SOERA JOBI FAZA 22.
FAZA 22.
Hoehoeo Gelifasi, medõloe mõi daʼõ: I. Si lõ sõchi Jobi, iw̃aʼõ, oja horõnia. II. Idaõʼõdaõʼõ chõnia wõnoe Lowalangi. III. Jamoefalalini geraʼerania, ba ifoeli isõndra waʼohahaoe dõdõ.
1I. Ba itema li Jobi Elifasi andrõ, banoea Dema, imane:
2”Hadia, chõ Lowalangi mogoena wolaoe nihá? Tenga sa chõnia, samboea jaʼia, mogoena nilaoe zatoeatoea. (F. 35, 7. Loek. 17, 10).
3Hadia, Si lõ ambõ faʼabõlõ zohare, na satoelõ tõdõ ndraʼoegõ? hadia, harenia, na lõ sinegoe chõoe ba nitõrõmõ andrõ?
4Hadia, iʼotoeʼõ wangataʼoefioe Lowalangi? daʼõ mbõrõ, wa iʼohe ba hoekoe ndraʼoegõ?
5Hadia, lõ eboea zi lõ sõchi andrõ chõoe, ba tenga no si lõ aetoe lalõoe?
6Noa sa õhalõ gade nibajabaja dalifoesõoe, lõ bõrõbõrõ, ba no õhalõ gamagama zi lõ baloebaloe. (Moz. II. 22, 26).
7Lõ nifabadoegõoe idanõ ba zi mate owõchi dõdõ, ba lõ nibeʼeoe õ ba zolofo. (F. 31, 16).
8Niha sabõlõ zochõ tanõ, ba salaw̃a sotõi zi onahia.
9Si no mate ira matoea, ba õfofanõ lõ niʼodõra, ba nirasa daʼio zi lõ ama, si lõ ina.
10Andrõ wa no tefasoei ndraʼoegõ fesoe, ba ikeani ndraʼoegõ ametaʼoeʼõ, lõ moedõnadõna.
11Ma lõ õʼila waʼogõmigõmi, awõ molõ andrõ, si nõnõi jaʼoegõ?
12II. Hadia, tenga faʼalaw̃a mbanoea si jaw̃a waʼalaw̃a jaw̃a Lowalangi? Faigi wondrege ndrõfi andrõ, ha waʼalaw̃a jaw̃a?
13Ba õmane na sa: ’Hadia niʼila Lowalangi? Hadia, molala wangoehoekoenia, ba lawoeo sogõmigõmi? (Sin. 10, 11).
14Baʼabaʼa chõnia lawoeo, fa lõ iʼila hadia ia, ba ba dete mbanoea jaw̃a manõrõnõrõ ia.’
15Hadia, õtõrõ lala ba gõtõ fõna, nitõrõ niha sanaonao horõ?
16jaʼira andrõ, niraʼoe, me tenga inõtõ na, sahele dajadaja, timba nidanõ? (Moz. I. 6, 13).
17Sangoemaʼõ chõ Lowalangi: ’Bõi hatõʼõgõ chõma!’ ba hadia nilaoe Zi lõ ambõ faʼabõlõ chõra enaʼõ? (F. 21, 14).
18Ba noa zoei ihõna howoehowoe baomo chõra — ja arõoe chõgoe dõdõ zeboea horõ andrõ! (F. 21, 16).
19Laʼila satoelõ tõdõ, ba omoeso dõdõra, ba iʼoʼaja ira si lõ horõ [imane]:
20’Si ndroehoe, no moehori noedoema, ba si tosai chõra ba no iʼā alitõ!’
21III. Laoe fahoewoe chõnia, fa ohahaoe dõdõoe, famaʼema howoehowoe chõoe.
22Tõngõni lala, ba niw̃aʼõnia andrõ, ba tānõ ba dõdõoe daroma linia.
23Na õfoeliʼõ chõ Zi lõ ambõ faʼabõlõ, na õʼideʼideʼõ ndraʼoegõ, na õheta baose chõoe zi lõ atoelõ, na õʼarõoeʼõ — (F. 8, 5)
24tema tiboʼõ ba danõ lele garamba andrõ, ba oroedoegõ ba nene ba mbombo mbalaki! —
25ba tobali anaʼaoe Zi lõ ambõ faʼabõlõ, ba firõoe, safoesi sibai.
26Owoeawoea sa dania dõdõoe Zi lõ ambõ faʼabõlõ andrõ, ba õfaõga mbawaoe chõ Lowalangi.
27Na õʼangarõfi li ia, ba ifondrondrongo chõoe, ba õboeʼa gamaboeʼoela limõ andrõ. (Sin. 50, 14).
28Na õlaoe hadia ia, ba mofozoe, ba mohaga dõrõw̃aoe andrõ.
29Na mitooe isaw̃a, ba õmane: Ohe jaw̃a! ba itolo zi kõwõ jaʼia, (Amaed. 29, 23. Mat. 23, 12. Jak. 4, 6).
30Iʼorifi zi tenga si lõ horõ, teʼorifi me lõ hadia ia zi falemba ba dangaoe.”
Currently Selected:
SOERA JOBI FAZA 22.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.