SOERA JOBI FAZA 3.
FAZA 3.
I. Iʼelifi mbaw̃a waʼatoemboenia Jobi. II. Mangarõngarõ ia ba wamakao andrõ.
1I. Aefa daʼõ, ba hoemede Jobi, iʼelifi mbaw̃a waʼatoemboenia. (F. 10, 18. Jer. 15, 10; 20, 14).
2Hoemede ia, imane:
3”Jatekiko mbaw̃a andrõ, ba zi toemboe ndraʼo, ba bongi andrõ, me law̃aʼõ: No toemoege nono matoea!
4Jaʼogõmigõmi mbaw̃a daʼõ; bõi jamoesofoe ia Lowalangi si jaw̃a ba bõi jatobaha chõnia faʼamoloeo!
5Ndramoeʼandrõ mangawoeli ia faʼogõmigõmi ba si bongi; jamoehawoei ia salōē ba jamoefetaʼoe ia fangogõmigõmisi zi moloeo. (Sin. 23, 4).
6Bongi andrõ, ba jamõi ondraʼoea zogõmigõmi: Bõi omoeso dõdõnia ba ngenoli mbaw̃a ndrõfi andrõ, bõi jalaʼerai awõ mbaw̃a bõʼõ.
7Ja lõ toemboe niha saʼae ba mbongi daʼõ: bõi jaʼowoeawoea dõdõ niha ba chõnia!
8Ndramoeʼelifi ia sangelifi baw̃a, sangila mamarooe malioe.
9Jandroendroemõ ndrõfinia na aracha moloeo: jamoedõnadõna haga — zajazaja gõlõ! alõsoe bõi jamoeʼila hõrõ waʼamoloeo!
10Me lõ nidoehõnia chõgoe taloe ninagoe ba me lõ nibiniʼõnia chõgoe famakao, fa bõi iʼila hõrõgoe!
11II. Hana wa lõ mate ndraʼodo ba daloe ninagoe? hana wa lõ aetoe nosogoe, me bõla ndraʼo?
12Hana wa nihagi na ndraʼodo ba hana wa laʼoroʼõ chõgoe mbalõ meme, nisisiõgoe?
13Tobali no adõlõ tooe ndraʼo menaʼõ iadaʼe, ba molombase; mõrõ menaʼõ ndraʼo ba ahono dõdõgoe,
14awõ razo ba awõ goemandroe, sangotomosi chõra adoedoela,
15ba ma awõ zalaw̃a seboea anaʼa, samoʼõsi omora firõ.
16Ba ma zoei si mane tabina saechoe, nikoʼo ba danõ; lõʼõ manõ jaʼodo, si mane tabina, si lõ irai mangila haga zi moloeo.
17Ba daʼõ labato wabõtoesa seboea horõ ba ba daʼõ ahono zi no atage.
18Sohahaoe dõdõ nikoeroe fefoe, lõ larongo li mandroe.
19He iraono ba he satoea, ba fagõlõgõlõ ba daʼõ, ba aefa zawoejoe chõ zochõ jaʼia.
20Hana wa ifohaga zi noemana, ba hana wa iʼorifi zaboe tõdõ?
21Si dõnadõna faʼamate ba lõ aloea, sangaloei jaʼia moroi ba wangaloeinia anaʼa. (Fam. 9, 6).
22Somoeso sibai tõdõ, si karaini faʼiki enaʼõ, na faloecha lewatõ. —
23Hana wa tefohaga niha, si no tobini lala, nibaʼa Lowalangi fasoei? (F. 19, 8).
24Noa sa salahi gõgoe wangarõngarõ ba no amaedola gelea wegeʼegegoe andre.
25Na ataʼoedo hadia ia, ba no gõnado jaʼia, ba hadia zihocha mboegoe, ba itõrõdo.
26Lõ si faloechado na waʼahono, ba he folombase ba he faʼohahaoe dõdõ, ba hiza saʼae [zoei] wamahoefa!”
Currently Selected:
SOERA JOBI FAZA 3.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.