SOERA JOBI FAZA 16.
FAZA 16.
Fanedema Jobi: I. Mangarõngarõ ia ba wa lõ faʼahachõ dõdõ nawõnia andrõ. II. Faʼalaʼalai ia ba wamakaonia. III. Lõ horõnia iw̃aʼõ.
1I. Ba itema li Gelifasi andrõ Jobi, imane:
2”No fahõna oerongo zi manõ; sondrara tõdõ fangaboe dõdõ ami fefoe. (F. 13, 4).
3Hadia, aetoe saʼae hoehoeo si lõ boto andrõ? ma hadia wamarooe dõdõoe, wanedema ligoe?
4Tola sa oelaoe gõi hoehoeo nilaoemi, asala si mane tõdõgoe gõi dõdõmi; tola sa oefachai enaʼõ hoehoeo chõmi, ba tola oefalichõ ndraʼo ba chõmi andrõ.
5Ba oeʼabeʼeʼõ enaʼõ dõdõmi bawagoe andre ba oerara dõdõmi bewegoe.
6II. Na hoemede ndraʼo, ba lõ alõ waʼafõchõ andre chõgoe; ba na lõ hedehedegoe, ba hadia waʼalõ?
7Ba ijaʼe, ba no erege dõdõgoe ibeʼe; no õseʼe zoroijomogoe fefoe;
8no õraʼoe ndraʼodo, daʼõ wamadoehoeʼõ. Tobali oedoegoe waʼaririgoe andrõ, ikaoni ba mbawagoe wangadoegõ jaʼo. (F. 10, 17).
9Isasawi ndraʼo fõnoenia andrõ, isoewõ ndraʼodo; ifatangi mbohania chõgoe: no oedoegoe ia, iʼatarõsi hõrõnia chõgoe. (F. 13, 24).
10No lafaboka mbawara chõgoe, lafalisi mbawagoe, faʼailagoe; laʼosaraʼõ dõdõra fefoe, oedoegoe. (Mich. 5, 1).
11No iloeloe ndraʼo Lowalangi, ba zolaoe si lõ atoelõ, no itooeʼõ ndraʼo ba danga zeboea horõ. (Sin. 22).
12Sohahaoe tõdõ mege ndraʼodo, ba iʼogomoezaõ ifoefoe ndraʼo; no itoejoe mbõrõ doeʼigoe, ba no irasa ndraʼo, ba no ibeʼedo tandra wana chõnia.
13Tehawoe ndraʼo ono wana chõnia; ifabali mboeagoe, lõ faʼahachõ dõdõ, adoewa ba danõ nõsi gawõchoe chõgoe ibeʼe. (F. 6, 4).
14Atõlatõla ndraʼodo ibeʼe, ihawoei ndraʼo, si mane sanoewõ.
15No oebeʼe baloebaloe gigimõgoe andrõ gonigoni, oetagoe, ba no oetaroeʼõ ba danõ tooe dandroegoe. (F. 30, 19).
16No ojo sibai mbawagoe, ba wegeʼege andrõ, ba ba mboe hõrõgoe, ba so loemõ waʼamate.
17He w̃aʼae lõ si lõ atoelõ, si falemba ba dangagoe, ba he w̃aʼae lõ famini tõdõ ba wangandrõgoe andrõ.
18III. He jaʼoegõ tanõ, bõi baloegõ ndrogoe andrõ! Bõi jafaloecha wolombase wangarõngarõgoe andrõ:
19Ijaʼe saʼae, ba hiza, ba ba zoroego andrõ so zamadoehoeʼõ, chõgoe, ba ba zalaw̃a jaw̃a so zi so ba wali chõgoe.
20He w̃aʼae fasali chõgoe nawõgoe, ba chõ Lowalangi ifaõga ia hõrõgoe, moʼalaʼala.
21Enaʼõ iboeʼa ba hoeloe niha, chõ Lowalangi, ba ba hoeloe nono niha, ba chõ nawõnia.
22Lõʼõ sa oja tõ ndrõfi, ba oetõrõ lala si lõ fangawoeli.”
Currently Selected:
SOERA JOBI FAZA 16.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.