SOERA NGAʼÕTÕ II. FAZA 36.
FAZA 36.
I. Razo Joahasi, si lõ ararā. II. Teʼoloiʼõ ba Mbabeli Jojaki. III. Si manõ gõi Jojachi. IV. Sedekia razo. Fanoedoegõ Jeroezalema ba fangoloiʼõ jaʼira, ba Mbabeli. V. Itehe chõra wangawoeli Kiro.
(Faigi gõi Raz. II. 23, 30—25, 21)
1I. Ba lahalõ Joahasi andrõ, ono Josia, niha ba danõ, ba labaliʼõ razo ba Jeroezalema, fangali namania. 2Doea woeloe a tõloe fache Joahasi, me tobali razo ia, ba ha tõloe waw̃a razo ia ba Jeroezalema. 3Ba iheta ia razo razo Miseraji, ba tenga saʼae razo ia ba Jeroezalema. Ba ifoʼõmõ ira ba danõ [razo Miseraji], 22,050 balaki wirõ ba 3970 1/2 balaki ganaʼa. 4Ba razo Miseraji andrõ, ba ibaliʼõ razo ba mado Joeda ba ba Jeroezalema Geliaki, gaʼa Joahasi, ba ifalalini dõinia, Jojaki ibeʼe tõinia. Ba achininia Joahasi andrõ, ba iʼohe ba danõ Miseraji [Faraʼo] Necho.
5II. Doea woeloe a lima fache Jojaki, me tobali razo ia, ba mewelezara fache razo ia ba Jeroezalema. Ba si fatoewoe chõ Lowalanginia Jehowa ilaoe. 6Ba so moroi si tooe Neboekanesa, razo Mbabeli, ba wanoewõ jaʼia, ba irate ia, ba wolohe ba Mbabeli. (Raz. II. 24, 1. Jer. 22, 18). 7Ba he gamagama ba gosali Jehowa õsa, ba iʼohe ba Mbabeli Neboekanesa, ba ibeʼe ba gõdonia ba Mbabeli. 8Ba bõʼõnia hikaja Jojaki ba adoe andrõ chõnia, sogoro ita, nifafazõchiʼõnia, ba hadia ia na [zi lõ sõchi] chõnia, ba no moetanõ ba zoera razo Ndraono Gizeraëli ba ba zoera razo mado Joeda. Ba fangalinia razo, ba ononia Jojachi.
9III. Ha mew̃aloe fache Jojachi, me tobali razo ia, ba ha tõloe waw̃a a foeloe bongi razo ia ba Jeroezalema. Ba si fatoewoe chõ Jehowa ilaoe. (Raz. II. 24, 8 b. t.). 10Ba me no aloea ndrõfi, ba ifahalõʼõ ia Neboekanesa, ifaʼoheʼõ ba Mbabeli, fabaja gamagama andrõ, seboea bõli, ba gosali Jehowa, ba Sedekia, ama Jojachi si achi ibaliʼõ razo mado Joeda ba razo Jeroezalema. (Jer. 37, 1. Dan. 1, 2).
11IV. Doea woeloe a sara fache Zedekia, me tobali razo ia, ba mewelezara fache razo ia ba Jeroezalema. (Raz. II. 24, 18 b. t. Jer. 52, 1). 12Ba si fatoewoe chõ Lowalanginia Jehowa ilaoe; lõ iʼdeʼideʼõ ia chõ Jeremia andrõ, samaʼema chõnia niw̃aʼõ Jehowa. 13Ba lõʼõ gõi iʼoʼõ chõ razo Neboekanesa, si no mameʼe ba hõloe jaʼia chõ Lowalangi; iʼabeʼeʼõ dandronia ba tõdõnia, ba tobali lõ ifoeli ia chõ Jehowa, Lowalangi Ndraono Gizeraëli. 14Ba he satoea gere ba he niha sato, ba no eboea sibai walimosa, wangohiaʼõ sogoro ita andrõ, ba niha baero, ba laʼohe ba gosali Jehowa zalacha, ba gosali niʼamoniʼõ Jehowa, ba Jeroezalema. 15Ba lõ adagedage Jehowa, Lowalangi ndra toeara, lõ ibato wamatenge chõra sinengenia; me no ahachõ dõdõnia mboenoeania ba he nahiania andrõ. (Jer. 25, 4). 16Ba laʼoʼaja zinenge Lowalangi andrõ, lõ ba dõdõra linia, ba laʼigiʼigiʼõ zamaʼeleʼõ andrõ, irege eboea sibai wõnoe Jehowa, irege lõ fangorifi saʼae. 17Ba iʼohe chõra razo Ndrawa Galedaia, ifaboenoeʼõ siʼõli nono matoea chõra, bacha ba niʼamoniʼõ andrõ chõra; lõ ihachõsi tõdõ, he ono matoea, ba he ono alawe, ba he satoea, he si no tohare hoewa, — ahori manõ ibeʼe ba dangania. 18Ba he gamagama andrõ ba gosali Lowalangi, he sideʼide, ba he seboea, fabaja girõgirõ andrõ ba gosali Jehowa ba girõgirõ chõ razo ba girõgirõ zatoea mbanoea chõnia — ba ahori iʼohe ba Mbabeli. (Raz. II. 20, 17). 19Latoenoe gosali Jehowa, ba ladoedoegõ gõli Jeroezalema, awõ gõdo chõra fefoe, ba latoenoe, tobali ahori achozi gamagamara seboea bõli. 20Ba si lõ ichamõ bawa ziʼõli, ba iʼohe ba Mbabeli [razo Mbabeli] iʼoloiʼõ, ba tobali enoninia ira ba enoni ndraononia, irege labeʼe barõ mbawara ira Dawa Weresia, enaʼõ itõrõ niw̃aʼõ Jehowa, 21nifaʼema Jeremia, ”irege teʼali ba danõ ndrõfi wolombase andrõ; solombase manõ ia, gõtõ wa no amaedola danõ si mate ia,” irege aloea zi 70 fache. (Moz. III. 26, 34. Jer. 25, 11).
22V. Ba me awena razo Giro andrõ, razo Weresia — lõ dõfi na — enaʼõ itõrõ li Jehowa andrõ, nifaʼema Jeremia — ba ibeʼe ba dõdõ Giro andrõ, razo Weresia, Jehowa wameʼe oroisa ba mbanoeania fefoe — nifaʼoheʼõ soera gõi — imane: (Jer. 29, 10). 23Daʼe niw̃aʼõ Giro, razo Weresia: ”Fefoe gamatõrõw̃a ba goeli danõ, ba no ibeʼe chõgoe Jehowa, Lowalangi zoroego, ba jaʼia zangoemaʼõ chõgoe wolaoe osali chõnia ba Jeroezalema ba danõ mado Joeda. Ba ha niha ami mbanoeania, ba jamoetolo ia Lowalanginia, ba jamõi misi jaw̃a!”
Currently Selected:
SOERA NGAʼÕTÕ II. FAZA 36.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.