SOERA NGAʼÕTÕ II. FAZA 6.
FAZA 6.
I. Hoehoeo Zelomo ba niha sato. II. Fangandrõ Zelomo, ba weʼamoniʼõ osali.
(Faigi gõi Raz. I. 8, 12—53)
1I. Ba imane Selomo: No iw̃aʼõ Jehowa, ba zogõmigõmi zomasi ia nahiania. 2Ba no oelaoe nomo nahiaoe, nahia si sosó ndraʼoegõ, gõtõgõtõ waʼara. 3Ba ibaliʼõ ia razo, iʼowai Ndraono Gizeraëli sato fefoe, wamahowoeʼõ jaʼira, no moeziozio Ndraono Gizeraëli sato fefoe. 4Ba imane [razo]: ”Nisoeno Jehowa, Lowalangi Ndraono Gizeraëli, si no moehede, bawania chõ namagoe Dawido ba si no mamaloea jaʼia tangania, me imane: 5Iʼotarai loeo, me oeheta ba danõ Miseraji mbanoeagoe ba samboea lõ mado Ndraono Gizeraëli nitoejoegoe banoea, ba wolaoe osali, nahia dõigoe ba lõ nitoejoegoe niha, enaʼõ salaw̃a mbanoeagoe Iraono Gizeraëli ia. (Sam. II. 7, 6). 6Ba Jeroezalema andrõ, ba no oetoejoe nahia dõigoe, ba Dawido andrõ, ba no oetoejoe, enaʼõ salaw̃a mbanoeagoe Iraono Gizeraëli ia. 7Ba no so ba dõdõ namagoe Dawido wolaoe osali dõi Jehowa, Lowalangi Ndraono Gizeraëli; (Sam. II. 7, 2—13). 8Ba no imane Jehowa chõ namagoe Dawido: Wa no õw̃aʼõ tõdõoe wolaoe osali dõigoe, ba no si sõchi, me no õw̃aʼõ daʼõ. 9Ba tenga sa jaʼoegõ zolaoe osali andrõ, onooe zolaoe, ngaʼõtõoe, daʼõ dania zolaoe osali dõigoe. 10Ba no itõrõ gamaboeʼoela li andrõ, nibeʼenia, ibeʼe Jehowa. Noa sa so ndraʼo fangali namagoe Dawido, ba no doemadaodo ba dadaoma zalaw̃a ba Ndraono Gizeraëli, itõrõ nifaboeʼoe Jehowa, ba no oelaoe gosali dõi Jehowa, Lowalangi Ndraono Gizeraëli. 11Ba no oebeʼe ba daʼõ dawõla andrõ, naha goroisa ba wawoeʼoesa li andrõ chõ Jehowa, me fawoeʼoe li ia ba Ndraono Gizeraëli.”
12II. Ba iʼiagõ fõna naha wameʼe soemange andrõ chõ Jehowa, ba zanehe Ndraono Gizeraëli fefoe, ba iʼoroʼõ dangania, 13(noa sa ifafazõchiʼõ harehare, tõla, Selomo, ba no ibeʼe ba daloe golajama, 5 hela waʼanaoe ba 5 hela gõi waʼebolo ba 3 hela waʼalaw̃a; ba daʼõ jaw̃a mõi ia ba ibalõdoehini, ba zanehe Ndraono Gizeraëli sato fefoe, ba iʼoroʼõ dangania mijaw̃a ba zoroego), 14ba imane: ”He Jehowa, Lowalangi Ndraono Gizeraëli, lõ Lowalangi si falaw̃alaw̃a chõoe, he ba zoroego, ba he ba goeli danõ; jaʼoegõ, ba lõ õwoeʼai wawoeʼoesa li andrõ, ba faʼahachõ dõdõoe ba genonimõ andrõ, soloʼõ niw̃aʼõoe, soroi siʼaikõ ba dõdõra, (Moz. II. 15, 11; Moz. V. 7, 9); 15no lõ niwoeʼaimõ chõ genonioe, amagoe Dawido, nifaboeʼoemõ chõnia. No bawaoe zamaboeʼoe ba no tangaoe zamaloea, si mane maʼõchṍ andre. 16Ba ijaʼe, jaʼoegõ Jehowa, Lowalangi Ndraono Gizeraëli, ba bõi woeʼai chõ genonioe, amagoe Dawido nifaboeʼoemõ chõnia, me õmane: Lõ faloecha dania lõ chõoe [ngaʼõtõ] fõnagoe, sidadao ba dadaoma zalaw̃a ba Ndraono Gizeraëli, asala lõ labõhõli lala andrõ chõra ngaʼõtõoe, ba woloʼõ oroisagoe andrõ, si mane jaʼoegõ, me no õtõrõ, fõnagoe. (Sin. 132, 11. Sam. II. 7, 16). 17Ba ijaʼe, jaʼoegõ Lowalangi Ndraono Gizeraëli, ba enaʼõ na itõrõ gamaboeʼoela limõ andrõ, nifaboeʼoemõ chõ genonioe Dawido! 18Ba hadia, si ndroehoe iʼiagõ awõ niha ba goeli danõ Lowalangi? Hiza, soroego andrõ ba fondrege zoroego, ba no ambõ nahamõ, ba mendroea manõ gosali andre nilaoegoe. (F. 2, 5). 19Ba beʼe mbõrõ dalingaoe ba wangandrõ genonimõ ba ba wakaosania, jaʼoegõ Jehowa, Lowalangigoe, enaʼõ õfondrondrongo weʼaoʼao andrõ ba fangandrõ, na mangandrõ genonioe. 20Enaʼõ si teboka manõ hõrõoe, jaw̃a gosali andre, bongi maʼṍchõ, jaw̃a naha andre, niw̃aʼõoe, ba daʼõ õfonahia dõimõ andrõ; enaʼõ õfondrondrongo wangandrõ andrõ, na mangandrõ genonioe ba naha andre. (Moz. II. 20, 24). 21Ba enaʼõ na õfondrondrongo li wakaosa andrõ chõ genonioe ba ba mbanoeaoe Iraono Gizeraëli, na mangandrõ ira ba naha andre. Fondrondrongo ae ba naha andrõ, sidadao ndraʼoegõ, ba zoroego, ba na õrongo, ba bologõ dõdõoe! 22Na so zosala chõ nawõnia ba na labeʼe ba hõloe ia, enaʼõ ba hõloe iʼaroʼõ niw̃aʼõnia, ba na so ia, na ibaja hõloe, fõna naha wameʼe soemange chõoe, ba nomo andre: (Moz. II. 22, 10) 23ba fondrondrongo ba zoroego ba tolo, ba ohe ba lala hoehoeo genonimõ, enaʼõ õsoeloni ba zi so horõ, wangahareʼõ ba hoeloenia nilaoenia andrõ, ba enaʼõ õheta ba hoeloe zi lõ horõ, wanoelõni chõnia faʼatoelõ dõdõnia. 24Ba na teʼala mbanoeaoe Iraono Gizeraëli labeʼe emalira, me no molalõ ira chõoe, ba na lafalalini geraʼerara ba na lafarongogõ dõimõ, na mangandrõ ira ba na fakao ira chõoe, ba nomo andre: (Moz. V. 28, 25) 25ba enaʼõ na õfondrondrongo ba zoroego, ba õbeʼe aefa horõ mbanoeaoe Iraono Gizeraëli, ba õʼohe mangawoeli ira ba danõ andrõ, nibeʼeoe chõra ba chõ ndra toeara mege. 26Ba na no tedoehõ mbanoea si jaw̃a, na lõ teoe, bõrõ me no molalõ ira chõoe, ba na mangandrõ ira ba naha andre, na lafarongogõ dõimõ, na lafalalini geraʼerara, na labõhõli horõra andrõ, me no õhõndrõgõ ira: (Moz. V. 28, 23. 24) 27ba enaʼõ na õfondrondrongo ba zoroego ba õbeʼe aefa horõ genonioe andrõ, horõ mbanoeaoe Iraono Gizeraëli, wanoetoeroe chõra lala si sõchi andrõ, nitõrõ, ba enaʼõ na õfatõrõ deoe ba danõ andrõ, nibeʼeoe ba mbanoeaoe andrõ, tána chõra, ondrõita. 28Ba ma lofo mbanoea ba danõ, ba ma fõchõ waba, ba ma faʼachozi ngalai wache, ba ma faʼahohomõ, ba ma tamo, ba ma fõla; ba ma lafakao ira emalira, ba mbanoea chõra heza, ba ma hadia ia wamakao ba hadia ia wõchõ: (Ngaʼõt. II. 20, 9) 29na dania õrongo wangandrõ ba ma fakaosa, na ha niha zangandrõ, ba na banoeaoe Iraono Gizeraëli fefoe, na dozi afõchõ chõra wamõzi andrõ ba safõchõ andrõ, si no gõna ira, ba na laʼoroʼõ dangara ba nomo andre: 30ba enaʼõ na õfondrondrongo ba zoroego, ba naha andrõ, ba zi dadao ndraʼoegõ, ba õbeʼe aefa horõ ba õsoelõni ba zamõsana nitõrõnia fefoe, balazi wangilamõ tõdõnia — me no ha jaʼoegõ zangila tõdõ nono niha! — (Ngaʼõt. I. 29, 17. Sin. 7, 10) 31enaʼõ laʼataʼoefi ndraʼoegõ, ba wanõrõ lala andrõ chõoe, si lõ mamalõmalõ, gõtõ weʼasora ba danõ andrõ, nibeʼeoe chõ ndra toeama. 32Ba he ba niha bõʼõ, si tenga banoeaoe Iraono Gizeraëli, na mõi ia, moroi ba danõ sarõoe, bõrõ dõimõ andrõ, seboea, ba tangaoe andrõ, sabõlõ, ba taʼiomõ si no õʼoroʼõ — na mõi ia mangandrõ ba golajama nomo andre: 33ba enaʼõ no õfondrondrongo ba zoroego, ba naha andrõ, ba zi dadao ndraʼoegõ, ba õʼoʼõ fefoe hadia ia, niʼandrõ niha bõʼõ andrõ chõoe, enaʼõ dozi soi ba goeli danõ aboto ba dõdõ dõimõ andrõ, enaʼõ laʼataʼoefi ndraʼoegõ, si mane banoeaoe Iraono Gizeraëli, ba enaʼõ lasõndra wa no tõimõ mbõrõ dõi gosali andre, nilaoegoe. 34Ba na mõi fasoewõ ba nemalira mbanoeamõ, na latõrõ lala niw̃aʼõoe chõra, ba na mangandrõ ira chõoe, na laʼotahõgõ mbanoea andre, nitoejoemõ, ba osali andre, nilaoegoe nahia dõimõ: (Dan. 6, 10) 35ba enaʼõ na õfondrondrongo wangandrõra ba fangarõngarõra, ba õtolo ira. 36Ba na molalõ ira chõoe — samõsa sa lõ niha, si lõ horõ! — ba na mofõnoe ndraʼoegõ chõra ba na õbeʼe ba danga nemalira ira, na tobali laʼoloiʼõ ira ba danõ sarõoe, ba ma ba danõ sahatõ, sabõlõ moroi chõra, 37ba na mangerangera ira, ba danõ andrõ, ba nitaha jaʼira, ba na lamane: No mosala ndraʼaga, no matõrõ lala si lõ sõchi, no seboea horõ ndraʼaga! (Dan. 9, 5) 38ba na lafoeli ira chõoe, soroi siʼaikõ ba dõdõra ba ba geraʼerara fefoe, ba danõ zamakao jaʼira, si no mangoloiʼõ jaʼira, ba na mangandrõ ira, na laʼotahõgõ danõra andre, nibeʼeoe chõ ndra toeara ba banoea andre, nitoejoemõ, ba omo andre, nilaoegoe nahia dõimõ: 39ba enaʼõ na õfondrondrongo wangandrõra ba fangarõngarõra, soroi siʼaikõ ba dõdõ, ba zoroego chõoe, ba naha andrõ, ba zi so dadaomamõ, ba õtolo ira, ba õbeʼe aefa horõ mbanoeaoe, lalõra andrõ chõoe. 40Ba enaʼõ na si teboka manõ hõrõoe, jaʼoegõ Lowalangigoe, ba na õbeʼe manõ mbõrõ dalingaoe ba wangandrõ ba naha andre! 41Ba ijaʼe, ba fazaw̃aʼõ, jaʼoegõ Lowalangi, Jehowa, saw̃a zolombase ndraʼoegõ, jaʼoegõ ba tawõla waʼabõlõoe andrõ! Ndramoeʼobaroe wangorifi ere andrõ chõoe, jaʼoegõ Lowalangi, Jehowa, ba ja sowoeawoea tõdõ ba zi sõchi andrõ zatoelõ tõdõ andrõ chõoe! (Sin. 132, 8. 9). 42He Lowalangi, Jehowa, bõi timba nibajoini andrõ chõoe; tõrõtõrõ tõdõoe waʼahachõ dõdõoe andrõ chõ genonioe Dawido!” (Sam. II. 7, 13).
Currently Selected:
SOERA NGAʼÕTÕ II. FAZA 6.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.