SOERA NGAʼÕTÕ II. FAZA 32.
FAZA 32.
I. Isoewõ ira Saneribi andrõ. II. Fajaw̃asa zinenge Zaneribi. III. Fanolo Lowalangi. IV. Fõchõ Hisikia ba faʼamatenia.
(Faigi gõi Raz. II. 18, 13 b. t.: Jes. 36, 1 b. t.)
1I. Ba me aefa daʼõ, faʼatarõ dõdõ Hisikia [ba zi sõchi], ba so moroi sa Zaneribi, razo Asiria. Isaw̃a danõ mado Joeda ba isoewõ mbanoea saro, enaʼõ na atoeʼa ia dõdõnia. 2Ba me iʼila Hisikia, so moroi sa Zaneribi, ba wanoewõ Jeroezalema, 3ba mamagõlõ ia ba zatoea mbanoea andrõ chõnia, enaʼõ na laboenoe hele baero mbanoea; ba latolo ia [ba daʼõ]. 4Ba ato zowoelo niha, ba wamoenoe hele, awõ mbombo andrõ, sanõrõ tanõ andrõ, lamane: Hana wa tabeʼe lõ ambõ idanõ chõ ndra razo Asiria, na so ira? 5Ba iʼabeʼeʼõ dõdõnia [Hisikia], ba iʼaʼazõchi zaoecha gõli kara, fefoe; mõi ia ba malige andrõ ba ba gõli tánõ baero, ba iʼaroʼõ Milo andrõ ba mbanoea Dawido, ba oja ifafazõchiʼõ ono wana ba baloese. (Raz. I. 9, 24). 6Ba ifataro goemandra, solohe sato; ba ifaloechaʼõ chõnia daʼõ, ba newali, fõnafõna mbawa gõli, ba ihaogõ wehedenia chõra, imane: 7Miʼabeʼeʼõ dõdõmi, bõi mangiwa! Bõi miʼaboesi tõdõ ba bõi mibeʼe nikeani razo Asiria ami; ba he ba zato sibai andrõ niʼohenia, ba bõi tokea ami! Me no eboea nawõda, moroi ba nawõnia. (Raz. II. 6, 16). 8Awõnia, ba faʼabõlõ niha, ba awõda, ba Lowalangida Jehowa, ba wanolo jaʼita, ba enaʼõ jaʼia zi fasoewõ salahida! (Jer. 17, 5. Joh. I. 4, 4).
9II. Ba ifatenge genoninia Saneribi, razo Asiria (ba jaʼia, ba sanoewõ Lachisi, awõ zato andrõ chõnia), ifatenge ba Jeroezalema, chõ Hisikia razo mado Joeda, ba ba mado Joeda fefoe, ba Jeroezalema, imane chõra: 10Daʼõ niw̃aʼõ Zaneribi, razo Asiria: Hadia dõtõnafõmi, wa miʼiagõ manõ Jeroezalema, na lasasagõ ami? 11Si ndroehoe, Hisikia andrõ zamowõhõ jaʼami, enaʼõ ibeʼe mate olofo ba mate owõchi dõdõ ami, wangoemaʼõ: Iʼefaʼõ dania ita ba danga razo Asiria Lowalangida Jehowa! 12Hadia, tenga Hisikia daʼõ gõi zanoedoegõ mege hilihili andrõ chõnia, fabaja naha wameʼe soemange, ba sangoemaʼõ ba mado Joeda ba ba mbanoea Jeroezalema: Ha samboea naha wameʼe soemange, sangaloeloe ami, ba ha ba daʼõ mitoenoe zoemange? 13Hadia, lõ nirongomi he mawisa ba niha baero fefoe misa, ira amagoe ndraʼaga? He wisa Lowalangi niha baero andrõ, ba danõra misa, hadia no laʼila laʼefaʼõ ba dangagoe danõra andrõ? 14Ha niha ba Lowalangi niha andrõ fefoe, nihori ndra amagoe, zangila mege iʼefaʼõ enaʼõ ba dangagoe mbanoeania, wa iefaʼõ enaʼõ ami gõi ba dangagoe Lowalangimi andrõ? 15Ba bõi saʼae mibeʼe nifowõhõ Hisikia ami, bõi jamoefaeloengoe ami ba zi manõ! Bõi mifati linia! Lõʼõ sa Lowalangi ba niha fefoe ba ba zalaw̃a, heza, sangila mangefaʼõ ba dangagoe banoeania, ba he ba danga ndra amagoe mege; ba lõʼõ gõi iʼefaʼõ ami ba dangagoe Lowalangimi andrõ. 16Ba latohoegõ na wanandraw̃ai si Lowalangi, Jehowa, ba enoninia Hisikia sinenge Zaneribi andrõ. 17Ba soera gõi ifaʼoheʼõ, ba wanandraw̃aisi Jehowa, Lowalangi Ndraono Gizeraëli, ba ba wamõbõgõ chõnia hadia ia, imane: Si mane Lowalangi niha baero andrõ, si tebai mangefaʼõ ba dangagoe banoeara, si manõ gõi Lowalangi Hisikia andrõ, wa tebai iʼefaʼõ ba dangagoe mbanoeania. 18Ba moeʼao ira [sinenge no mege] bá mbanoea Jeroezalema andrõ, si so ba dete gõli kara, laʼeboeaʼõ lira, li Ndraono Gizeraëli, ba wametaʼoe jaʼira, enaʼõ tokea ira, ba enaʼõ mõi ba dangara [ba danga zanoewõ] mbanoea. 19Itõrõ lira Lowalangi Jeroezalema andrõ, lafaomagõ ba Lowalangi niha baero andrõ, nifazõchi danga niha. (Sin. 135, 15).
20III. Ba me mangandrõ razo Hisikia, awõ Jesaja samaʼeleʼõ, ono Gamosi, bõrõ daʼõ no mege, me laʼangarõfi li Jehowa, 21ba ifatenge malaʼika Jehowa, sangohori sanoewõ fefoe, awõ zolohe jaʼira, awõ goemandra, ba nahia razo Asiria; ba tobali ifoeli ia ba danõnia, no tehawoe ia faʼaila. Ba me mõi ia ba gosali Lowalanginia, ba so ndraononia, ba laboenoe ia siʼõli (Raz. II. 19, 37). 22Si manõ wangefaʼõ Jehowa Hisikia ba banoea Jeroezalema ba danga Zaneribi, razo Asiria, ba ba danga dánõ bõʼõ fefoe, ba lõʼõ saʼae hadia ia chõra, fasoei manõ, ibeʼe. 23Ba ato zolohe ba Jeroezalema boeala chõ Jehowa, ba chõ Hisikia, razo ba Jeroezalema, ba gamagama seboea bõli labeʼe. Ba razo seboea ia, me aefa daʼõ, wamaigi niha baero fefoe.
24IV. Ba me loeo daʼõ, ba mofõchõ Hisikia, fõchõ fanoenoe. Ba mangandrõ ia chõ Jehowa. Ba hoemede chõnia Jehowa ba ibeʼe chõnia dandra, sahõlihõli dõdõ. (Raz. II. 20). 25Ba lõ isoelõni Hisikia nilaoe chõnia, faʼahachõ dõdõ andrõ, fajaw̃a ia; andrõ wa tohare chõnia wõnoe, fõnoe sabõlõbõlõ, chõnia ba ba mado Joeda, ba ba mbanoea Jeroezalema. 26Ba mangaloeloe Hisikia, me no fajaw̃a dõdõnia; andrõ wa lõ itõrõ ira na fõnoe Jehowa, fõnoe sabõlõbõlõ andrõ, ba gõtõ Hisikia. 27Ba no eboea sibai ganaʼa Hisikia, ba no sabõlõ sibai ia. No ilaoe chõnia mbateʼe girõgirõ, firõ ba anaʼa ba manimani ba rembaremba ba baloese ba hadia ngawalõ gamagama na, seboea bõli, 28ba omo ba nihõna hadia ia ilaoe, nahia mboea nowi ba agoe ba fanicha; ba he kandra ngawalõ goerifõ, ba ilaoe gõi, ba kandra mbiribiri, ba mbenoea. 29Ba banoea itaroeʼõ ba no oja sibai chõnia goerifõ, biribiri ba saw̃i; noa sa iʼeboeaʼõ ganaʼania Lowalangi. 30Daʼõ Hisikia andrõ sombaʼa oengo nidanõ Gihona si jaw̃a, samatõrõ mitooe ba ba mbanoea Dawido, tánõ ba gaechoela loeo; ba hadia ia fefoe, nilaoe Hisikia, ba mofozoe. 31Ba me so zinenge andrõ, nifatenge razo Mbabeli chõnia, ba wanofoe tandra andrõ sahõlihõli dõdõ, ba danõ mege, ba iloeloe Hisikia Lowalangi, ba wanandraigõ jaʼia, enaʼõ oroma fefoe hadia ia zi so ba dõdõnia bacha. 32Ba bõʼõnia hikaja Hisikia andrõ, ba hadia ia nilaoenia si sõchi, ba no moetanõ ba zoera wamaʼeleʼõ andrõ chõ Jesaja samaʼeleʼõ, ono Gamosi, ba ba zoera razo mado Joeda ba ba zoera razo Ndraono Gizeraëli. 33Ba mate Hisikia, itõrõ lala ndra amania, ba ba lewatõ maʼoewoe Dawido lakoʼo ia, tánõ mijaw̃a; ba lafosoemange ia ba waʼamatenia mado Joeda fefoe ba banoea Jeroezalema. Ba fangalinia razo, ba ononia Manase.
Currently Selected:
SOERA NGAʼÕTÕ II. FAZA 32.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.