SOERA GESERA FAZA 4.
FAZA 4.
I. Lõ latehe mado Joeda, oroedoe danga noedoera andrõ ba wolaoe osali. II. Lafaʼoheʼõ zoera oedoera andrõ, chõ Gahasiwero, ba wanimba folaoe osali. III. Ifaʼoheʼõ mangawoeli zoera razo ba tetabi wotomo.
1I. Ba me larongo oedoe mado Joeda ba oedoe mado Mbenijami lalaoe gosali chõ Jehowa, Lowalangi Ndraono Gizaraëli sangawoeli andrõ moroi ba niʼoloiʼõ jaʼira, 2ba mõi ira chõ Zeroebabeli ba ba hõgõ ngafōē andrõ, ba lamane chõra: Damaloeloei wolaoe; sangaloei Lowalangimi sa ndraʼaga gõi, si mane jaʼami, ba chõnia mabeʼebeʼe zoemange, iʼotarai loeo Gasarabado andrõ, razo Asiria, solohe jaʼaga ba daʼe. (Raz. II. 17, 34 b. t.). 3Ba lamane chõra ira Seroebabeli Jesoea, awõ hõgõ ngafōē Ndraono Gizeraëli bõʼõ andrõ: Tenga awõma ami, fa taʼoroedoegõ ita ba wolaoe osali chõ Lowalangida, jaʼaga manõ zolaoe chõ Jehowa, Lowalangi Ndraono Gizeraëli, ha jaʼaga, dali goroisa Giro, razo Weresia. 4Ba adada zoei danga mado Joeda labeʼe niha ba danõ andrõ, latenaw̃a ira ba wotomo andrõ, lasõlõ niha, 5samoʼesoeanõ jaʼira, fa bõi lafaloea zi so ba dõdõra, gõtõ waʼara Giro andrõ, razo Weresia, ba irege razo Dario, razo Weresia.
6II. Ba me razo Ahasiwero, me awena tobali razo ia, ba lafaʼoheʼõ zoera wangadoe, la adoegõ mbanoea mado Joeda ba banoea Jeroezalema. 7Ba me razo Aretazasa, ba lafaʼoheʼõ zoera ira Biselama, Miteredata, Tabeʼeli, ba awõra, chõ Aretazasa andrõ, razo Weresia, Nisoera ba li Ndrawa Garamo zoera andrõ ba niʼali. Ba li Ndrawa Garamo: 8Rehoemi koemandroe ba Simisai doeroetoeli zamaʼoheʼõ soera chõ razo Aretazasa, fangombacha banoea Jeroezalema andrõ, lamane: 9”Rehoemi no, koemandroe ba Simisai, doeroetoeli, ba awõra bõʼõ andrõ, banoea Dina ba banoea Jafarasatecha ba banoea Darafela ba banoea Gafarasa ba banoea Garachi ba banoea Mbabilona ba banoea Zoesa ba banoea Deha ba banoea Gelama, ba soi bõʼõ andrõ, 10nifawoeʼa Gasanafari andrõ seboea ba sihõngõ toeria, niʼohenia ba mbanoea Zamaria ba ba danõ bõʼõ misa, jefo Oifarati tánõ andre, ba tohoetohoenia. 11Daʼe nõsi zoera andrõ, nifaʼoheʼõra chõ razo Aretazasa: ”Enonioe andre, banoea si jefo Oifarati tánõ andre, ba tohoetohoenia. 12Bõi zi lõ irongo razo, wa no laroegi ndraʼaga, ba Jeroezalema, niha Jehoeda andrõ, si no so moroi si tooe chõoe. Labõrõbõrõtaigõ lafoeli lataroeʼõ mbanoea si lõ sõchi andrõ, banoea zolaw̃alaw̃a; laʼasiwai gõli ba lafoeli lahaogõ dajadaja. 13Ba bõi zi lõ aboto ba dõdõ razo: na no moefoeli moetaroeʼõ mbanoea andrõ dania ba na no awai gõli, ba lõʼõ saʼae labeʼe mbeo ba hoea zago; ba rodi lala, ba lõʼõ saʼae la oʼõ, ba tobali teʼambõsi zinema razo labeʼe. 14Ba me no si mangamanga nasio ba gõdo razo ndraʼaga ba me tebai mafaigifaigi na teʼala razo, andrõ wa mafatenge, ba wangombacha daʼõ chõ razo, 15enaʼõ laʼaloealoei ba zoera hikaja ndra toeaoe andrõ; ba õsõndra dania ba zoera hikaja andrõ ba aboto ba dõdõoe, wa no banoea solaw̃alaw̃a mbanoea andrõ, banoea samakao razo ba he niha ba danõ, baero, misa, awõ wa no gõtõgõtõ waʼara lafobõrõ wolaw̃a; ba daʼõ gõi mbõrõ, wa no moedoedoegõ mbanoea andrõ. 16Andrõ bõi zi lõ aboto ba dõdõoe: na lafoeli lataroeʼõ mbanoea andrõ, ba na no awai gõli dania, ba tobali bõrõ daʼõ, wa latimba manõ ndraʼoegõ dania jefo Oifarati, tánõ andre.”
17III. Ba ifaʼoheʼõ zoera razo, fanema li ndra Rehoemi koemandroe, Simisai, doeroetoeli, ba awõra bõʼõ andrõ, ba Zamaria ba ba danõ jefo Oifarati, imane: ”Ja ahowoe! ba tohoetohoenia. 18Soera andrõ, nifaʼoheʼõmi ehõma, ba no lahaogõ wombaso chõgoe. 19Ba no oebeʼe goroisa, ba no laʼaloei, ba no lasõndra, wa no samadaõ li razo mbanoea andrõ, iʼotarai gõtõ fõna sibai saʼae, wa no tesaosao manõ ba daʼõ wolaw̃a ba faʼerosa. 20Ba no razo sabõlõ mege razo Jeroezalema andrõ, ba no labeʼe barõ mbawara danõ andrõ fefoe, jefo Oifarati, ba no laʼoʼõ chõra ba mbeo ba ba hoea zago ba ba rodi lala. 21Ba niw̃aʼõ saʼae, labato halõw̃õra niha andrõ, fa bõi lafoeli lataroeʼõ mbanoea andrõ, irege jaʼodo zangoemaʼõ. 22Ba mifaigifaigi, fa bõi arõrõ ami, fa bõi toemboe ba daʼõ deʼala seboea, faʼateʼala razo!” 23Ba me no moebaso zoera andrõ, nifaʼoheʼõ razo Aretazasa, chõ Rehoemi ba chõ Zimisai doeroetoeli ba ba nawõra bõʼõ andrõ, ba lataʼitaʼi weʼamõi ba niha Jehoeda, ba Jeroezalema, ba latenaw̃a ira, laʼanõsõʼõ. 24Ba tebato halõw̃õ ba gosali Lowalangi, ba Jeroezalema, me loeo daʼõ, lõ latohoegõ, irege no aloea dõfi razo Dario andrõ, razo Weresia.
Currently Selected:
SOERA GESERA FAZA 4.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.