SOERA NGAʼÕTÕ II. FAZA 35.
FAZA 35.
I. Lalaoe wasa. II. Isoewõ Josia Faraʼo Necho. Faʼamate Josia. III. Fangeʼesi Josia.
(Faigi gõi Raz. II. 23, 21—30)
1I. Ba ilaoe wasa chõ Jehowa Josia, ba Jeroezalema, lataba wasa andrõ ba zi meweleõfa, ba mbaw̃a si fõfõna. (Moz. II. 12, 6). 2Ba ifataro gere andrõ, ba halõw̃õra, ba ifarooe dõdõ ba halõw̃õra ba gosali Jehowa. 3Ba imane ba Nono Lewi andrõ, samahaõ Iraono Gizeraëli fefoe, ba si no moeʼamoniʼõ chõ Jehowa: Mibeʼe ba gosali dawõla niʼamoniʼõ, ba gosali nilaoe Zelomo, ono Dawido, razo Ndraono Gizeraëli. Bõi saʼae miʼosaʼosaʼõ. Miʼae saʼae enoni Lowalangimi Jehowa ba enoni mbanoeania Iraono Gizeraëli. (Ngaʼõt. I. 23, 26). 4Ba mifaʼanõ ami, ba ngafoemi, ba ngenolimi, dali nifachoi Dawido, razo Ndraono Gizeraëli, awõ goroisa nononia Selomo. (Ngaʼõt. I. 24). 5Miʼagõ niʼamoniʼõ, dali ngenoli ngafōē niwami andrõ, sato, sangesangenoli zawoesawōē Nono Lewi. 6Ba mitaba wasa, ba miʼamoni, ba miʼasiwai õ ndra talifoesõmi, dali wolaoemi goroisa Jehowa andrõ, nifaʼema Moze. 7Ba Josia, ba ibeʼe saoha gõlõnia ba zato nono mbiribiri ba ono Nambi — oi soemange fasa ba zi so andrõ, 30,000 fefoe — ba 3000 ngaʼeoe zaw̃i, oi ochõta razo mege. (F. 30, 24). 8Ba satoea mbanoea andrõ chõnia, ba labeʼe gõi, saoha gõlõra, ba zato ba ba gere ba ba Nono Lewi. Hilikia andrõ ba Sacharia ba Jehiëli, satoea ba gosali Lowalangi, ba labeʼe ba gere, soemange fasa, ba 2600 [nono mbiribiri] ba 300 ngaʼeoe zaw̃i. 9Ba Chanania ba Semaja ba Netaneʼeli, talifoesõnia, ba Hasabia ba Jeïeli ba Jozabada, satoea Nono Lewi, ba labeʼe saoha gõlõra ba Nono Lewi, soemange fasa, ba 5000 [nono mbiribiri] ba 500 ngaʼeoe zaw̃i. 10Ba no moebeʼe ba lala wameʼe soemange andrõ, ba laʼagõ nahara ere ba Ono Lewi, ba ngenolira, dali niw̃aʼõ razo. 11Ba lataba wasa, ba latema ba dangara ndro ere ba latefe nitefe, ba Ono Lewi zamoʼa oeli [zoemange]. 12Ba laʼoniagõ nibeʼe soemange nitoenoe, ba wameʼe ba danga ngafōē zato, enaʼõ laʼoʼõ nifachoi ba zoera Moze, ba lamanõ gõi ba zaw̃i andrõ. 13Ba latoenoe ba galitõ wasa andrõ, dali nifachoi, ba ameʼela niʼamoniʼõ andrõ, ba larino ba mbalanga ba ba mbowoa ba ba mako ba lataʼitaʼi labeʼe ba niha sato fefoe. (Moz. II. 12, 8). 14Ba aefa daʼõ, ba laʼasiwai chõra, fabaja õ gere. Iroegi bongi sa, ba lõ aefa gere, maʼoewoe Gaʼaroni, ba wameʼe soemange nitoenoe andrõ, fabaja tawõ andrõ, andrõ wa Ono Lewi zangasiwai gõra ba õ gere, maʼoewoe Gaʼaroni. 15Ba laʼiagõ nahara sanoenõ andrõ, maʼoewoe Gasafo, dali nifachoi ndra Dawido, Asafo, Hemano ba Jedoetoeno sangiʼila andrõ chõ razo, ba si manõ gõi zanaro ba mbawandroehõ fefoe. Alacha lõ labõhõi halõw̃õ, me no iwara andrõ, Ono Lewi zangasiwai gõra. (Ngaʼõt. I. 16, 7). 16Ba tobali no moebeʼe ba lala wamosoemange Jehowa andrõ fefoe, me loeo daʼõ lalaoe wasa andrõ ba labeʼe zoemange nitoenoe ba naha wameʼe soemange andrõ chõ Jehowa, dali nifachoi razo Josia. 17Tobali lalaoe wasa Iraono Gizeraëli, si so andrõ, me loeo daʼõ, fabaja owasa roti si lõ moeʼaisõni, fitoe ngaloeo waʼara. 18Ba lõ moerai moelaoe wasa si manõ, iʼotarai loeo Zamoeëli samaʼeleʼõ, samõsa lõ razo Ndraono Gizeraëli mege, solaoe fasa, si mane nilaoe Josia ba ere andrõ ba Ono Lewi, awõ mado Joeda, awõ Ndraono Gizeraëli fefoe, si so andrõ, ba banoea Jeroezalema. 19Me no aloea mewelewitoe fache razo Josia telaoe wasa andrõ.
20II. Ba me aefa daʼõ fefoe — me no ifoeli iʼazõchi gosali Josia — ba so moroi si tooe Necho, razo Miseraji, ba wanoewõ ba Garikemi, ba mbewe Oifarati. Ba ifaondragõ ia Josia. 21Ba ifatenge zinenge chõnia Necho, imane: Hadia horõgoe chõoe, jaʼoegõ razo mado Joeda? Tenga jaʼoegõ oesoewõ iadaʼe, oedoegoe oesoewõ, ba no ifangaõsõ ndraʼo Lowalangi. Bõi law̃a Lowalangi andrõ, si oawõgõ jaʼo, fa bõi ifakiko ndraʼoegõ! 22Ba lõ ibõhõli ia Josia, noa sa ihonogõi sibai, ilaoe chõnia. Andrõ wa lõ ifondrondrongo li Necho andrõ, niw̃aʼõ Lowalangi, ifaondragõ, ba wolaoe ba ndraso andrõ ba Megido. 23Ba lafana razo Josia si fafana. Ba imane razo chõ genoninia: Miʼohe misa ndraʼo, noa sa mesocho ndraʼo, socho seboea! 24Ba laheta ia ba goereta [zanoewõ] enoninia, labeʼe ba goeretania si samboea, ba me no laroegi Jeroezalema, ba mate ia, ba ba lewatõ ndra amania lakoʼo ia. Ba laʼeʼesi Josia mado Joeda ba banoea Jeroezalema fefoe.
25III. Ba ilaoe ngenoengenoe Jeremia ba chõ Josia andrõ, ba dozi sanoenõ, he ira matoea, ba he ira alawe, ba itõrõ lira Josia ba ngenoengenoera andrõ, iroegi maʼõchṍ andre. Ba labaliʼõ hoekoe ba Ndraono Gizeraëli daʼõ, ba no moetanõ ba zoera, ba zoera ngenoengenoe andrõ. 26Ba bõʼõnia hikaja Josia ba hadia nilaoenia si sõchi, woloʼõ nifachoi ba goroisa, 27he hikajania famobõrõ mege, ba he safoeria andrõ, ba no moetanõ ba zoera razo Ndraono Gizeraëli ba ba zoera razo mado Joeda.
Currently Selected:
SOERA NGAʼÕTÕ II. FAZA 35.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.