SOERA JOBI FAZA 4.
FAZA 4.
Hoehoeo Gelifasi, si fõfõna: I. Tebai tetiko zatoelõ tõdõ. II. Ba samõsa lõ niha satoelõ fõna Lowalangi.
1I. Ba itema li Jobi Elifasi, banoea Dema, imane:
2”Ma dania aboea chõoe, na taw̃aʼõ maʼifoe chõoe niw̃aʼõda; ba ha niha zangila mombaʼa taroma linia?
3Hiza, no ato nifolalamõ tõdõ, ba no õfoeli õʼabeʼebeʼeʼõ danga si no adada.
4Ha niha zalaoe menaʼõ, ba no taroma lioe zangabeʼe, ba no õʼabõlõʼõ gahe si no mangiwa.
5Ba iadaʼe, me jaʼoegõ zi gõna, ba aboe dõdõoe; me itõrõ ndraʼoegõ, ba tokeaʼõ.
6Hadia, tenga fangabeʼe dõdõoe wangataʼoefioe Lowalangi, ba tenga tõtõnafõoe waʼatoelõmõ andrõ?
7Eraʼera tõdõoe, na no irai faloecha zi tekiko, si lõ horõ; hadia, no irai tehori zatoelõ tõdõ?
8Ndrege niʼilagoe, ba samakoe si lõ sõchi ba sanaroe famakao, daʼõ gõi zamasi jaʼia. (Amaed. 1, 31; 22, 8. Hez. 10, 13. Gal. 6, 8).
9Ihehaini ira Lowalangi, ba tekiko ira, ba hanoehanoe wõnoenia andrõ ariri.
10Fendrõndrõndrõndrõ zingo ba li harimo — ba ifõ nono zingo, ba no moefatõ.
11Mowaõwaõ manõ zingo, si lõ boto, me no ambõ ahoeloea — ba ono zingo, ba moezaewe.
12II. Ba no oerongo daroma li, si lõ abõlõbõlõ; mõi ba dõgi dalingagoe wangõngõngõngõsa.
13Na ifakoli ia eraʼera ba gangilata ba zi bongi, na ihawoei niha femõrõ sabeʼe.
14No ihawoeido fanizinizi ba fogichi, manizinizi dõlagoe fefoe.
15Itõrõdo angi ba moetaro mbõrõ boe ba nõsigoe.
16Ba so ia fõnagoe — chalachala mbawania, ba lõ oeʼila — famaedo niha ba doedoema hõrõgoe; ba oerongo wangõngõngõngõsa, imane:
17’Hadia, so maõ niha, satoelõ fõna Lowalangi, hadia, so zamõsa, si no ohaoehaoe fõna zombõi jaʼia?’ (Sin. 143, 2. Rom. 3, 10).
18Hiza, ba genoninia andrõ aombõ dõdõnia ba ba malaʼika andrõ chõnia so waʼeloengoe iw̃aʼõ. (F. 15, 15).
19Ba tenga mendroea manõ ba zi so ba nose laʼoeri, si otarai gawoegawoe tooe wamobõrõ, safoefoe na itõrõ hama. (Kor. II. 5, 1).
20Lõ ichamõ maʼṍchõ, ba arasa, tekiko ira lõ fangorifi saʼae, ba lõ sameʼe ba dõdõ.
21Na aetoe zinali ba nosera andrõ [nosora] ba mate manõ ira, ba waʼambõ tõdõ andrõ.
Currently Selected:
SOERA JOBI FAZA 4.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.