SOERA GESERA FAZA 8.
FAZA 8.
I. Tõi nawõ Gasera andrõ, misi jaw̃a ba Jeroezalema. II. Ifakaoniʼõ gõi Nono Lewi Esera, ba mamoni ira ba mangandrõ. III. Ibeʼe ba danga gere ba ba danga Nono Lewi gamagama andrõ, gamagama ba niʼamoniʼõ andrõ. IV. Mofanõ ira, ba lõ hadia ia ba lala, ba laroegi Jeroezalema.
1I. Ba daʼe dõi doeara ba tõi ngaʼõtõ daʼõ, si fao chõgoe misi jaw̃a, me loeo razo Aretazasa. 2Maʼoewoe Wineha, ba Gereso. Ba maʼoewoe Gitamari, ba Daniëli. Ba maʼoewoe Dawido, ba Hatoesi, ono Zechania. 3Ba maʼoewoe Wareo, ba Sacharia, ba nitanõ ba zoera awõnia, ba 150 ndra matoea. 4Ba maʼoewoe Wahata-Moabi, ba Elijehoënai, ono Zerahia, ba 200 naw̃onia, ira matoea. 5Ba maʼoewoe Zatoe, ba Sechania, ono Jehaziëli, ba 300 nawõnia, ira matoea. 6Ba maʼoewoe Gadini, ba Ebedi, ono Jonata, ba 50 nawõnia, ira matoea. 7Ba maʼoewoe Gelama, ba Jesaja, ono Gatalia, ba 70 nawõnia, ira matoea. 8Ba maʼoewoe Zefatia, ba Sebadia, ono Michaëli, ba 80 nawõnia, ira matoea. 9Ba maʼoewoe Joabi, ba Obadia ono Jehiëli, ba 218 nawõnia, ira matoea. 10Ba maʼoewoe Mbani, ba Selomiti, ono Josifia, ba 160 nawõnia, ira matoea. 11Ba maʼoewoe Mbebai, ba Sacharia, ono Mbebai, ba 28 nawõnia, ira matoea. 12Ba maʼoewoe Asigada, ba Johanano, ono Hakatana, ba 110 nawõnia, ira matoea. 13Ba maʼoewoe Gadonika, si achi ba waʼatoemboe, Elifeleti ba Jeïeli ba Semaja dõira, ba 60 nawõra, ira matoea. 14Ba maʼoewoe Mbigewai, ba Oetaʼi ba Saboedi, ba 70 nawõra, ira matoea.
15II. Ba oeʼowoeloi ira ba mbewe nidanõ andrõ, si saw̃a mijooe Ahawa, ba maʼiagõ daʼõ oea, tõloe ngaloeo. Ba me oefaigi niha sato, awõ gere, ba no samõsa lõ ono Lewi ba daʼõ. 16Ba oefatenge ndra Eliëzeri, Ariëli, Semaja, Elinata, Jaribi, Elinata, Natano, Sacharia, Mesoela, oi satoea, ba Jojaribi ba Elinata, goeroe, oefatenge chõ Ido, 17satoea ba mba noea Gasifia, ba oebeʼe li chõra, hadia niw̃aʼõ chõ Ido ba ba dalifoesõnia ba ba zangai halõw̃õ ba gosali, banoea Gasifia, ba wamaigi chõma sangai halõw̃õ ba gosali Lowalangima. 18Ba me no itologa tanga Lowalangida, si hachõsi tõdõ jaʼaga, ba laʼohe chõma niha satoeatoea, maʼoewoe Maheli ono Lewi ono Gizeraëli, Serebia andrõ, awõ ndraononia ba awõ dalifoesõnia, 18 fefoe, ba Hasabia, 19awõ Jesaja maʼoewoe Merari ba talifoesõnia ba iraonora, 20 fefoe. 20Ba sangai halõw̃õ ba gosali, nihonogõi Dawido ba awõnia salaw̃a, tohoetohoe danga Nono Lewi: 220 zangai halõw̃õ ba gosali, oi nitõtõi tõi. (Jos. 9, 21. Ngaʼõt. I. 9, 2). 21Ba oefaw̃aʼõgõ wamoni ba gõ, ba daʼõ, ba mbewe Gahawa, enaʼõ maʼideʼideʼõ ndraʼaga fõna Lowalangida, ba ba wangandrõ chõnia, enaʼõ lõ gõnaga hadia ia, ba lala, jaʼaga ba iraonoma ba si so chõma. 22Aila sa ndraʼo, oeʼandrõ chõ razo zabõlõ ba si fakoedo, ba wanimba chõma emali, ba lala. Noa sa mamane chõ razo: Lõ aefa danga Lowalangima ba zangaloei jaʼia fefoe, ba wangorifi jaʼira; ba ba zangerogõ jaʼia, fefoe, ba tohare waʼabõlõnia ba fõnoenia. 23Ba mamoni ndraʼaga ba maʼandrõ daʼõ chõ Lowalangida, enaʼõ ifondrondrongo chõma, ba ifondrondrongo lima.
24III. Ba 12 oetoetoejoe satoea gere: Serebia ba Hasabia ba dafoeloe nawõra, talifoesõra, 25ba oetoelo chõra wirõ andrõ ba anaʼa, awõ gamagama andrõ — boeala andrõ ba gosali Lowalangida, nibeʼe razo ba anofoelania ba keomandroenia ba Iraono Gizeraëli fefoe, si so ba daʼõ, saoha gõlõra. 26Oetoelo ba dangara: 460 fikoe wirõ; ba gamagama firõ, 70 fikoe; ba anaʼa 80 fikoe. 27Ba 20 mako anaʼa, 1000 hoea balaki [fowõli], ba domboea na nahia hadia ia, tõla si sõchi, nifosõnõ ganaʼa, timba ganaʼa ba mbõli. 28Ba oemane chõra: No niʼamoniʼõ ami, chõ Jehowa; ba gamagama andrõ, ba no niʼamoniʼõ, ba firõ andrõ ba anaʼa, ba no nibeʼe saoha gõlõ chõ Jehowa, Lowalangi ndra toeami. 29Ba mihaogõ wangirõʼõ jaʼia, irege mitoelo ia ba zi so satoea gere ba satoea Nono Lewi, awõ hõgõ ngafōē Ndraono Gizeraëli, ba Jeroezalema, ba mbateʼe andrõ ba gosali Jehowa. 30Ba lahalõ wirõ andrõ ere ba Ono Lewi, awõ ganaʼa, awõ gamagama andrõ, nitoelo, ba wolohe ba Jeroezalema, ba gosali Lowalangima.
31IV. Ba mangefa ndraʼaga ba mbewe Gahawa, ba zi mewelendroea, ba mbaw̃a si fõfõna, ba wanaw̃a Jeroezalema; ba itologa tanga Lowalangida, lõ iloeloe ndraʼaga ba danga nemali ba ba danga zanaronarogõ jaʼaga ba zinga lala. 32Ba maroegi Jeroezalema, ba tõloe bongi ndraʼaga ba daʼõ. 33Ba mahemoloe õ, ba latoelo wirõ andrõ, awõ ganaʼa, awõ gamagama andrõ, ba gosali Lowalangida, labeʼe ba danga Merimoto ere, ono Goeria — ba awõnia Geleazari, ono Wineha, ba awõra na Nono Lewi andrõ, Josabada, ono Jesoea ba Noadia, ono Mbinoei — 34ahori laʼerai ba latoelo chõra; ba faʼaboea fefoe, ba latanõ ba zoera, me loeo daʼõ. 35Ba si no so andrõ, si no mangawoeli moroi ba niʼoloiʼõ jaʼira mege, ba mameʼe soemange nitoenoe chõ Lowalangi Ndraono Gizeraëli: 12 ngaʼeoe zaw̃i, si matoea, tána ba Ndraono Gizeraëli fefoe, ba 96 ngaʼeoe mbiribiri si matoea, ba 77 rozi nono mbiribiri, ba 12 ngaʼeoe nambi si matoea soemange fameta horõ — oi soemange nitoenoe chõ Jehowa. 36Ba labeʼe ba danga nifataro zalaw̃a andrõ ba ba danga ndra koemandroe ba zi tambai Oifarati tánõ andre, nifachoi zalaw̃a, ba latolo niha [Jehoeda], ba he ba wolaoe osali Lowalangi andrõ.
Currently Selected:
SOERA GESERA FAZA 8.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.