SOERA NGAʼÕTÕ II. FAZA 5.
FAZA 5.
I. Laʼohe ba wondrege niʼamoniʼõ dawõla andrõ. II. Manoenõ gere ba ihawoei gosali bacha lachõmi Jehowa.
(Faigi gõi Raz. I. 7, 51—8, 1—11)
1I. Ba me no awai fefoe hadia ia nifafazõchiʼõ Zelomo ba gosali Jehowa, ba iʼohe bacha Selomo mboeala namania andrõ, niʼamoniʼõ; firõ andrõ, ba anaʼa ba fakake andrõ fefoe, ba ibeʼe ba mbateʼe girõgirõ ba gosali Lowalangi. (Ngaʼõt. I. 28, 14—18). 2Ba ifaloechaʼõ Selomo zatoea Ndraono Gizeraëli, awõ hõgõ mado fefoe, salaw̃a soi Ndraono Gizeraëli ba Jeroezalema, ba wolohe mijaw̃a tawõla andrõ, nahia goroisa Jehowa, moroi ba mbanoea Dawido Siona andrõ. 3Ba owoelo ira chõ razo, dozi ndra matoea Iraono Gizeraëli, ba mbaw̃a Etani, ba gowasa, baw̃a si fitoe. (Moz. III. 23, 34). 4Ahori so zatoea Ndraono Gizeraëli, ba lafazaw̃a dawõla Ono Lewi, 5ba laʼohe mijaw̃a, fabaja ose wamaʼeleʼõ ba fakake niʼamoniʼõ andrõ fefoe, baose — daʼõ niʼohe gere Ono Lewi mijaw̃a. 6Ba laʼiagõ fõna dawõla razo Selomo ba Iraono Gizeraëli sato, fefoe, si no faloecha chõnia, wameʼe soemange biribiri ba saw̃i, irege tebai saʼae laʼerai, mbalazi waʼoja, tebai laʼofaja. 7Ba ere andrõ, ba laʼohe ba nahania dawõla goroisa Jehowa, ba mbateʼe tánõ ba hambo gosali, ba wondrege niʼamoniʼõ andrõ, barõ gafi keroebi andrõ. 8Noa sa moebologõ gafi keroebi andrõ, jaw̃a naha dawõla, ba tobali samonõoe tawõla, fabaja heaheania, keroebi andrõ, moroi jaw̃a. 9Ba faʼanaoe heahea andrõ, ba faoro mbalõ moroi ba niʼamoniʼõ, fõnafõna mbateʼe ba hambo andrõ; ba baoeloe, ba lõ oroma. Ba daʼõ nahania, iroegi maʼõchṍ andre. 10Ba õsi dawõla, ba ha kara wanoera andrõ si doea gõrõ, nibeʼe Moze bacha, ba gahe hili Horebi, kara wanoeroe ba wawoeʼoesa li andrõ, me fawoeʼoe li Jehowa ba Ndraono Gizeraëli, me aheta ira ba danõ Miseraji.
11II. Ba me laheta ira ba niʼamoniʼõ ere (noa sa ahori mamoni gere, si so, lõ moefaigi ngenoli), 12ba sanoenõ andrõ fefoe, Ono Lewi, ira Asafo, Hemano Jedoetoeno, fabaja onora ba talifoesõra, ba ahori so ba daʼõ, tánõ ba gatoemboecha loeo, iʼotarai naha wameʼe soemange, baroe tarafali mbaroera, ba so chõra waritia ba biola nitika, seboea ba sideʼide, ba 120 gere ba ngaira, solaoe torofe; (Ngaʼõt. I. 15, 19; 16, 37. 41. 42; 25, 1—7); 13ba hoelõ zi ha sara lira zolaoe torofe zanoenõ, wanoeno Jehowa, awõ wangandrõ saoha gõlõ chõnia. Ba me labõrõgõ wolaoe torofe ba famõzi faritia, ba folaoe hadia ia [mbõʼõnia] nifolī, ba fanoeno Jehowa andrõ: ”me no si sõchi tõdõ ia ba me si lõ aetoe waʼeboea dõdõnia andrõ!” ba anõnõ gosali bacha lawoeo, osali Jehowa andrõ, (Sin. 136. Ngaʼõt. I. 16, 34), 14ba lõ lala gere, ba wangai halõwõra, me no anõnõ gosali Lowalangi lachõmi Jehowa andrõ.
Currently Selected:
SOERA NGAʼÕTÕ II. FAZA 5.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.