SOERA JOBI FAZA 15.
FAZA 15.
Hoehoeo Gelifasi, fanete zi fõfõna: I. Itegoe Jobi ba hoehoeonia fajaw̃asa andrõ. II. Samõsa lõ niha satoelõ. III. Famakao ba fõchõ, ba no loealoea walõatoelõ.
1I. Ba itema li Jobi Elifasi andrõ, banoea Dema, imane: (Jer. 49. b. t.).
2”Hadia, ilaoe maõ hoehoeo nifahocha niha satoeatoea, wanedema li, ba hadia, ifoʼõsi narõ dotonia angi timoe —
3fasosota si lõ boto ba hoehoeo si lõ goena?
4Ba õfaraʼoe naʼi wangataʼoefi Lowalangi, ba taja geraʼera ba wangandrõ chõ Lowalangi, õbeʼe.
5Horõoe andrõ saʼae wangatoeatoea mbeweoe, ba hoehoeo zoneche õtoejoe.
6Bawaoe andrõ zangetoeʼõ hoekoemõ, ba beweoe andrõ zi mõi sasi, oedoemõ.
7Hadia, si aʼa niha ndraʼoegõ, me toemboeʼõ, ba si aʼa ndraʼoegõ moroi ba hili ba danõ, me bõrõtaoe?
8Hadia, no õrongo dõdõ Lowalangi, ba no õraʼoei waʼatoeatoea? (Rom. 11, 34).
9Hadia niʼilaoe, si lõ maʼila enaʼõ, ba hadia zaboto ba dõdõoe, si lõ aboto ba dõdõma?
10Ba chõma gõi so zatoea ba si no tohare hoewa, sarā ba goeli danõ, moroi ba waʼarā namaoe! (Jer. 49, 7).
11Hadia, ambõ chõoe wondrara tõdõ andrõ, chõ Lowalangi, ba fangehao li andrõ chõoe?
12Hadia wa ifarooe ndraʼoegõ falõsõchisõchi dõdõoe, ba hadia wa tegaõlõgaõlõ bacha hõrõoe,
13wa no maoso dõdõoe chõ Lowalangi, wa aloea ba mbeweoe wehede [si manõ]? (Jak. 3, 6 b. t.)
14II. Hadia niha, fa sohaoehaoe ia enaʼõ, ba he moroi waʼatoelõ niʼadonogõ ndra alawe? (F. 4, 17. Sin. 14, 3).
15Hiza, ba niʼamoniʼõ andrõ chõnia naʼi aombõ dõdõnia, ba banoea si jaw̃a, ba tenga sohaoehaoe wamaiginia. (F. 25, 5; 1, 6 b. t.).
16Ba mendroea manõ niʼogorofi andrõ, si no fakoejoe manõ — niha andrõ, samamadoe idanõ si lõ atoelõ.
17Daʼoeʼombachaʼõ chõoe, fondrongondrongo chõgoe, ba hadia zi no iʼila hõrõgoe, ba oedoenõdoenõ chõoe.
18Niʼombachaʼõ zatoeatoea andrõ, si lõ labiniʼõ, si otarai gõtõ ndra toea saʼae.
19Chõra manõ na danõ; lõʼõ na sa niha bõʼõ si fatewoe chõra.
20III. Ba zeboea horõ, ba sagõtõ jaʼia, ba lõ aefa waʼafõchõ, ba no moehoekoe ndrõfi ba zi hõndrõgõ awõnia.
21Hoemõngõ ba dõgi dalingania zataʼoe ita; na lõ hadia ia taw̃aʼõ, ba ihawoei ia samoefoe. (Tes. I. 5, 3).
22Aetoe chõnia wanõtõna faʼaefa ba zogõmigõmi, ba no moehonogõi chõnia mbawa ziʼõli.
23Mowaõwaõ ia misa, mangaloei gõ — ba heza so? — iʼila, wa no moebeʼe fõnania mbaw̃a si lõ haga. (Sin. 59, 16; 109, 10).
24Ikeani ia faʼaboe dõdõ ba faʼataʼoe; iraʼoe ia, si mane razo si no mamaʼanõ jaʼia ba wanoewõ,
25me no iʼoroʼõ dangania, faʼoedoesa ba Lowalangi, ba me no ilaw̃a Zi lõ ambõ faʼabõlõ.
26Amaedola isoewõ — no abeʼe mbõrõ doeʼi — ilaoe hoeloe mbaloesenia, si no aweʼeweʼe,
27me no ibeʼe baloebaloe mbawania dawõ ba me no motawõ gõi lõwilõwinia, (Moz. V. 32, 15. Sin. 17, 10),
28me no iʼagõ mbanoea nilachaʼõ, ba me no iʼonahia nomo, si lõ tola so niha, si no moehonogõi adoedoela. (Raz. I. 16, 34).
29Lõ faloecha moʼanaʼa, ba lõ aró ba dangania nibajabajania, ba lõ adada ba danõ nifaʼoea zi manõ.
30Lõ aefa ia ba zogõmigõmi; lewiõnia, ba okõli ba galitõ, ariri ia ba wõnoe Lowalangi. (F. 4, 9).
31Bõi abeʼe dõdõnia ba waja, eloengoe ia: faja sa dania wangali.
32Lõʼõ na sa iroegi baw̃ania, ba no itõrõ, ba aleoe mboeloe nohi chõnia.
33Itoroegõ mboeania si lakiritõ, si mane agoe, waʼatoroe mbowonia, si mane faʼatoroe mbowo falo.
34Ngaʼõtõ zeboea horõ, ba no timba zi mate, ba alitõ zi manga nose zi manga ganaʼa.
35Manabina famakao ira, ba laʼadonogõ wamakiko; faja loealoea daloera.” (Sin. 7, 15. Jes. 59, 4).
Currently Selected:
SOERA JOBI FAZA 15.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.