SOERA GESERA FAZA 3.
FAZA 3.
I. Faloechata ba Jeroezalema. Labõrõtaigõ wameʼe soemange. II. Labeʼe tooe dojo gosali.
1I. Ba me no iroegi baw̃a si fitoe, me ba mbanoea misa so Ndraono Gizeraëli, ba faloecha ira fefoe ba Jeroezalema, ha sara dõdõ. 2Ba maoso Jesoea, ono Josadaki ba talifoesõnia, ere andrõ, ba Seroebabeli, ono Zelatiëli, ba talifoesõnia, lafoeli lafaʼanõ naha wameʼe soemange andrõ chõ Lowalangi Ndraono Gizeraëli, ba wameʼe soemange nitoenoe ba detenia, dali nifachoi ba goroisa Moze, enoni Lowalangi. (Moz. V. 12, 6. Mat. 1, 12). 3Ba nahania fõna lafaʼanõ naha wameʼe soemange andrõ, me no ihawoei ira faʼataʼoera niha ba danõ, ba labeʼe zoemange nitoenoe chõ Jehowa ba dete naha andrõ, soemange nitoenoe na mahemoloe mbanoea ba na tánõ owi. (Moz. IV. 28, 4). 4Ba lalaoe gowasa nose daha geoe andrõ, dali nifachoi andrõ, ba labeʼe zoemange, ero maʼṍchõ, ha waʼoja, dali niw̃aʼõ andrõ, ha waʼoja maʼṍchõ; (Moz. III. 23, 34 b. t.); 5ba he soemange nitoenoe si lõ aefaʼaefa, ba he nibeʼe ba wasoelõna, ba he ba mbaw̃a gowasa andrõ, niʼamoniʼõ chõ Jehowa, ba he hadia ia zoemange nibeʼera saoha gõlõ chõ Jehowa. 6Ba zi samboea desaʼa, ba mbaw̃a si fitoe labõrõtaigõ wameʼe soemange chõ Jehowa, me lõʼõ na moebeʼe tooe dojo gosali Jehowa. 7Ba labeʼe ganaʼa ba zanoto kara ba ba zolaoe eoe, ba ba mbanoea Zidona ba ba mbanoea Diro, ba labeʼe mbalazo ba fanicha, enaʼõ laʼohe mbalo geresi, moroi ba hili Libano, nifatõrõ ba nasi, ba Jafo, dali niw̃aʼõ Giro, razo Weresia.
8II. Ba me no tõra dõfi saʼae, me laroegi naha gosali Lowalangi ba Jeroezalema, me baw̃a si doea, ba labõrõtaigõ ira Seroebabeli, ono Zelatiëli, Jesoea, ono Josadaki, ba talifoesõra andrõ, ere ba Ono Lewi, awõ dozi si no mondroegi Jeroezalema, si otarai niʼoloiʼõ jaʼira mege, lafataro ba wamaigimaigi halõw̃õ ba gosali Jehowa Nono Lewi andrõ, si no doea woeloe fache ba si aʼa moroi andrõ. 9Ba tobali tetaro Jesoea ba iraononia ba talifoesõnia ba Kadimiëli ba iraononia ba iraono Hodawia andrõ ba iraono Henadadi, ba iraonora ba talifoesõra, Ono Lewi andrõ, ha sara dõdõ, ba wamaigimaigi sohalõw̃õ ba gosali Jehowa. 10Ba me labeʼe tooe dojo gosali Jehowa, ba laʼagõ daʼõ ere, noecha gere noechara, ba torofe ba dangara ba faritia ba danga Nono Lewi, maʼoewoe Gasafo, ba wanoenõ Jehowa, dali nifachoi Dawido, razo Ndraono Gizeraëli. (Ngaʼõt II. 23, 18). 11Ba lalaoe wanoenõ ba fangandrõ saoha gõlõ chõ Jehowa, me no seboea tõdõ ia, ba me si lõ aetoe waʼahachõ dõdõnia Ndraono Gizeraëli. Ba oi lakaraini waʼiki niha sato fefoe, wanoeno Jehowa, me no moebeʼe tooe dojo gosali Jehowa. (Ngaʼõt. II. 5, 13). 12Ba ato gere ba Ono Lewi ba hõgõ ngafōē andrõ — satoea, si lõ olifoe osali fõna, — zegeʼege sibai, me laʼila labeʼe tooe dojo gosali si bohooe andrõ, ba me owoeawoea dõdõ zato ba me manoenõ. 13Ba lõ larongo sato loealoea waʼomoeso dõdõ andrõ, ba wegeʼegera andrõ.
Currently Selected:
SOERA GESERA FAZA 3.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.