SOERA NGAʼÕTÕ II. FAZA 10.
FAZA 10.
I. Faʼabeʼe li Rehabeamo, me mangandrõ chõnia zato. II. Fabali chõnia zi foeloe toea andrõ.
(Faigi gõi Raz. I. 12, 1—20)
1I. Ba mõi ba Zichema Rehabeamo, me no ba daʼõ faloecha Ndraono Gizeraëli fefoe, ba wamataro razo jaʼia. 2Ba me irongo Jerobeamo, ono Nebati — ba danõ Miseraji so ia; ba daʼõ isaw̃a, me moloi ia no chõ Zelomo —, me irongo, wa no mate Zelomo, ba mangawoeli ia moroi ba danõ Miseraji. (Raz. I. 11, 40). 3Ba lafatenge, lafakaoniʼõ ia. Ba so Jerobeamo ba Iraono Gizeraëli fefoe, ba lamane chõ Rehabeamo: 4No rodi sabeʼe ihareʼõ chõma amaoe, ba jaʼoegõ, ba õkaohasi chõma maʼifoe halõw̃õ sabeʼe, awõ rodi safõchõ andrõ, nihareʼõ namaoe chõma, ba soga barõ mbawaoe. 5Ba imane chõra: Mihonogõ na ami, irege doea wongi, ba mifoeli ami chõgoe. 6Ba mofanõ zato. Ba mamagõlõ razo Rehabeamo ba zatoea, enoni namania Selomo, me lõ si mate ia na, imane: Ha taw̃aʼõ ba niha andrõ, hadia ba dõdõmi? 7Ba latema linia, lamane chõnia: Na eboea dõdõoe chõra andrõ, maʼõchṍ, na õhachõsi tõdõ ira, ba na õhaogõ wanema lira, ba lõ laboelõʼõ ira barõ mbawaoe. 8Ba lõ ifondrondrongo niw̃aʼõ zatoea andrõ chõnia, ba mamagõlõ ia ba nono matoea, si faziaziaʼa chõnia, si no mõi enoninia, imane chõra: 9Hadia ba dõdõmi, ha tawaʼõ chõra andrõ, sangoemaʼõ chõgoe: Kaohasi chõma rodi andrõ, nihareʼõ namaoe chõma? 10Ba lamane chõnia ono matoea andrõ, si faziaziaʼa chõnia: Õmane chõra, sangoemaʼõ chõoe: ”Amaoe, ba no ihareʼõ chõma rodi sabeʼe, ba jaʼoegõ, ba kaohasi chõma, — õmane chõra; Toeroegoe si achi, ba no esolo moroi ba lõwilõwi namagoe! 11Ba laoe, ba na no rodi sabeʼe ihareʼõ chõmi amagoe, ba jaʼo, ba oedooeʼõ na waʼabeʼe rodi andrõ chõmi: Na no iʼotoeʼõ ami bõzibõzi koedo amagoe, ba jaʼo, ba ”tongo” oelaoe chõmi!” 12Ba me lafoeli laʼondrasi Rehabeamo ira Jerobeamo, awõ niha sato fefoe, me no aefa zi doea wongi andrõ, dali niw̃aʼõ razo, me imane: Ba zi doea wongi mifoeli ami chõgoe! 13ba iʼabeʼeʼõ linia chõra razo. Tobali lõ ifondrondrongo razo Rehabeamo niw̃aʼõ zatoea, 14niw̃aʼõ nono matoea andrõ iʼoʼõ wangoemaʼõ chõra: Na no rodi sabeʼe ihareʼõ chõmi amagoe, ba jaʼo, ba oedooeʼõ na waʼabeʼenia; na no iʼotoeʼõ ami bõzibõzi koedo amagoe, ba jaʼo, ba ”tongo” oelaoe chõmi! 15Tobali lõ iʼoʼõ niʼandrõ zato razo; me no moroi ba Lowalangi daʼõ, enaʼõ itõrõ niw̃aʼõnia andrõ, nifaʼema Gahia andrõ, banoea Zilo, chõ Jerobeamo, ono Nebati. (Raz. I. 11, 31).
16II. Ba me no aboto ba dõdõ Ndraono Gizeraëli fefoe, lõ iʼoʼõ niʼandrõra razo, ba lamane chõnia niha sato: ”Hadia nihalõda chõ Dawido? Lõʼõ sa tána chõda chõ nono Gizaʼi! Mifoeli ami, jaʼami Iraono Gizeraëli, jamoefoeli ia chõra zamõsana! Ba faigi he õwisa jomo chõoe, jaʼoegõ Dawido!” Ba lafoeli ira chõra Iraono Gizeraëli fefoe. 17Ba ba Ndraono Gizeraëli ba mbanoea mado Joeda, ba Rehabeamo razora. 18Ba me ifatenge goemandra Hadoramo andrõ Rehabeamo, ba laboenoe daʼõ Iraono Gizeraëli, lateboe kara. Ba fachamõ sibai na itiboʼõ ia ba goeretania jaw̃a razo Rehabeamo, moloi, isaw̃a Jeroezalema. 19Ba tobali fabali ba ngaʼõtõ Dawido Ndraono Gizeraëli, iroegi maʼõchṍ andre.
Currently Selected:
SOERA NGAʼÕTÕ II. FAZA 10.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.