SOERA JOBI FAZA 5.
FAZA 5.
Tohoetohoe hoehoeo Gelifasi: I. He wisa ba zi lõ tõdõ. II. Famarooe tõdõ ba wanõtõna chõ Lowalangi, ba III. ba wanehe fotoe andrõ chõnia.
1I. ”Tema ao! Hadia so maõ zanema lioe? Ha chõ õtandrõsaigõ lioe, ba niʼamoniʼõ andrõ?
2Ba zambõ tõdõ, ba mõi famoenoenia walõsõchisõchi dõdõnia, ba sowõhõ mowa, ba iboenoe fõchõ dõdõnia.
3No oeʼila zambõ tõdõ sow̃aʼa, ba oeʼanemaʼõ oeʼelifi nahiania. (Sin. 37, 35; 73, 19).
4Ba ndraononia, ba no arõoe wangorifi; mõi ira nihoendragõ ba mbawa gõli, lõ sangorifi.
5Basitõnia, ba iʼā solofo — he nibaʼa doi, ba ihalõ — ba sowõchi tõdõ zoraboe nibajabajania.
6Tenga sa ba gawoegawoe toemboe wamakiko, ba famakao, ba tenga saoeri ba danõ.
7Niha andrõ, ba ba wamakao saʼae toemboe, si mane faʼatokana mijaw̃a nono galitõ ba holahola galitõ.
8II. Ba na jaʼo, ba oefoeli enaʼõ chõ Zi lõ ambõ faʼabõlõ, ba Lowalangi oetoenõ hoehoeogoe enaʼõ.
9Ba zolaoe seboea, si tebai aboto ba dõdõ niha, ba sahõlihõli dõdõ, si lõ moetaha moeʼerai, (Sin. 40, 6; 72, 10. Rom. 11, 33),
10sameʼe teoe ba danõ ba somboewoei bolo nowi.
11Sangalaw̃aʼõ jaw̃a si so tooe, ba wolohe ba wangorifi saboe tõdõ, (Sam. I. 2, 7. Sin. 113, 7. Loek. 1, 52).
12Si lõ boto ibeʼe nifachai zoneche, fa tebai mofozoe nilaoe dangara. (Sam. II. 17, 14. Jes. 8, 10).
13Iraʼoe zatoeatoea, ba waʼonechera andrõ, ba amaedola zi tetaroe bagi nichoi dõdõ zi tõrá faʼoneche. (Kor. I. 3, 19).
14Ba zi maʼṍchõ ihawoei ira faʼogõmigõmi, ba hoelõ na ba zi bongi labajaisi lalara ba zi laloeo. (Moz. V. 28, 29).
15Ba tobali iʼefaʼõ zi noemana ba mbawa ziʼõli si otarai mbewera, ba ba danga zabõlõ iʼefaʼõ.
16Ba toemboe wanõtõna [fangorifi], ba zideʼide ba tefaʼafoe mbawa walõsõchi. (Sin. 107, 42).
17III. Hiza, jaʼahowoe niha nitegoe Lowalangi! — andrõ bõi fatoewoe chõoe wotoe andrõ chõ Zi lõ ambõ faʼabõlõ. (Amaed. 3, 11. Heb. 12, 5. Jak. 1, 12).
18 Ifesocho sa niha, ba ifoeli gõi idaloedaloeni; ifoeloe, ba sangorifi dangania. (Sam. I. 2, 6. Hos. 6, 1).
19 Õnõ ngawalõ waʼatosasa, ba iʼefaʼõ ndraʼoegõ, ba ba wanete zi õnõ, ba lõ gõnaʼõ si lõ sõchi. (Sin. 91, 4. Amaed. 24, 16).
20Na lofo mbanoea, ba iʼorifiʼõ, fa lõ mate ndraʼoegõ, ba ba wanoewõ, ba itimba chõoe mbawa ziʼõli. (Raz. I. 17, 14. Sin. 18, 30).
21Tebaʼa ndraʼoegõ ba mbõzibõzi lela andrõ, ba lõ ataʼoeʼõ na itõrõ famoefoe.
22Saʼiki ndraʼoegõ, na so wamoefoe ba ma faʼeboea mbõli mbalazo, ba alacha lõ ataʼoeʼõ goetoe ndroeʼoe.
23Noa sa fawoeʼoe li ndraʼoegõ ba gara ba danõ, ba no fahoewoe chõoe goetoe ndroeʼoe. (Hos. 2, 18).
24Ba faloechaʼõ lõ hadia ia ba noseoe, ba na õfaigi nibajabajamõ ba nahiaoe, ba lõ hadia zi lõʼõ.
25Ba faloechaʼõ ato maʼoewoemõ, ba madooemõ, ba si mane doeʼoe ba danõ.
26Ba ginõtõ waʼatoea õroegi lewatõ, si mane na teʼohe mijaw̃a mboea nowi, na inõtõ.
27Hiza, daʼõ ia niʼaloealoeima tõdõma, si manõ ia; fondrondrongo, ba beʼe ba dõdõoe!”
Currently Selected:
SOERA JOBI FAZA 5.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.