SOERA NGAʼÕTÕ II. FAZA 33.
FAZA 33.
I. Sameʼemeʼe adoe Manase. Laraʼoe ia Dawa Asiria ba laʼoloiʼõ ba chõra. II. Ifalalini geraʼerania ba ibeʼe aefa horõnia Lowalangi. III. Faʼamatenia. IV. Mameʼemeʼe adoe gõi Gamoni.
(Faigi gõi Raz. II. 21)
1I. Ha mewelendroea fache Manase, me tobali razo ia, ba 55 fache razo ia ba Jeroezalema. 2Ba si fatoewoe chõ Jehowa ilaoe, iʼohiaʼõ zogoro ita ba niha baero andrõ, nitimba Jehowa mege fõna Ndraono Gizeraëli. 3Ifoeli iʼaʼazõchi hilihili andrõ, nidoedoegõ namania Hisikia mege, ba ifaʼanõ naha wameʼe soemange ba Mbaʼali andrõ, ba ifazõchi Gasera, ba mangaloeloe ia ba ngahõnõ ba mbanoea si jaw̃a ba ifosoemange daʼõ. 4Ba ifaʼanõ gõi naha wameʼe soemange [ba nadoe] bacha ba gosali Jehowa, ba niw̃aʼõ Jehowa: Ba Jeroezalema nahia dõigoe, si lõ mamalõmalõ. 5Ba ba golajama gosali Jehowa, si doea gõrõ, ba ifaʼanõ naha wameʼe soemange ba ngahõnõ andrõ fefoe, ba mbanoea si jaw̃a. 6Ononia matoea ifatõrõ ba galitõ, ba ndraso Mbeni-Hinomo, fakelemoe ia ba faeta ba hadia ia necheneche bõʼõ ba zi tobini; ba ifataro zogaoni bechoe ba sangombacha eloeaha gilaʼila; oja ngawalõ ilaoe si fatoewoe chõ Jehowa, ba wangandrõ fõnoenia. (Moz. V. 18, 10. 11). 7Ba adoe nifoë andrõ, nifalaoeʼõnia, ba ibeʼe ba gosali Lowalangi, ba niw̃aʼõ Lowalangi chõ Dawido ba chõ nononia Selomo: Osali andre, awõ Jeroezalema, nitoejoegoe, ba mado Ndraono Gizeraëli fefoe, ba oebaliʼõ nahia dõigoe, gõtõgõtõ waʼara. 8Ba lõʼõ saʼae oewoeʼai gahe Ndraono Gizeraëli ba danõ andrõ, nibeʼegoe chõ ndra toeami, balazi na so ba dõdõra woloʼõ fefoe hadia ia niw̃aʼõgoe chõra, na latõrõ sibai goroisa andrõ, awõ gamachoita, awõ lala andrõ, nifaʼema Moze. 9Ba tobali ifowõhõ mado Joeda ba banoea Jeroezalema Manase, ba wolaoe si lõ sõchi, sabõlõbõlõ moroi ba nilaoe niha baero andrõ, nihori Jehowa fõna Ndraono Gizeraëli. 10Ba hoemede Jehowa chõ Manase ba ba mbanoeania, ba lõ lafondrondrongo. 11Ba ifaʼamõi chõra Jehowa zolohe sanoewõ chõ razo Asiria; ba laraʼoe Manase chaichai, ba labõbõ ba laʼohe ba ba Mbabeli.
12II. Ba me no aboe dõdõnia, ba iʼaloei waʼebolo dõdõ Lowalanginia Jehowa, iʼideʼideʼõ sibai ia fõna Lowalangi ndra toeania. 13Ba me mangandrõngandrõ ia chõnia, be ifondrondrongo linia. Iʼoʼõ chõnia wakaosania andrõ, ba iʼohe mangawoeli ia ba Jeroezalema, ifoeli ifataro razo. Ba awena aboto ba dõdõ Manase, wa Jehowa Lowalangi. 14Ba aefa daʼõ, ba ifalaoeʼõ gõli kara andrõ, tánõ baero, ba mbanoea Dawido, tánõ ba gaechoela loeo, mitooe ba Gihona, ba ndraso, iroegi ba lala mijomo ba mbawa gõli giʼa, ifasoei Gofeli andrõ, õli salaw̃a sibai. Ba ifataro gõi goemandra ba mbanoea saro, ba mado Joeda, fefoe. 15Ba iheta ba gosali Jehowa nadoe andrõ, adoe niha baero, ba adoe famaedo andrõ, fabaja naha wameʼe soemange fefoe, nifaʼanõnia ba hili gosali Jehowa ba ba Jeroezalema, itiboʼõ baero mbanoea. 16Ba ifoeli iʼazõchi naha wameʼe soemange chõ Jehowa ba ibeʼe zoemange fangorifi ba soemange fangandrõ saoha gõlõ, ba daʼõ; ba ibeʼe li ba mado Joeda, enaʼõ Jehowa, Lowalangi Ndraono Gizeraëli lafosoemange. 17Ba niha sato, ba si dõrõdõrṍ mameʼe soemange ba hilihili andrõ, he w̃aʼae chõ Lowalangira Jehowa labeʼe.
18III. Ba bõʼõnia hikaja Manase ba fangandrõnia andrõ chõ Lowalanginia, awõ niw̃aʼõ zangiʼila andrõ, samaʼema chõnia niw̃aʼõ Lowalangi Ndraono Gizeraëli, ba no moetanõ ba zoera hikaja razo Ndraono Gizeraëli. 19Ba fangandrõnia andrõ, ba he wisa wamondrongo Jehowa linia, awõ horõnia andrõ fefoe, ba falimosania, awõ naha andrõ misa, ba nifazõchinia hilihili, awõ nibeʼenia Asera ba adoe nifoë, me lõ niʼideʼideʼõnia jaʼia na, ba no moetanõ ba zoera hikaja nisoera zangiʼila andrõ. 20Ba mate Manase, itõrõ lala ndra amania, ba ba ngai nomonia lakoʼo ia. Ba fangalinia razo, ba ononia Amoni.
21IV. Doea woeloe a roea fache Gamoni, me tobali razo ia, ba ha mendroea fache razo ia ba Jeroezalema, (Raz. II. 21, 19 b. t.) 22Ba si fatoewoe chõ Jehowa ilaoe, si mane amania Manase mege. Ba nadoe nifoë andrõ fefoe, nifazõchi Manase mege, ba iʼojaʼõ zoemange Amoni, enoni daʼõ ia. 23Ba lõʼõ sa iʼideʼideʼõ ia fõna Jehowa, si mane amania mege; jaʼia, Amoni, ba ihõna manõ horõ ba hoeloenia. 24Ba mamagõlõ genoninia, ba wamoenoe jaʼia, ba laboenoe ia ba gõdonia. 25Ba laboenoe gõi fefoe zamagõlõ mege ba wamoenoe razo Amoni niha ba danõ; ba lafataro fangalinia razo nononia Josia niha ba danõ.
Currently Selected:
SOERA NGAʼÕTÕ II. FAZA 33.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.