SOERA NGAʼÕTÕ II. FAZA 7.
FAZA 7.
I. Oroma lachõmi Jehowa, ba gosali. II. Labeʼe zoemange, ba weʼamoniʼõ osali. III. Iʼoromaʼõ ia Lowalangi chõ Zelomo. Amaboeʼoela li ba fametaʼoe.
1I. Ba me no iʼoʼozoei wangandrõ Selomo, ba aechoe galitõ moroi jaw̃a ba mbanoea ba iʼā zoemange nitoenoe andrõ, awõ zoemange nitaba, ba anõnõ bacha gosali lachõmi Jehowa, (Raz. I. 8, 54; 18, 38. Moz. III. 9, 24. Moz. II. 40, 34), 2tobali tebai mõi bacha ba gosali gere, me no anõnõ bacha gosali Jehowa lachõmi Jehowa andrõ. 3Ba me laʼila Iraono Gizeraëli fefoe, aechoe moroi jaw̃a galitõ andrõ ba ihawoei gosali lachõmi Jehowa, ba latoehi danõ ba lafaõndrõ tooe mbawara, ba mbale, mangaloeloe ira ba lasoeno Jehowa, ba waʼeboea dõdõnia ba ba wa lõ aetoe waʼahachõ dõdõnia. (F. 5, 13. Sin. 136).
(A. 7, 4—10: Raz. I. 8, 62—66)
4II. Ba lataba zoemange nitaba fõna Jehowa, razo, awõ niha sato fefoe. (Raz. I. 8, 62 b. t.). 5Ibeʼe zoemange fangorifi Selomo, 22,000 zaw̃i ba 120,000 mbiribiri. 6Ba laʼiagõ nahara ere ba si manõ gõi Nono Lewi, so ba dangara nifolī andrõ, chõ Jehowa, nifafazõchiʼõ razo, Dawido, ba wangandrõ saoha gõlõ chõ Jehowa, me no si lõ aetoe waʼeboea dõdõnia andrõ, wolaoe sinoenõ andrõ chõ Dawido; ba lalaoe dorofe ere, ba gametahõra, ba zi so Ndraono Gizeraëli fefoe. 7Ba iʼamoniʼõ Selomo golajama ba daloe, fõna gosali Jehowa, wameʼe soemange nitoenoe andrõ, awõ dawõ zoemange fangorifi. Lõʼõ sa itaha zoemange nitoenoe andrõ, awõ zoemange niʼā, awõ dawõ andrõ, naha wameʼe soemange tõla andrõ, nifafazõchiʼõ Zelomo. 8Ba ilaoe gowasa andrõ Selomo, me loeo daʼõ, fitoe bongi waʼara, ba awõnia Ndraono Gizeraëli fefoe — owoeloa seboea sibai [sagõrõ tanõ], iʼotarai lala ba Hamata andrõ, iroegi mbombo andrõ ba [nola] danõ Miseraji. (Jos. 13, 3). 9Ba me loeo si w̃aloe, ba oi owoelo ira, owoeloa ba gowasa; me no fitoe bongi chõra weʼamoniʼõ naha wameʼe soemange andrõ; no fitoe bongi gowasa. (Moz. IV. 7, 10). 10Ba ba zi doea woeloe a tõloe ba mbaw̃a si fitoe, ba ifofanõ ba chõra niha sato [Selomo], somoeso tõdõ ira ba si sõchi tõdõ, ba zi sõchi andrõ fefoe, nilaoe Jehowa chõ ndra Dawido Selomo ba ba mbanoeania Iraono Gizeraëli.
(A. 7, 11—22: Raz. I. 9, 1—9)
11Ba no iʼasiwai Selomo gosali Jehowa andrõ, awõ gõdo razo, no ahori iʼoʼozoei, hadia ia, fefoe niw̃aʼõnia tõdõnia mege, nilaoe ba gosali Jehowa ba ba gõdo razo.
12III. Ba iʼoromaʼõ ia Jehowa chõ Zelomo, ba zi bongi, imane chõnia: No oefondrondrongo wangandrõoe, ba no oetoejoe chõgoe naha wameʼe soemange naha andrõ. (Moz. V. 12, 5). 13Na oekoesi mbanoea si jaw̃a, na lõ aechoe ba danõ deoe, ba na oefatõrõ damo, enaʼõ laʼā zinanõ ba danõ, ba na oefatõrõ wõchõ waba ba mbanoeagoe, 14ba na laʼideʼideʼõ ira banoeagoe, nifao tõigoe ba dõira, na mangandrõ ira, na laʼaloei wamaigigoe jaʼira ba na lafalalini gegeraʼera, na labõhõli mboeaboeara si lõ sõchi andrõ, ba oefondrondrongo ba zoroego, oebeʼe aefa horõra ba oefaigi wangorifi ba danõra andrõ. 15Oefaigifaigi saʼae ba oebeʼe mbõrõ dalingagoe ba wangandrõ ba naha andre. (F. 6, 40). 16Ba noa saʼae oetoejoe gosali andre, ba no oebaliʼõ niʼamoniʼõ, enaʼõ ba daʼõ monahia dõigoe, si lõ mamalõmalõ, ba enaʼõ bõi aefaʼaefa ba daʼõ hõrõgoe ba tõdõgoe, gõtõgõtõ waʼara. (Sin. 132, 13). 17Ba na õtõrõ lala andrõ, chõgoe, somasido, si mane fanõrõ namaoe Dawido mege, na õʼoʼõ sibai niw̃aʼõgoe chõoe ba na õtõngõni nifachoigoe, awõ hoekoe andrõ chõgoe, 18ba oeʼaroʼõ dadaoma zalaw̃a andrõ chõoe, si mane nifaboeʼoegoe chõ namaoe Dawido, me oemane: Lõʼõ manõ dania ambõ chõoe [ngaʼõtõoe], samatõrõ Iraono Gizeraëli. (Sam. II. 7, 12. 13. 16). 19Ba na miʼerogõ ndraʼo, ba na mibõhõli nifachoigoe ba oroisagoe, niw̃aʼõgoe chõmi, ba na mõi ami mamosoemange Lowalangi bõʼõ, 20na ba daʼõ mangaloeloe ami, ba oedeha ira ba danõ andre chõgoe nibeʼegoe chõra, ba osali andre, niʼamoniʼõgoe nahia dõigoe, ba nitiboʼõ oebeʼe, fõnagoe, ba oebeʼe amaedola ba famaʼiki niha, ba niha baero fefoe. (Moz. V. 28, 37). 21Ba gosali andre, si no alaw̃a mege — ba dozi sanõrõ, ba si hocha mboe. Ba na lasofoe dania: Hadia mbõrõ, wa ifatõrõ zi mane daʼõ ba danõ andre, ba ba gosali andre Jehowa? (Moz. V. 29, 23—26. Jer. 22, 8. 9) 22ba lamane: Bõrõ me no laʼerogõ Jehowa andrõ, Lowalangi ndra toeara, si no mangeheta toeara ba danõ Miseraji, ba me no laʼolembai Lowalangi bõʼõ, me no ba daʼõ mangaloeloe ira, ba me no lafosoemange daʼõ, — daʼõ mbõrõ wa no ifatõrõ chõra wamakao andrõ fefoe Jehowa!
Currently Selected:
SOERA NGAʼÕTÕ II. FAZA 7.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.