SOERA NGAʼÕTÕ II. FAZA 9.
FAZA 9.
I. Mõi tome Zelomo razo Zaba, ira alawe. II. Faʼeboea ganaʼa Zelomo, awõ lachõminia. III. Faʼamatenia.
(A. 9, 1—28: Raz. I. 10, 1—28)
1I. Ba me irongo doeria Zelomo razo Zaba andrõ, ira alawe, ba mõi ia, ba wanandraigõ Selomo ba dahõdahõ; ato sibai nawõnia fao, fabaja ondra, sonoro famasa ba daloedaloe ba anaʼa ba feremata, oja sibai, niʼohe ba Jeroezalema. Ba me iroegi Zelomo, ba fahoehoeo ia chõnia, ibokai fefoe hadia ia zi so ba dõdõnia. (Raz. I. 10, 1 b. t.). 2Ba itema linia Selomo, ba nisofoenia chõnia fefoe; lõ hadia ia zi lõ aboto ba dõdõ Zelomo, lõ hadia ia zi tebai itema linia. 3Ba me irongo waʼatoeatoea Zelomo razo Zaba, ba me iʼila gõdo andrõ nilaoe Zelomo, 4ba õra andrõ ba meza chõnia, ba omo genoninia, awõ halõhalõw̃õ zangai halõwõ jomo chõnia, awõ noechara, ba samaʼoli gõ chõnia, awõ noechara, ba soemange andrõ chõnia, nibeʼebeʼenia ba gosali Jehowa, ba tobali sibai dõdõnia, 5ba imane chõ razo: Si ndroehoe manõ nirongogoe ba danõgoe, ba ngawalõ hadia ia chõmõ, ba ba waʼatoeatoeamõ andrõ! 6Lõ si fadoehoe dõdõgoe nidoenõdoenõ niha, irege no oeroegi, ba irege no iʼila hõrõgoe. Ba ambõ na i matonga niʼombachaʼõ chõgoe, faafahõna waʼatoeatoeamõ andrõ; õtaloeʼi na doeria andrõ, nirongogoe. 7Ja ahowoe ndra alawe chõoe, ba ja ahowoe genonioe andre, si lõ aefaʼaefa chõoe, wamondrongondrongo faʼatoeatoeamõ andrõ! 8Nisoeno Jehowa, Lowalangioe andrõ, si no mangomasiʼõ jaʼoegõ, wamedadao jaʼoegõ ba dadaoma andrõ chõnia, razo chõ Lowalangioe, Jehowa, bõrõ waʼomasi Lowalangioe Ndraono Gizeraëli, fa lõ iboeloʼõ ira, gõtõgõtõ waʼara; andrõ wa no ibaliʼõ razora ndraʼoegõ, enaʼõ hoekoe si sõchi õfatõrõ ba satoelõ! 9Ba ibeʼe boealania chõ razo, ba 476,460 balaki ganaʼa, ba famasa ba daloedaloe ba feremata, oja sibai; lõʼõ manõ ifoeli dania si manõ [waʼoja] wamasa ba daloedaloe, si mane nibeʼe razo Zaba andrõ chõ razo Selomo. 10Ba banoea Hoeramo no mege gõi ba banoea Zelomo, si no mõi mangai anaʼa ba Gofiri, ba lasaoʼõ gõi geoe sendrana ba feremata. 11Ba eoe sendrana andrõ, ba ibaliʼõ ora Selomo, he ba gosali, ba he ba gõdo razo, ba biola nitika, sideʼide ba seboea, fakake zanoenõ andrõ; lõ moerai moeʼila zi manõ fõna, ba danõ mado Joeda. 12Ba razo Selomo, ba ibeʼe chõ razo Zaba fefoe hadia ia zomasi ia, awõ niʼandrõnia, lõ lai niʼohenia chõ razo. Ba maoso ia, mofanõ, ifoeli ia chõra, awõ genoninia.
13II. Ba anaʼa nisõndra Zelomo dõfi, ba 2,544,353 balaki, (Raz. I. 10, 14 b. t.), 14lõ lai nisõndrania ba zi mõimõi maniaga ba ba zolafo; ba dozi razo Ndrawa Ara ba he koemandroe ba danõ, ba labeʼe chõ Zelomo ganaʼa ba firõ. 15Ba 200 ifafazõchi Selomo dange, anaʼa nibõbõzi: 600 fondroejoe zamboea; 16ba 300 mbaloese, anaʼa nibõbõzi: 300 fondroejoe zamboea. Ba ibeʼe ba nomo eoe hili Libano Selomo. 17Ba ifalaoeʼõ gõi dadaoma razo Selomo, dadaoma seboea, ifõ goeaza, ba ifoʼoeli balaki. 18Õnõ mbosi dadaoma andrõ ba bakoebakoe gahe nifadoro chõnia. Ba ba dadaoma, ba no faoma fatambai latalata daʼio; ba zinga latalata daʼio andrõ, ba doea geoe wamaedo zingo. 19Ba felendroea wamaedo zingo ba mbosi no mege, si õnõ, fatambai. Lõ moerai moelaoe zi manõ ba razo bõʼõ, heza. 20Ba mako razo Selomo, mako ba wamadoe, ba anaʼa; ba he gamagama [bõʼõ] fefoe, ba nomo eoe hili Libano, ba balaki manõ, lõ hadia ia wirõ, me no lõʼõ manõ ba dõdõra wirõ, ba gõtõ Zelomo andrõ. 21Noa sa so nowo chõ razo, solojo ba Darisi, awõ mbanoea Hoeramo andrõ; ero medõloe fache, ba so nowo andrõ, solojo ba Darisi, ba õsi, ba anaʼa ba firõ ba ifõ goeaza ba baʼe ba fofo meraki. 22Ba italoeʼi razo bõʼõ ba goeli danõ fefoe razo Selomo, ba waʼeboea ganaʼa ba ba waʼatoeatoea. 23Ba dozi omasi razo ba goeli danõ laʼila Zelomo ba lafondrondrongo waʼatoeatoeania andrõ, nibeʼe Lowalangi ba dõdõnia. 24Ba oi dozi laʼohe mboeala, gamagama firõ ba gamagama anaʼa ba noecha ba fangõna ba famasa gõ ba daloedaloe ba koedo ba kalide koedo, ero rõfi. 25Ba 4000 fasa chõ Zelomo koedo ba koereta, ba 12,000 zi fakoedo; ba ba mbanoea goereta andrõ ifataro daʼõ ba ba zi tefasoei jaʼia ba Jeroezalema. (F. 1, 14—17. Raz. I. 5, 6). 26Ba barõ mbawania razo fefoe, iʼotarai Oifarati ba iroegi danõ Ndrawa Wilisiti ba ola danõ Miseraji. (Moz. I. 15, 18). 27Ba falaw̃alaw̃a ira gara wirõ, waʼoja, ba Jeroezalema ibeʼe razo, ba timba dõla geresi dõla ara gatoea ba ndraso. (Ngaʼõt. II. 1, 15). 28Ba moroi ba danõ Miseraji lafaʼema chõ Zelomo koedo ba moroi ba danõ bõʼõ fefoe.
(A. 9, 29—31: Raz. I. 11, 41—43)
29III. Ba bõʼõnia hikaja Dawido, he fõna, ba he safoeria andrõ, ba no moetanõ ba zoera hikaja andrõ chõ Natano samaʼeleʼõ ba ba wamaʼeleʼõ Gahia, banoea Zilo, ba ba gangilata Jedo sangiʼila, chõ Jerobeamo, ono Nebati. 30Ba 40 fache razo Zelomo ba Jeroezalema, razo Ndraono Gizeraëli fefoe. 31Ba mate Zelomo, itõrõ lala ndra amania, ba lakoʼo ia ba mbanoea namania Dawido andrõ. Ba fangalinia razo ba ononia Rehabeamo.
Currently Selected:
SOERA NGAʼÕTÕ II. FAZA 9.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.