SOERA JOBI FAZA 27.
FAZA 27.
Tohoetohoe hoehoeo Jobi: I. Si lõ horõ ia iw̃aʼõ. II. Ba si lõ horõ, ba mõna ba gafoeriata, ba si tekiko dania zeboea horõ.
1I. Ba itohoegõ hoehoeonia Jobi, imane:
2”Ba waʼadoehoe waʼaoeri Lowalangi, si no mombaʼa chõgoe lala, faʼaoeri Zi lõ ambõ faʼabõlõ andrõ, si no mamoesi tõdõgoe —
3Aʼoi sa so na nosogoe barõ dotogoe, ba hanoehanoe Lowalangi andrõ ba nichoegoe —:
4Tenga faja nilaoe mbewegoe, ba tenga falimosa loealoea lelagoe.
5Ja arõoe chõgoe wanehe niw̃aʼõmi andrõ; irege aetoe nosogoe, ba lõ oebõhõli wa lõ horõgoe.
6Oeʼaroʼõ chõgoe waʼatoelõgoe, lõ oebõhõi; sara loeo chõgoe lõ itegoedo tõdõgoe.
7Ja oroma, wa solalõ noedoegoe andrõ, awõ wa si lõ atoelõ zolaw̃a jaʼodo!
8II. Hadia sa dõtõnafõ zanaonao horõ, na iʼetoeʼõ nosonia Lowalangi, na ideha ba dotonia?
9Hadia, ifondrondrongo weʼaonia Lowalangi, na gõna ia faʼatosasa? (Sin. 18, 42. Jes. 1, 15. Jer. 11, 11. Hez. 8, 18. Mich. 3, 4. Joh. 9, 31).
10Hadia, tola iʼomoesoiʼõ tõdõnia Zi lõ ambõ faʼabõlõ, ba tola ero maʼṍchõ iʼangarõfi li Lowalangi?
11Daʼoefahaõ ami ba nilaoe danga Lowalangi andrõ; lõ oebiniʼõ chõmi, he wisa dõdõ Zi lõ ambõ faʼabõlõ.
12Hiza, no miʼila, jaʼami andrõ, dozi; ba hana wa mifaʼoea wajafaja?
13Daʼõ dána ba niha si lõ sochi chõ Lowalangi, daʼõ zinema zamakao awõnia, nitemania chõ Zi lõ ambõ faʼabolõ: (F. 20, 29).
14Na oja nononia, ba õ mbawa ziʼõli, ba madooenia, ba no sambõ balazo.
15Si tosai soroijomonia, ba mõi barõ danõ, na teoe mbanoea, ba lõ mangeʼesi lacha mbanoea andrõ chõnia.
16Na ihõna wirõ, timba nene, ba na iʼojaʼõ noecha, timba damboe newali [waʼoja] —
17jaʼia zangõhõna, ba satoelõ zi onoecha, ba firõ andrõ, ba lafaosa chõra si lõ horõ. (Amaed. 28, 8).
18Ilaoe nahiania, nifolaoe galaw̃a; hoelõ nose, nitaroeʼõ zanaro hadia ia, ibeʼe.
19Seboea anaʼa na ia, na mõi ia mõrõ, ba lõʼõ saʼae samoeza tõ; tokea ia, ba lõ jaʼia saʼae.
20Ihawoei ia ametaʼoeõ, hoelõ molõ; ba zi bongi iʼoloiʼõ ia angi sabõlõ. (F. 18, 11).
21Ifazaw̃a ia angi timoe, ba noemalõ misa; iʼoloiʼõ ia, aheta ba nahania.
22Ilaoe chõnia [Lowalangi], lõ faʼahachõ dõdõ, ba moloiloi ia, ba dangania andrõ [ba danga Lowalangi].
23Ba lalaoe datawṍ chõnia, ba fasī chõnia, moroi ba nahania mege.”
Currently Selected:
SOERA JOBI FAZA 27.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.