me loeo daʼõ hoemede Jesoe, imane: Oesoeno ndraʼoegõ, Ama, Sochõ soroego, awõ danõ, me no õbiniʼõ daʼõ ba zatoeatoea, awõ ba zoneche, ba me no õfaʼeleʼõ ia ba ndraono. (F. 5, 3. Kor. I. 1, 19—29). 26Jaʼia, Ama, me no waʼomasioe zi manõ. 27Fefoe hadia ia, ba no ibeʼe ba dangagoe Amagoe. Ba lõ saboto ba dõdõ Ono, baero Nama, ba lõ saboto ba dõdõ Ama, baero Nono, awõ ba zedõna ifaʼeleʼõ Ono. (Joh. 1, 18; 3, 35; 14, 6. F. 28, 18).
28IV. Miʼaine chõgoe, dozi serege tõdõ, awõ zonoro, ba oefolombase ami. (Jer. 31. 25). 29Mihareʼõ chõmi kalo mbagi andrõ chõgoe ba mitõngõni chõgoe, me no sebolo tõdõ ndraʼo ba si lõ fajaw̃a tõdõ, ba faloecha ami wolombase dõdõmi. (Sach. 9, 9. Fil. 2, 5 b. t.) 30Mogoena sa kalo mbagi andrõ, chõgoe, ba no aoha noro andrõ chõgoe. (Joh. I. 5, 3).
Currently Selected:
MATAIO FAZA 11.: NIA
Highlight
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.