SOERA NGAʼÕTÕ II. FAZA 34.
FAZA 34.
I. Ihori nadoe Josia. II. Lahaogõ gosali ba lasõndra zoera goroisa. III. Ifakaoniʼõ zamaʼeleʼõ ira alawe andrõ, Hoeleda, Josia, ba hadia niw̃aʼõ daʼõ. IV. Lafoeli fawoeʼoe li chõ Jehowa.
(Faigi gõi Raz. II. 22, 1—23, 20)
1I. Ha mew̃aloe fache na Josia, me tobali razo ia, ba 31 fache razo ia ba Jeroezalema. 2Ba somasi Jehowa ilaoe, itõrõ lala doeania Dawido, lõ iholeʼõ ia, he ba gambõlõ, ba he ba gabera. 3Ba me no aloea mewitoe fache razo ia, me iraono na ia, ba ibõrõtaigõ mangaloei Lowalangi doeania Dawido, ba me no aloea mewelezara fache, ba ibõrõtaigõ mangehao tanõ mado Joeda, awõ Jeroezalema, wangeheta hilihili andrõ ba Asera andrõ ba adoe nifoë ba adoe nifahele. (Raz. I. 13, 3). 4Ba zi so jaʼia ladoedoegõ naha wameʼe soemange chõ Mbaʼali, ba laʼew̃a nadoe loeo andrõ, ba dete jaw̃a: ba Asera andrõ ba adoe nifoë ba adoe nifahele, ba irasa, ifoefoe ba ifazawili ba dete lewatõ zamosoemange me mege. (Moz. III. 26, 30). 5Ba tõla gere andrõ, ba itoenoe ba dete naha wameʼe soemange andrõ chõra, wangehao tanõ mado Joeda, awõ Jeroezalema. (Raz. I. 13, 2). 6Ba ba mbanoea mado Manase ba ba mbanoea mado Geferaji ba ba mbanoea mado Zimeoni ba iroegi ba mado Nafetali — ba gadoedoela chõra misa — 7ba idoedoegõ naha wameʼe soemange, irasa ba ifoefoe Gasera andrõ ba adoe nifoë; ba adoe loeo andrõ, ba iʼew̃a, ba danõ Ndraono Gizeraëli maʼasagõrõ. Ba ifoeli ia ba Jeroezalema.
8II. Ba me no aloea mewelewitoe fache razo ia, me ihaogõhaogõ danõ ba osali, ba ifatenge Zafana andrõ, ono Gasalia, ba koemandra ba mbanoea andrõ, Maʼaseja, ba saʼasa seboea, Joa, ono Joahasi, ba wangaʼazõchi osali Lowalanginia Jehowa. 9Ba mõi ira chõ gere seboea, Hilikia, ba labeʼe ba dangania ganaʼa andrõ, si no moebeʼe ameʼela ba gosali Lowalangi, niʼozaragõ Nono Lewi andrõ, sanaro ba mbawandroehõ, niʼozaragõ ba mado Manase ba ba mado Geferaji ba ba mado Gizeraëli bõʼõ, fefoe, ba he ba mado Joeda fefoe ba ba mado Mbenijami ba ba mbanoea Jeroezalema. 10Ba labeʼe ba danga hõgõ doeka, nifataro ba gosali Jehowa; ba jaʼira zameʼe ba zohalõw̃õ ba gosali Jehowa, ba wangaʼazõchi osali, ba ba wangehao. 11Ba zotomo ba ba doeka gara labeʼe, enaʼõ laʼõli gara nitoto ba eoe famabõbõ andrõ ba boeatõ ba nomo andrõ, nidoedoegõ razo mado Joeda mege. 12Ba mohalõhalõw̃õ niha, tenga si falimo, lahalõhalõ halõw̃õ andrõ, niw̃aʼõ chõra: Ono Lewi andrõ, Jahata ba Obadia, maʼoewoe Merari ba Sacharia ba Mesoela, maʼoewoe Gahati, ba wamaigimaigi. Ba Ono Lewi andrõ — dozi si no toʼõlõ molaoe hadia nifolī ba wanoenõ — ba labeʼe mandroe zonoro. 13Ba dozi si so halõw̃õ hadia ia, ba nifomandroe. Ba ba Nono Lewi andrõ, ba no doeroetoeli õsa, ba amaedola goemandroe õsa ba sanaro ba mbawandroehõ õsa. 14Ba me lasaoʼõ baero gefe andrõ, si no moebeʼe ba gosali Jehowa, ba isõndra zoera goroisa Jehowa Hilikia ere, soera chõ Moze no andrõ. 15Ba hoemede Hilikia, imane chõ doeroetoeli Safana: No oesõndra zoera goroisa, ba gosali Jehowa. Ba ibeʼe ba danga Zafana zoera andrõ Hilikia. 16Ba iʼohe chõ razo Safana ba iʼombachaʼõ chõ razo mbõʼõnia gõi, imane: Fefoe hadia ia halõw̃õ niw̃aʼõoe ba genonioe, ba no lahalõ. 17No lafadoewa gefe andrõ, ba gosali Jehowa, ba no labeʼe ba danga nifataro samaigimaigi ba ba danga hõgõ doeka. 18Ba imane na gõi chõ razo Safana doeroetoeli: No ibeʼe chõgoe zoera Hilikia ere. Ba ibaso õsa Safana, chõ razo.
19III. Ba me irongo daroma li oroisa andrõ razo, ba itika noechania. 20Ba ibeʼe li razo chõ ndra Hilikia Ahikamo, ono Zafana, Abedono, ono Micha, Safana, doeroetoeli, Asaja, ngoningoni razo, imane: 21Miʼae misofoe chõ Jehowa, ba chõgoe andre ba ba zi tosai na Iraono Gizeraëli ba mado Joeda, ba zoera andrõ nisõndra; eboea sibai sa wõnoe Jehowa, si no tesao chõda, me no lõ ba dõdõ ndra toeada oroisa Jehowa, ba woloʼõ sibai menaʼõ si so ba zoera andrõ. 22Ba Hilikia andrõ, awõ nitõfõi razo tõi andrõ, ba mõi chõ Hoeleda andrõ, samaʼeleʼõ ira alawe, foʼomo Zaloemi, samaigimaigi noecha, ono Dokahata ono Hasera; ba Jeroezalema so nomonia, tánõ si tooe, ba hoemede ira chõnia, lasofoe chõnia. 23Ba imane chõra: Daʼõ niw̃aʼõ Jehowa, Lowalangi Ndraono Gizeraëli: Mimane ba niha andrõ, samatenge jaʼami chõgoe: 24Daʼõ niw̃aʼõ Jehowa: Si ndroehoe, famakao oefatõrõ ba mbanoea andre, ba ba nõsinia, fangelifi andrõ fefoe, si so ba zoera andrõ, nibasora chõ razo mado Joeda; 25bõrõ me no laʼerogõ ndraʼo, ba me no lafosoemange Lowalangi bõʼõ, ba wangandrõ fõnoegoe nilaoe dangara andrõ fefoe; andrõ wa tesao wõnoegoe seboea ba mbanoea andre, si tebai tebato. 26Ba chõ razo mado Joeda, samatenge jaʼami, ba wanofoe chõ Jehowa, ba mimane: Daʼõ niw̃aʼõ Jehowa, Lowalangi Ndraono Gizeraëli, ba daroma li andrõ, nirongooe: 27Me no omboejoe dõdõoe, ba me no õʼideʼideʼõ ndraʼoegõ fõna Lowalangi, me õrongo niw̃aʼõnia nitandrõsaigõ ba mbanoea daʼe ba ba nõsinia, me no õʼideʼideʼõ ndraʼoegõ fõnagoe, ba me no õtika noechaoe, ba me no megeʼegeʼõ fõnagoe, ba noa gõi oefondrondrongo chõoe, iw̃aʼõ Jehowa. 28Hiza, oeʼoroedoegõ ndraʼoegõ chõ ndra amaoe, enaʼõ teʼohe ba lewatõmõ ndraʼoegõ lõ hadia ia ba enaʼõ lõ iʼila hõrõoe wamakao andrõ fefoe, nifatõrõgoe ba mbanoea andre dania! Ba laombachaʼõ chõ razo.
29IV. Ba ifatenge razo, ifakaoniʼõ zatoea mado Joeda ba satoea mbanoea Jeroezalema, fefoe. 30Ba mõi mijaw̃a ba gosali Jehowa razo, awõ ndra matoea mado Joeda ba banoea Jeroezalema, fefoe, fabaja ere ba Ono Lewi, awõ niha sato fefoe, he satoea, ba he iraono, ba ibaso chõra niw̃aʼõ ba zoera wawoeʼoesa li andrõ fefoe, soera nisõndra ba gosali Jehowa. 31Ba iʼagõ nahania razo ba fawoeʼoe li fõna Jehowa, wa edõna laʼoʼõ chõ Jehowa, wa edõna latõngõni goroisania ba famadoehoeʼõnia ba amachoitania, soroi siʼaikõ ba dõdõ ba ba geraʼera fefoe, ba woloʼõ taroma li ba wawoeʼoesa li andrõ, si so ba zoera andrõ. 32Ba iw̃aʼõ razo latehe wawoeʼoesa li andrõ banoea Jeroezalema fefoe, awõ mado Mbenijami, fefoe. Ba banoea Jeroezalema andrõ, ba labeʼe dali chõra wawoeʼoesa li andrõ chõ Lowalangi, Lowalangi ndra toeara. 33Ba ihori fefoe zogoro ita Josia, ba danõ Ndraono Gizeraëli fefoe, ba dozi niha ba danõ Ndraono Gizeraëli, ba ifarooe ba wamosoemange Lowalangira Jehowa. Ba fatoea lõ si mate ia, ba lõ labõhõli woloʼõ chõ Jehowa, Lowalangi ndra toeara.
Currently Selected:
SOERA NGAʼÕTÕ II. FAZA 34.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.