SOERA GESERA FAZA 9.
FAZA 9.
I. Fangai Ndraono Gizeraëli ono alawe ba niha baero. Faʼaboe dõdõ Gesera ba daʼõ. II. Fangandrõnia.
1I. Ba me no moeʼasiwai daʼõ, ba laʼondrasi ndraʼo satoea, ba lamane: Lõ niʼoniagõ Ndraono Gizeraëli sato ba ere ba Ono Lewi jaʼira ba niha baero ba danõ, si no si nangea enaʼõ, ba zogoro ita andrõ, ba Ndrawa Ganaʼana andrõ ba ba Ndraono Cheti ba ba Ndraono Weresi ba ba Ndraono Jeboesi ba ba Ndraono Gamoni ba ba Ndrawa Miseraji. 2Noa sa lahalõ nonora alawe õsa foʼomora ba foʼomo ndraonora, ba tobali faroeka danõmõ niha niʼamoniʼõ andrõ ba danõmõ niha ba danõ, ba no salaw̃a ba satoea zamobõrõ lalõ andrõ. (Moz. V. 7, 3). 3Ba ha siʼaikõ oerongo wangadoe andrõ, ba oetika mbaroegoe, awõ lembegoe ba oedõdõni mboe hõgõgoe, awõ gambigoe, ba moedadaodo tooe, lõ hedehede, bõrõ lalõ zangawoeli andrõ moroi ba niʼoloiʼõ jaʼira mege. 4Ba laʼondrasi ndraʼo dozi sangataʼoefi oroisa Lowalangi Ndraono Gizeraëli. Ba doemaodao manõ ndraʼo lõ hedehede, iroegi ginõtõ wameʼe soemange tánõ owī. (Moz. II. 29, 41). 5Ba me inõtõ wameʼe soemange tánõ owī, ba maoso ndraʼo, oebato wamakao jaʼo andrõ ba oefoeli oetika mbaroegoe, awõ lembegoe; ba oetoehi danõ tooe ba oeʼoroʼõ dangagoe chõ Lowalangigoe Jehowa.
6II. Ba oemane: ”He Lowalangi, saila sibai ndraʼodo, tobali tebai oefaõga mbawagoe chõoe, jaʼoegõ, Lowalangigoe! Noa sa ilawoei ndraʼaga lalõma, no eboea sibai horõma, iroegi mbanoea si jaw̃a. (Sin. 38, 5). 7Iʼotarai gõtõ ndra toeama, ba no eboea horõma, ba iroegi maʼõchṍ andre. Ba bõrõ lalõma andrõ, wa no niloeloe manõ ndraʼaga, jaʼaga ba salaw̃a ba ere chõma, wa no moebeʼe ba danga razo niha baero ndraʼaga ba ba mbawa ziʼõli ba ba wangoloiʼõ jaʼaga ba ba woraboe niha bõʼõ ba ba waʼaila, si mane maʼõchṍ. 8Ba ijaʼe, ba no faloechaga waʼahachõ dõdõ Lowalangima Jehowa, si lõ ararā na, me no isaigõ na chõma zaoeri, õsa, si lõ atotó, ba me no [ifoeli] ifonahia ndraʼaga ba naha niʼamoniʼõ andre chõnia, enaʼõ ifehaga hõrõma Lowalangima, ba enaʼõ [ifoeli] ibeʼe chõma waʼaoeri maʼifoe, ba waʼasawoejoema andre. 9Noa sa sawoejoe ndraʼaga, ba no lõʼõ zoei niʼerogõ Lowalangima jaʼaga, ba waʼasawoejoema andre, noa sa ibeʼe faloecha waʼahachõ dõdõ razo Weresia ndraʼaga, ba no tobali laʼorifi ndraʼaga, ba wolaoe osali Lowalangima andrõ, ba ba wangaʼazõchi adoedoelania, ba ba wolaoe nahiama ba danõ mado Joeda ba ba Jeroezalema, nahia nikõlini õli kara. 10Ba ijaʼe, jaʼoegõ Lowalangima, hadia niw̃aʼõma ba daʼõ? 11Me no maʼerogõ goroisamõ, nifabeʼeʼõmõ chõma ba genonimõ andrõ, samaʼeleʼõ andrõ, me õmane: Tanõ andrõ, niroegimi dania, ba wangochõgõ jaʼia, ba no tanõ si raʼiraʼiõ, bõrõ waʼaraʼiraʼiõ niha ba danõ andrõ, sogoro ita andrõ chõra, nihõnara ba danõ maʼasagõrõ, ba waʼaraʼiraʼiõra andrõ. (Moz. II. 18, 25). 12Ba bõi mibeʼe ba nonora matoea nonomi alawe, ba bõi mihalõ oemõnõmi nonora alawe, ba bõi mitolo ira ba wangaloei faʼohahaoe dõdõra ba sohare ira, gõtõgõtõ waʼara dania, enaʼõ jaʼami zabõlõ ba enaʼõ miʼagaʼaga zi sõchi ba danõ, ba enaʼõ lõ mamalõmalõ, ondrõitami ba ngaʼõtõmi mitooe. (Moz. V. 23, 6). 13Ba ba zi no gõna ndraʼaga, fefoe, ba mboeaboeama andrõ si lõ sõchi ba ba horõma andrõ, si no eboea — ba noa na õʼosilõmilagõ õsa, lalõma andrõ, jaʼoegõ, Lowalangima, ba noa na õtehe chõma, tosai zi manõ —, 14ba hadia, mafoeli masawõ goroisamõ, ba wambambatõsa ba niha andrõ, si no toʼõlõ ba zogoro ita andrõ? Ba hadia, lõ õhori enaʼõ ndraʼaga, ba wõnoemõ, irege lõʼõ saʼae si tosai, ba irege lõ fangorifi saʼae? 15He Jehowa Lowalangi Ndraono Gizeraëli, no satoelõ ndraʼoegõ; ba no si tosai ndraʼaga, saoeri, maʼõchṍ: Jaʼe ndraʼaga, fõnaoe, ba horõma andrõ; bõrõ daʼõ, wa tabai mataha wõnoemõ!” (Sin. 143, 2).
Currently Selected:
SOERA GESERA FAZA 9.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.