SOERA JOBI FAZA 20.
FAZA 20.
Hoehoeo Zofari andrõ, fanete zi fõfõna: I. Tetimba zeboea horõ, si no alaw̃a jaw̃a. II. Falõsõchinia, awõ hoekoe andrõ, si gõna ia dania chõ Lowalangi.
1I. Ba itema li Jobi Sofari andrõ, banoea Naʼama, imane:
2”Andrõ wa hoelõ itema ligoe eraʼeragoe, me no hoemoeloe sibai bacha barõ dotogoe.
3Fanegoe fangailagoe oerongo, ba iʼombachaʼõ sa atṍ chõgoe geloeaha eheha andrõ ba waʼaboto ba dõdõgoe.
4Hadia, lõ õrai õrongo zi no ararā andrõ, faʼara niha ba goeli danõ:
5wa lõ anaoe gõlõ waʼiki zeboea horõ, wa ha mamõʼi hõrõ waʼara waʼomoeso dõdõ zi lõ sõchi? (Sin. 37, 35 b. t.).
6He iroegi mbanoea si jaw̃a wajaw̃asania, ba he ibaja lawoeo hõgõnia,
7ba si mane faʼataja lazania, wa aloea lõ jaʼia dania, ba sangila jaʼia [mege], ba lamane: Heza so ia?
8Si mane faʼataja wangifi waʼatajania, lõ oroma saʼae, tefoloi, si mane loemõloemõ ba zi bongi. (Sin. 73, 20).
9Hõrõ sangila jaʼia mege, ba lõʼõ saʼae iʼila ia, ba lõ mangawoeli ia ba nahania. (F. 7, 8).
10Sondrara tõdõ zi noemana nononia dania, ba samoeli anaʼa [ondraʼoea] dangania.
11He no fahõna waʼabõlõ dõlania, faʼabõlõ nono matoea, ba fao dania chõnia, ba wemõrõ barõ danõ.
12Na āmi ba mbawania zi lõ sõchi, na ibiniʼõ barõ lelania,
13na iʼirõʼõ ba na lõ ibõhõli, na ifalemba ba gararonia:
14ba tobali gõnia ba mbetoeʼania bacha, tobali awõchoe goelõ ba daloenia.
15No iʼā ganaʼa ba ifoeli iʼoetaʼõ, ifoeli iheta ba daloenia Lowalangi.
16Sõfoe goelõ isisiõ mege, ba iboenoe ia lela goelõ sosõfoe.
17Lõ tola iʼomoesoiʼõ dõdõnia ba gelea w̃e w̃ani ba ba gelea soesoe andrõ.
18Ifoeli isaoʼõ baero gõlõnia, lõ tola itõlõ: tebai omoeso dõdõnia ba ganaʼa andrõ nitoekania.
19II. Me no ifakao zi noemana ba me lõ nitolonia jaʼira — no iʼochõgõ nomo, ba lõ iʼaroʼõ.
20Me lõ sahonohono daloenia wangisõ, ba tebai iʼohe zomasi ia ba wangorifi jaʼia enaʼõ.
21Lõ fangorifi, ba woloeʼaloeʼania andrõ, ba andrõ wa si lõ fozoe ganaʼania.
22Ba waʼafahõna zi no aʼoi so chõnia tosasa ia; ihawoei ia faʼabõlõ waʼanoemana andrõ.
23Ba hiza dania: ba wamoʼõsi daloenia, ba itewoegõ bacha [Lowalangi] holahola wõnoenia; ilaoe chõnia deoe, ba mbetoeʼania bacha.
24Na moloi ia, ba gõrõba siʼõli, ba atõla ia ba nono wana tõla. (Amos. 5, 19).
25Ba isõbi, ba adõni ba nõsinia, ba gawõchoenia mege iroegi ichoe ziʼõli: ba ihawoei ia, faʼataʼoenia waʼamate.
26No moehõna wamakiko, hadia ia ngawalõ, ba girõgirõnia andrõ; iʼā ia alitõ, si tenga niʼeboeaʼõ niha; ihori zi tosai ba nosenia. (F. 1, 16).
27Ibokai hõrõnia banoea si jaw̃a, ba mõi oedoenia danõ.
28Sawoeʼa gõlõnia baomonia, idanõ sahele misa, na baw̃a wõnoe Lowalangi.
29Daʼõ goeracha niha seboea horõ, chõ Lowalangi, daʼõ dána chõnia, ondrõita, nihonogõi Wondrege zalaw̃a chõnia.”
Currently Selected:
SOERA JOBI FAZA 20.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.