SOERA GESERA FAZA 6.
FAZA 6.
I. Itolo sibai Dario, ba wolaoe osali. II. Mofozoe wotomo, ba laʼasiwai ba laʼamoniʼõ gosali. III. Lalaoe wasa.
1I. Ba ibeʼe li razo Dario enaʼõ laʼaloei ba naha zoera andrõ, ba niʼirõʼõ gõi girõgirõ ba Mbabeli. 2Ba lasõndra zoera ba gõdo ba Gameta, ba danõ Media, mané nõsinia: 3”Nitanõ ba dõdõ: Me awena razo Giro, me lõ dõfi na, ba ibeʼe goroisa, imane: ’Osali andrõ ba Jeroezalema, — lafoeli lalaoe gosali andrõ, naha ba nibeʼebeʼe soemange, Tojonia ba bõi mangiwa. Faʼalaw̃ania, ba 60 hela, ba faʼebolonia, ba 60 hela gõi: 4Tõloe winaeta gara seboea, kara nitoto, ba sawinaeta geoe balo, ba balazonia, ba ba gõdo razo lahalõ. 5Ba nifoeli gõi gamagama andrõ ba gosali Lowalangi, anaʼa ba firõ, niʼoloiʼõ Neboekanesa moroi ba gosali ba Jeroezalema, niʼohenia ba Mbabeli, enaʼõ ba nahania ba gosali ba Jeroezalema labeʼe fefoe; ba gosali Lowalangi õbeʼe’. 6Ba bõi mihatõʼõ ami chõra — jaʼoegõ Tatenai, koemandroe ba danõ jefo Oifarati, ba jaʼoegõ Sitara-Bosinai ba awõmi andrõ, banoea Gafarasechi, ba danõ jefo Oifarati. 7Bõi mitenaw̃a halõw̃õ ba gosali Lowalangi andrõ; alacha lafoeli lalaoe gosali Lowalangi andrõ, ba nahania fõna, koemandroe niha Jehoeda andrõ ba satoea niha Jehoeda. 8Ba no oebeʼe li ba nibeʼe ba zatoea niha Jehoeda andrõ, ba wolaoe osali Lowalangi andrõ. Ahori laʼalī chõra mbalazo andrõ; sinema razo, beo andrõ ba danõ jefo Oifarati labeʼe, ba bõi sarõrõ! 9Ba hadia zogoena, he ono saw̃i si matoea, ba he biribiri si matoea ba ono mbiribiri, soemange nitoenoe chõ Lowalangi zoroego, ba gandroe ba asio ba agoe ba fanicha, ba tenga niʼambõsi wameʼe chõra, ero maʼṍchõ, dali niw̃aʼõ gere andrõ, ba Jeroezalema, 10enaʼõ labeʼe chõ Lowalangi zoroego zoemange samohoea, ba enaʼõ laʼandrõ waʼanaoe noso razo ba faʼanaoe noso ngaʼõtõnia. 11Ba no oebeʼe li: na so zowoeʼai oroisa andrõ, ba ladeha zara mboeatõ ba nomonia ba laforõfa ia ba mboeatõ andrõ, ba omonia, ba labaliʼõ obooela fangatabõ zinanõ, bõrõ daʼõ. 12Ba Lowalangi andrõ, samonahia tõinia ba daʼõ, ba jamoetimba zalaw̃a fefoe, awõ soi fefoe, sangoroʼõ tangara, ba wowoeʼai, ba ma ba wanoedoegõ osali Lowalangi andrõ, ba Jeroezalema; Jaʼodo andre, Dario, zameʼe oroisa andre, ba nihaogõ famaloea.”
13II. Ba laʼoʼõ sibai saʼae goroisa andrõ, no mege, nibeʼe razo Dario, ira Tatenai, koemandroe ba danõ ba zi tambai Oifarati, Sitara-Bosinai, ba awõra andrõ. 14Ba motomo zatoea niha Jehoeda ba tedooe domosa; fangabeʼera wamaʼeleʼõ ndra Hagaʼi samaʼeleʼõ, Sacharia ono Ido. Ba laʼasiwai gosali, dali goroisa Lowalangi Ndraono Gizeraëli ba oroisa ndra Kiro, Dario, Aretazasa, razo Weresia. 15Ba ba zi medõloe, ba mbaw̃a Adara, me no aloea melima fache razo Dario, razo [Weresia], awai gosali andrõ. 16Ba lalaoe weʼamoniʼõ osali Lowalangi andrõ Iraono Gizeraëli — ere ba Ono Lewi, awõ niha bõʼõ andrõ, si no mangawoeli moroi ba niʼoloiʼõ jaʼira mege, omoeso dõdõra. 17Ba labeʼe soemange ba weʼamoniʼõ osali Lowalangi andrõ: 100 ngaʼeoe zaw̃i si matoea ba 200 ngaʼeoe mbiribiri si matoea ba 400 rozi nono mbiribiri; ba soemange fameta horõ, ba Ndraono Gizeraëli fefoe, ba 12 ngaʼeoe nambi si matoea, iʼohiaʼõ waʼoja mado Ndraono Gizeraëli. 18Ba lafataro gere andrõ, dali mbosira, ba Ono Lewi, dali ngenolira, ba halõw̃õ andrõ chõ Lowalangi, ba Jeroezalema, dali nifachoi andrõ ba zoera Moze. (Moz. IV. 3, 6).
19III. Ba lalaoe wasa si no mangawoeli moroi ba niʼoloiʼõ jaʼira mege, ba zi meweleõfa ba mbaw̃a si fõfõna lalaoe. (Moz. II. 12, 6). 20Noa sa lahaogõ ira ere ba Ono Lewi, dozi; oi si no moehaogõ ira. Ba lataba wasa tána ba zi no mangawoeli andrõ moroi ba niʼoloiʼõ jaʼira mege fefoe, ba tana ba dalifoesõra ere andrõ, ba tána chõra. 21Ba laʼā Iraono Gizeraëli, si no mangawoeli moroi ba niʼoloiʼõ jaʼira mege, awõ dozi si no mangondrasi jaʼira, si no mangoniagõ jaʼira ba waʼaraʼiraʼiõ niha baero andrõ ba danõ, ba wangaloei Jehowa, Lowalangi Ndraono Gizeraëli. 22Ba lalaoe gowasa roti si lõ moeʼaisõni andrõ, fitoe ngaloeo, ba somoeso tõdõ ira. Noa sa omoeso sibai dõdõra ibeʼe Jehowa, me no idõnisi chõra dõdõ razo Asiria, ba wanolo jaʼira ba halõw̃õra andrõ, ba gosali Lowalangi Ndraono Gizeraëli.
Currently Selected:
SOERA GESERA FAZA 6.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.